23.6.12

Ye necesario alcontrar nuevos espacios


Paez que yá asosegara un tanto la situación política asturiana como pa poder facer un analís reposáu y que nun fore lleváu pol afoguín de la urxencia. Les segundes elleiciones yá tan llonxanes, hai nuevu gobiernu ya hebo munchu movimientu en cuasi tolos seutores. Y, pente ellos, movimientos tamién nel ámbitu asturianista y nel nacionalista concretamente.
Polo que cinca al gobiernu’l PSOE nun creyo que quede por dicir nada que nun se dixere. Esi gobiernu en minoría, con menos escaños de los que tinía FAC cuando’l so gobiernu viose obligáu a disolver la Xunta Xeneral, namás puede ser viable colos sofitos puntuales d’IU y del PP. Nun horizonte de recesión económica y con unes polítiques que tan faciendo recayer tolos costes nes clases trabayadores, a poca coherencia qu’IU caltenga, difícile lo va tener pa dar el so preste al presidente Fernández. Polo tanto, lo más probable ye un gobiernu socialista sofitáu, fundamentalmente, nel grupu popular. Queda, d’esti mou, la gran oposición nes manes de FAC, que, la verdá, nun teo mui claro cómo lo va facer. Y, pa finar, el votu d’investidura dexa a una UPD, hasta entós intencionadamente ambigua, cola metada’l so ellectoráu y con un diputáu irrelevante.

¿Y qué pasara col nacionalismu o col asturianismu en xeneral?: nada que nun se viera vinir. Yá nes elleiciones anteriores, lo mesmo nes autonómiques que nes xenerales, el fracasu batía récords históricos ya eso que fazaña tala yera bien difícile de consiguir, daos los asiñalaes xostrapaes en más d’una y de dos vegaes. ¿Aú marchara’l votu asturianista y, dientro d’ello, l’estrictamente nacionalista?. En primer llugar, ye imposible, estadísticamente falando, que les vente o venticinco mil persones qu’anden al rodiu d’una opción asturiana, sumando tolo sumable (URAS, PAS, IAS, UNA, BPA, AA, CA y más que quiera dalguién ameter), marcharen pa l’abstención. En segundu llugar, na inmensa mayoría d’estos votantes hai una tradicional perceguera pa col PSOE y pa col PP. La conclusión ye la mesma a la que llegáramos nes dos elleiciones anteriores: IU y FAC son los grandes beneficiarios del desdexu asturianista. Ya otra vuelta pienso que, como la mayor parte d’esos votantes qu’abandonen yéranlo del PAS o de la URAS, los votos asturianistes y abondos tamién de los que son neto nacionalistes empobináronse haza FAC.

