6.9.15

Alemaña: grande pa Europa, pequeña nel mundiu



La interpretación de la cris de Grecia y de les midíes de la Unión Europea ta cargada d’ideoloxización. El maniqueísmu tien grandes ventaxes porque evita la incertidume d’una discusión abierta, dexando de lláu los consensos ya’l conceutu de compromisu democráticu, refugando la lóxica de los fechos y tornando predecibles teoríes conspiratives. Asina, presentárase’l referéndum como la democracia y los griegos escontra l’antidemocrática Europa, los débiles escontra los fuertes, representaos estos últimos por Alemaña. Nun tóo ye tan simple. Fueron varios los países que forzaran les condiciones del rescate, particularmente los nueos socios del és, que carecieron reformes perdures. Hebo una irresponsabilidá política compartía na traxedia griega y na cris del euru.

El pasu de Varoufakis a Tsakalotos supunxo’l cambiu del “left-winger” anglosaxón al comunista mediterrániu. Tsakalotos yá cruzara papeles cola eurozona pero Varoufakis nun consintió una alcordada. Varoufakis nunca fixo autocrítica, amás de tracamundiar nos sos analises los dos rescates anteriores. Tsakalatos ye un estudiosu de la economía griega dende hai décades. Camienta que Grecia ta careciendo los axustes y austeridaes impuestes por un modelu neolliberal que ta arruinando a les clases medies y trabayadores. Tien razón, evidentemente, pero amete qu’el pilancu real en Grecia ye l’estáu clientelar, la evasión fiscal y los privilexos de los que goza la clas dirixente. Partiendo d’esti analís, lo qu’agora traten ye d’algamar un modelu de crecimientu ya una reducción del pesu la delda. Y, nesti sentíu, sí ye sensata la vieya propuesta de Varoufakis de lligar el pagu de la delda al crecimientu porque de la cris nun salimos con más austeridá ya’l cenciellu rescate de los bancos nun mos va devolver a la normalidá, nin a los griegos nin a los demás.
Y nel fondu, contra les apariencies, Angela Merkel cedió porque Grecia obtién un rescate nuéu a cambio d’unes reformes que naide sabe cómo va facer nin si van tener ésitu. Anque la situación ameyorara un tanto nada indica que Grecia se ponga de pies, como nun lo pudo facer nos últimos quince años. Grecia ta en situación de colapsu, con un PIB qu’espoxiga a menos del 0,5 por cientu interanual, cuando pronosticaben un 2,5 hai unos menses. La delda supera el 180 por cientu del PIB y los depósitos bancarios baxaron de 240.000 miyones a 140.000. El problema griegu nun ye  de lliquidez, sinon de solvencia. Al principiu d’esta recesión discutiérase sobro la lliquidez y la solvencia, pa acabar echando dineru a palaes pa rescatar bancos. Con Grecia nun actuaron asina. Hebo una obsesión con la delda a curtiu plazu ya un escaecimientu de la reestructuración, que lleva implícita otra quita, como reconoz el mesmu FMI.
Grecia nun tinía munches opciones. Una: salir del euru, introducir tensión inflacionista y, con ello, rebaxar la delda, pero a condición de que la delda pasara a contabilizase en la nuea moneda. Dos: buscar dineru fuera de Europa, peor solución que facelo dientro, na tu propia moneda. Tres: aceutar un alcuerdu, que ye lo que fixo. La salida temporal del euru nun yera un sinsentíu, anque introducía la incertidume de cuánto sedría eso de “temporal”. Dalgunos economistes de posiciones crítiques plantegaron hai unos años la circulación en paralelo al euru de una moneda pa España, a fin d’aliviar la situación. Pero ye llamativo qu’esos mesmos analistes s’enfurruñaron cuando se plantegó la salida temporal de Grecia de la eurozona. Otra vuelta nos alcontramos cola ideoloxización.
Lo mesmo alcontramos cuando analizamos el referéndum. Tsipras nun obtuvo la mayoría nes elleiciones pero el modelu griegu otorga cincuenta escaños de plus al partíu más votáu. Por eso convocó el referéndum, p’amosar que cuntaba con una mayoría aplastante. Y asina fue. Al final l’alcuerdu fue peor que la propuesta anterior y sobrevino cris de gobiernu, cris de partíu y elleiciones anticipaes. Tou un ésitu. Ya ye que los griegos nun votaran nada. Dixeron “non” al alcuerdu del 25 de xunu pero nada del alcuerdu que realmente se firmó.
Pero la realidá ye qu’el FMI, la UE y la propia Merkel reconocieran que la delda de Grecia ye impagable y qu’esti tercer rescate puede nun ser el definitivu. Esa delda va pagase, caro, pero ye duldioso que lo faiga’l país que la xeneró. Fairémoslo ente tolos europeos, con mayores o menores sacrificios. Per otra banda, razón tienen los que falen de la illexitimidá de la delda. Porque, ¿cómo ye que-y dan dineru a un país que se declara insolvente? ¿quiénes dieron ese dineru?, ¿quiénes lo recibieron?, ¿pa qué s’emplegara? Les rempuestes deberíen dales les oligarquíes que gobernaron Grecia y que inclusive maquillaron les sos cuentes. Ye mester investigar y que los responsables devuelvan les perres, en Grecia ya en toles partes.
La cris griega punxera sobro el tapete les contradicciones d’una Unión Europea qu’escaeciera demasiao les custiones sociales. Les polítiques d’austeridá escacharan el poder de la Unión Europea y desllexitimizaran el discursu europeísta ante miyones de ciudadanos. El problema ye la falta d’integración, l’ausencia d’un verdaderu bancu central, la inesistencia d’una política fiscal común. L’euru mal camina ensin unión fiscal nin una solidaridá que nun pasa de lo formal, embaxo les directrices d’una Alemaña demasiao grande pa Europa y demasiao pequeña nel mundiu. Europa desequilibrara la so exa. Por eso’l referéndum griegu fue importante porque marca un precedente. Dalgún día deberíamos los europeos votar, nun distritu únicu, qué clase de unión queremos, si una oligárquica y tecnocrática o una suma de ciudadanos qu’exercen la soberanía.

No hay comentarios:

Publicar un comentario

Nota: solo los miembros de este blog pueden publicar comentarios.