A partir d’esti analís y d’esta conclusión, que me paecen completamente llóxicos y que nun creyo que puedan ser refugaos, el nacionalismu –agora sí que falo en términos estrictos- entamó colos sos movimientos. Ya, otra vuelta, les coses volvieran per onde vienen siendo habituales dende siempres y, riba tóo, dende hai cinco-seyes años. Los intentos de coalición ente AA ya IAS del 2006 nun namás que nun cuayaron, sinon qu’acabaran franciendo en dos metaes a Andecha Astur. Los intentos de xuntanza por parte de persones tanto afiliaes como independientes, llamando a la chapeta a UNA, BPA y AA nos años 2009 a 2011, dos iniciatives a lo menos que yo me recuerde, nun dieran frutos y, amái, acabárase en dellos casos con alfrentamientos ya engarradielles ente los promotores.
Agora vuelve pasar lo mesmo. Dempués de poner a furrular Conceyu Abiertu, col ésitu discretu pero significativu de Noreña, y cuando paecía que dende’l somatu d’Andecha Astur y cola concurrencia d’otros grupos y colleutivos diben abrise les puertes, la vieya organización política vuelve a carecer un desangre seliquino pero de contino. Importantes miembros d’Andecha colen de la organización pa potenciar, con calter esclusivu, el proyeutu de Conceyu Abiertu. Eso hasta podría ser una cosa positiva. La muerte digna d’una organización pa dar col so sangre vida a otra más enantada, más fuerte y con más futuru ye una constante na historia de los movimientos políticos, por más que tea los sos episodios noxosos, cierta violencia y dalgunos vieyos collacios queden nel camín. Por embargo, la reaición de quienes permanecen n’Andecha ye la de reafirmar la necesidá de la mesma. Pesie a tóo, si dalguna posibilidá hai, ye la posición municipalista de Conceyu Abiertu, onde los nacionalistes son una parte, consideratible, pero una parte. De toles formes, veremos lo que da de sí l’asambleya del viniente 30 de xunu.
Pela so banda, dempués de dos güelpes xabaces nunes elleiciones nes que, a lo que paez, cuntaba con unos resultaos mui esperanzadores, la coalición BPA-UNA decidiera sacar p’allantre un nuevu proyeutu aglutinador: Compromisu. Consiguieran el sofitu d’un númberu significativu de persones, munches d’elles independientes, y cellebraron un conceyu nel que alcordaron un documentu programáticu. Como nel casu anterior, la fundación d’un proyeutu más ampliu y más abiertu sobro les tumbes de dos organizaciones que muerren dignamente, podría ser una bona noticia. Amás, como Conceyu Abiertu tien una vocación marcadamente municipalista y Compromisu paez tener un perfil más “clásicu”, los optimistes –ente los que siempres o cuasi siempres milité- podíen pensar que les coses igual s’igüaben de poco a poco. Pero faltaba, tamién como nel casu anterior, un últimu movimientu: IAS, disuelta na práutica n’UNA dende les anteriores elleiciones anque formalmente esistente, amosando’l so descontentu, pue que decida volver a la vida y caminar sola. De toles formes, muncho va depender, hasta’l mesmu nome de la organización, del conceyu que van cellebrar el 23 de xunu. 
Tal paez que’l nacionalismu asturianu comparte una característica que’l xeneral Prim atribuyera a los borbones: “estos nin daprenden, nin escaecen”. Toi seguru que si entrugáramos a los protagonistes más direutos d’esti texer y destexer, volveríen a desplicamos les coses nos mesmos términos y colos mesmos constructos aparentemente ideolóxicos que conocemos dende mediaos los ochenta, cuando los mayulones tiníamos venticinco años y l’ochenta por ciento de los actuales militantes entá nun taba nesti mundiu. Y, si amiyamos a lo más cuotidiano, ye mui posible qu’una docena nomes y media docena de fechos apaezan na mesa embaxo los mesmos criterios de mediaos los ochenta ya entamos de los noventa.
Ya asina nun podemos siguir. Ye necesario saber superar los agravios, unos reales ya otros supuestos, pa dexar que’l mal caltrie ensin dexar sangre, que la firía sane ensin criar, dexar de ser como los borbones de Prim: nun somos quien a escaecer pero nun somos capaces de daprender nada. Escribiera Herman Hesse en “Demian” que “si odies a dalguién, tas aborreciendo n’elli daqué que ye parte de tigo mesmo, porque lo que nun ye parte de nós mesmos nun mos produz esi sentimientu”. 
Nel fondu, pal mio caletre, una razón fundamental que desplica esti desastre ye la opinión perestendía, dominante munches vegaes nel nuesu nacionalismu, de que la custión identitaria yera un perendengue del esquierdismu. Munchos más de lo que fora pertinente atalantaben la custión nacional como secundaria, un emperexilamientu, una moda nel pensamientu progresista. Eso fixo que’l movimientu amosare debilidá dende l’entamu, porque tenía nesi “progresismu bablefalante” el pegoyu podre incapaz de socalliviar una percepción realista de les coses ya una aición política consecuente.
La realidá, testerona como ella sola, dizmos, cenciellamente, que nun hai sitiu pa un partíu nacionalista clásicu n’Asturies d’anguaño. Podemos velo como queramos: la estructura social asturiana nun permite que los ciudadanos pescancien la necesidá d’una reconstrucción nacional o la incapacidá del nacionalismu nun fae posible entender a los ciudadanos. Yo soi de la segunda opinión. El nacionalismu tien muncho que repensar pero, nun primer llugar, pescanciar qu’abandonó la realidá, que ta fuera d’ella, que ta alloñáu de les dinámiques sociales, que la xente nun lo entiende. Pero nun hai facelo al estilu de González o d’Anguita, que cargaben contra los ciudadanos porque éstos yeren poco menos que fatos, sinon al revés, tomando conciencia de qu’hai baxar al mundiu real, que ye onde se ganen les guerres, non na imaxinación nin, muncho menos, nel chigre con cuatro collacios ente los que retroalimentar les falses visiones.
Por embargo, sí hai custiones que mos permiten ver el futru con dalgún optimismu, igual porque yo, pesie a tóo, sigo calteniendo la esperanza. Hai una máxima, un aforismu si paez meyor, mui emplegáu ente los ecoloxistes ya ente determinaes escueles antropolóxiques: la capacidá del home pa destruyir puede compensase cola capacidá de la humanidá pa reconstruyir. Llevándolo a un cachín pequeñu de la humanidá que güei llamamos Asturies, podríamos dicir que la capacidá d’un nacionalista pa destruyir compénsase cola capacidá de la nación pa reconstruyir. Con esto refiérome a dalgo cenciello: la reconocencia de lo asturiano ye creciente en cuasi tolos espacios, sacantes el políticu. La sociedá civil d’esti país ye escosa porque equí tóo ta politizao nel peor sentíu del términu, pero ye mui activa. Ya ye la sociedá la qu’estructura les naciones, non los partíos políticos nin les cátedres de filoloxía. Son les asociaciones que más se “politizaron” les que cayeran de picu en cota, entamando pola cuantayaque activísima Xunta Pola Defensa de la Llingua Asturiana o por determinaes xuntes d’escritores, dexando un vacíu que ta tardando en llenase. Pero ehí tenemos L’Arribada, Belenos, Ensame Sidreru, Iniciativa pol Asturianu, Conceyu d’Estudios Asturianos, Xuristes pol Asturianu, asina como cientos d’iniciatives asturianes n’ateneos, asociaciones de vecinos, fundaciones, cases de cultura ya un llargu etcétera per tol nuesu tarrentoriu.
Y agora, ¿qué facer?. La verdá, nun sé mui bien que ye lo qu’hai facer, pero sí que daprendiera dalgo que me separa de los borbones de Prim: nun podemos siguir faciendo lo mesmo. La salida collectiva nun esiste y les coses van dir decantando individualmente. Esto va traer atragantones personales porque’l sentimientu de pertenencia nos grupos pequeños ye mui potente, pero val más aguiyar al caballu y saltar el rigu que non andar p’atrás y p’alantre buscando un sitiu pa pasar a vayu, porque nesti calce nun hai llugar talu. Ye necesario camudar los plantegamientos y damos cuenta d’aú tamos. Camudar nun significa necesariamente arrenunciar a les nueses convicciones más fonderes, nin a la nuesa forma de ver el mundiu, nin a les nueses formes de pensar. Como escribiera nuna ocasión el mio gran amigu González-Quevedo, camudar, pola cueta, “en dellos casos significa resistir y desaniciar dellos complexos d’inferioridá y ciertu espíritu de perdedor”.
Nun hai espaciu pal nacionalismu tal y como lu quiximos construyir. Siguir emperraos n’edificar una torre colos cimientos de sable nun ye utópico, sinon, dafechamente, quimérico. Quédamos el trabayu na sociedá civil y, como yá escribiera notra ocasión, tamién hai opciones polítiques nes que poder trabayar nel ámbitu asturianu. Taríamos delantre de dalgo asemeyao a lo que los vieyos trosquistes llamaron “entrismu”, pero con una diferencia: nun tamos escontra una toma’l poder secreta dende dientro sinon escontra una reflexón fecha en voz alta y sometía al alderique. 
En definitiva, paezme que la opción partidista como la quiximos facer dende les dómines del CNA ta muerta. Nun creyo que modelos como BPA, UNA, IAS o AA seyan a llevantar cabeza y paezme qu’esta conclusión ta perespardía pente los nacionalistes de toles banderes. Hai quien ve una posibilidá n’Izquierda Unida. Que dé’l pasu. Ha quien lo ve en FAC. Que faiga lo propio. Hai tamién quien apostará pol municipalismu de base de Conceyu Abiertu. Qu’apueste. Y hai quien dedicará los sos esfuercios al trabayu nel somatu de la sociedá civil. Que lo faiga. Pero, si caltenemos tóos la base incuestionable del nuesu ideariu, que nun ye otru que la identidá nacional, podremos siguir llamándomos collacios. Porque, valga la redundancia, ye la identidá lo que mos identifica, mientres que’l restu de los rasgos ideolóxicos podemos alcontralos en munchos otros sitios.

15 comentarios:

  1. Fae falta xente nuevo con sabor nuevo que refaiga toles mecigayes necionalistes-asturianistes. Tendría d'entamáse con una refundación na que nun entraren los d'enantes, la xente yá tamos un migayín fartos. Somos nacionalistes pero non babayos.

    ResponderEliminar
  2. ¿Sabor nuevu? Nun quiero comer la moral a naide, pero si eso que salió ye sabor nuevu que venga Dios y lo vea. Aparte d'eso, sacante delles persones que nun conozo, a bien d'elles sí, y que naide s'ofienda, pero ye pensamientu flopy-flopy, d'eso que tanto abonda nel asturianismu.

    Mirai, cuando una organización política tien un bon posu, bien asentáu, con capacidá d'analís, con cadarmes bien afitaes, con un posu de trabayu y de discutiniu, etc, etc, poles razones que seya la estructura organizativa puede colapsar y facer necesariu otru tipu de funcionamientu más "relaxáu", menos xerarquizáu. Pero pa qu'eso pite primero tien qu'haber una digamos "cultura interna" de la organización, una cultura del trabayu militante, del esfuerciu, etc. Eso nun esiste falando en llinies xenerales nel conglomeráu Bloque-UNA, agora Compromisu. Daivos cuenta: anúnciense 300 inscritos pal congresu fundacional (o más bien "refundacional"), acuden ochenta y picu, y con derechu a votu 60. Lo primero qu'eso indica ye qu'ente les 200 persones hebio unes cuantes que lo que queríen yera chisbar. Y tovía hai quien afirma qu'hai bas social. Al meyor ye que primero tenemos qu'esclariar qué entendemos por bas social. ¿El posible segmentu de población asturiano que nun momentu dáu podría votar "asturianismu"? Porque pa mi eso nun ye bas social, ye otra cosa. Siéntolo muncho, munchísimo, pero d'esto nun va salir nada. Llevo munchu tiempu faciendo predicciones negatives y cuasi siempres acertando. Supongo qu'a muncha xente yá-y federá tantu negativismu. Pero como dicía un, un optimista ye un imbécil contentu y un pesimista un imbécil triste. Nun se trata d'optimismu nin pesimismu, trátase de conocer los datos y de tener la capacidá de, analizándolos, sacar les conclusiones que correspuenden. Pa muncha xente del mundín asturianista o falten los datos, o falta la capacidá, o les dos coses al tiempu. Por eso lleguen les trompaes una detrás d'otra. Agora mesmo les circunstancies oxetives a quien ponen a la mano una recomposición organizativa ye a los de Mario Arbesú (Darréu/Conceyu Abiertu), precisamente porque les sos posiciones ideolóxiques y la cultura del esfuerciu militante son les que meyor concasen cola xera del momentu, cola crisis social y económica. Pero pa qu'eso fuere posible tendríen que camudar los métodos de trabayu y adoptar otros que nun ye que-yos seyan ayenos a ellos, sinon al asturianismu/nacionalismu en xeneral. Quién sabe, igual les circunstancies terminen obligando a adoptar esos mesmos métodos nuevos/clásicos, pero claro, nesi casu a remolques de lo que pase, ensin capacidá d'adelantase a los acontecimientos.

    Saludos.

    ResponderEliminar
  3. Anda... Un analista políticu asturianista que nun cae nel conformismu indulxente nin na faltosada cainita, y qu'amás nun fala dende nenguna superioridá moral. Qué cosa más rara. Les mios felicitaciones por ser asina y pol análisis, que me parez fríu y acertáu.

    ResponderEliminar
  4. Al segundu anónimu, namás aclara-y que s'acreditaron más de 80 persones con votu. Los que te falten dende los 60 son les astenciones nes votaciones.
    Ya se que nun cambia'l to análisis, pero bueno, por dar el datu real.

    ResponderEliminar
  5. Tanto nel artículu de David como nel análisis que fae'l comentarista anónimu, hai munchos puntos interesantes d'esos que nun ye vezu discutir entre los "políticos de nós" y que daríen munchu xuegu al rodiu d'una mesa nun café. Por exemplu, ¿qué pasa nos partidos qu'apaecen cuando los afoguinos d'un líder o d'un fechu puntual arrastren los afoguinos d'un númberu de persones? Fidelidá nulo. Nun hai infraestructura, nun hai idegues, nun hai cohesión interna -"demasiado corazón, demasiado corazón..." (nel meyor de los casos, nun voi dicir "a ver si a ríu revueltu..."- y en más o menos tiempu ¡pluf!, a tomar vientos. Nin URAS, nin Foro, nin...
    Y hai munchos más filos pa siguir.

    ResponderEliminar
  6. Soi l'analista de más enriba. Acabo lleer una ampliación de lo que comentaba perriba David cincante a IAS, una entrevista a Faustino Zapico n'Asturies.com onde confirma la marcha de tala organización de la UNA, sacante la xente de Xixón. Esto polo que se ve decidiéronlo'l pasáu 19 de mayu y pautaron nun asoleyalo hasta dempués del congresu fundacional de Compromisu. Ye igual, la diferencia ye menor. Na mio opinión, la sensación causada ye pésima. Con estes coses nun sabe ún si rir o llorar. ¿Quién puede creyer agora nada de Compromisu? ¿Daquién puede tomar en serio al asturianismu/nacionalismu en xeneral? Porque nun hai hosties físiques, pero esto paez IX. Agora yá tenemos IU, un PCA y hasta un Francisco de Asís. Y pa encima nun dexa de tener razón en delles coses de les que diz. La cuestión ye, ¿pero ye que nun ye posible conxugar toles postures nun mesmu marcu organizativu? ¿Tan mal andamos de mecanismos de discutiniu y de democracia interna?

    www.asturies.com/entrevistes/zapico-%E2%80%9Cye-mui-dif%C3%ADcil-acumular-fuercies-no-eleutoral-cuando-l%E2%80%99asturianismu-ta-reculando

    ResponderEliminar
  7. Y nun termina ehí la cosa: MAS Corvera en xunto con Compromisu por Avilés tamién se descolgaron del trixésimu "nuevu y ilusionante proyeutu". Volvemos a venti años p'atrás. De verdá, esto paez el día de la marmota, el túnel del tiempu, l'etenru retornu o daqué asina.

    ResponderEliminar
  8. Tien razón l'anterior anónimu. Entós esto ye la hestoria nel negativu de la película y hai munchos datos que se m'escapen y voi al aniciu (son los mios interrogantes, dende llueu): ¿nun foi posible un debate internu n'AA de los años la Nana ente "bonos y malos" (vamos llamalos asina)? ¿Nun foi posible un alcuerdu ideolóxicu y d'estratexies de trabayu d'IAS (o d'esti sector que paez el "duru", el de Faustino, por da-y un nome cualisquier)cola xente afín, fore indeopendiente, fore de la transitoria AN o fore de les sos mocedaes, nel aniciu de la coalición UNIDÁ? Vamos, esto paez la perda de Granada pela parte de toos.Agora tenemos una "AA" residual, un CA de madurez xerondiego, un CpA 1 y 2 (Compromisu por Asturies y Compromisu por Avilés),un Foru asturianizante, una IAS, un ESA (o dalgo asina), residuales del PAs, d'URAS... etc., etc. ¿De verdá daquién pue fiase d'esto que paez un xuegu de guah.es enfurruñaos entre ellos? Menos mal que les cais del país son un remanse de paz.

    ResponderEliminar
  9. Entrevista n'Asturies.com a Yolanda Huergo, perteneciente a la nueva Executiva de Compromisu y escoyía vocera de la formación:

    -¿Comprendióse n’UNA la postura d’esti sector de militantes d’IAS?

    Nun se xulgó. Ye una decisión de la que s'informó a la xente d'UNA que nun yera d'IAS, y asumióse ensin más.

    "Asumióse ensin más". ¿Ensin más? ¿Nin fríu nin calor? ¿Nun hai que facer dalgún tipu de ponderación de la importancia del fechu, de si ye bono o malo, de les consecuencies de puertes adientro y de puertes afuera, de si refuerza o debilita la nueva organización y el movimientu en xeneral, de les consecuencies de cara a la xente simpatizante que tá prósima pero fuera y a la qu'en teoría quedríen atrayer? ¿De verdá nun pasa ná? Asina ye fácil albidrar meyor estes palabres de Zapico:

    "Como depués de les eleiciones en cuenta d’haber una reflexón autocrítica sobre qué ye lo que se fixo mal o qué ye lo que se dexó de facer, diose una fuxida p’alantre –en gran midida por mieu a reconocer el fracasu– que ye resultáu d’una política equivocada dende va tiempu".

    ResponderEliminar
  10. Nun conocía la entrevista de Yolanda Huergo, pero nesa rimpuesta queda bien sopelexao lo probe del pensamientu nacionalista. Y nun creyo que seya culpia particular d'ella, sinon d'una miopía que se vien arrastrando dende van años. Ye cosa rara y mui significativa que'l discursu de finales de los setenta ya entamos de los ochenta yera más coherente que'l de trenta años más sero.

    ResponderEliminar
  11. Siempre coles mesmes rimpuestes de fuxida p'alantre, de parte d'unos y d'otros, ensin ser capaces de construyir una solución reposada y abierta. Tolos que tuvieron y tienen responsabilidaes nes organizaciones deberíen enconsonar d'esos protagonismos antepuestos a la reconstrucción d'Asturies, ¡cuántu mal fixeron! Toi d'alcuerdu col fechu de que caún tome'l so propiu camín porque los caminos anteriores yá tán escosaos y, anguaño, nun sirven como opción política. Pero hai dalgo que me paez claro y ye que si esa vía morrió, la situación identitaria del país ye más delicada que nunca y si nun somos atopar los calces adecuaos de trabayu xunitariu, el país como lu entendemos ya imaxinamos tamién va morrer bien ceo.

    ResponderEliminar
  12. Bueno, equí teneis la posición d'IAS un pocu más desplicada, nel blog de Faustino Zapico:

    http://faustinozapico.com/blogue/sobre-la-nueva-etapa-dizquierda-asturiana/

    Cuando lo tengais lleío comentámoslo.

    ResponderEliminar
  13. Esto quizá les pueda interesar.

    http://www.jornada.unam.mx/2012/07/16/index.php?section=mundo&article=030e1mun

    ResponderEliminar
  14. fAUStinín yá andaba muncho colos cuberos, los n´asts, los conceyu abiertus...Ye propiu d´un PCPE con bable y tamboriteru. Van a nenyure.

    ResponderEliminar
  15. L'últimu comentariu ye'l típicu del que nun afonda sinon que solo amuesa les rocees personales o polítiques. Vamos ver, "Faustinín" y IAS van a nenyures. Nun lo sé, yo polo menos nun lo sé si van o nun van a lláu dengún. Nun me paez como muncho nun cambien, porque nin hai tradiciones organizatives o partidaries de tal xeitu, nin ye ésa la reputación personal de Faustino Zapico, pero non polos plantegamientos en sigo mesmos, sinon probablemente pola posible falta de coherencia na so puesta en práutica.

    Agora bien, gustábame saber a ónde van otros, porque lo que ye Compromisu nun sé yo. De momentu, como tolos años, parón veraniegu. Hasta'l 8 de Setiembre, supongo, como siempres. Y asina y too yá hai indicios de continuar la mesma dinámica de comunicaos ensin más. Pues si eso ye dir a dalgún sitiu yá me direis. ¿Cuál ye'l ballance de la catástrofe eleutoral? "Nun supimos visibilizanos", "nun supimos tresmitir el mensaxe". Otra vuelta, como siempres, más de lo mesmo. ¿Qué intenciones tien Compromisu, qué orientación de trabayu, qué oxetivos? Silenciu. Como siempres. ¿Hai dalgún proyeutu de cómo enanchar la bas social del asturianismu/nacionalismu, forma de conseguir movilizar a la población asturiano en defensa de los sos intereses, hasta y conxuntamente que lleguen les prósimes eleiciones y meyoren hipotéticamente los resultaos? Nothing, niente, rien de rien, pas du tout. Como siempres. Y francamente, ye que nun puede haber nada de too eso, nun dan pa más, nin no teórico nin nes enerxíes puestes en marcha. Demasiaos escritores, demasiaos poetes, demasiaos "plácidos". Eso ye la composición de bona parte del "asturianismu": "bonrollismu", "cachupanismu", "bonpaisanismu", "quéhaicollacismu". El pensamientu flopy-flopy de más enriba, vaya. A los de Faustino quiciabes sí que-yos dean les meninxes pa lo teórico. El problema ye otru, que ye si van poner esfuerciu nello y cuánta xente realmente son. Esto qu'acabo de facer yo ye un intentu d'análisis, non colgar etiquetines tontoroles en pro de simpatíes y antipatíes personales, y al que-y lo paeza tengo argumentos y datos a magüeyu pa defender lo que digo, porque toi equí y non na Mancha.

    ResponderEliminar

Nota: solo los miembros de este blog pueden publicar comentarios.