Dempués de la investidura


Yá pasara una selmana dende’l debate d’investidura d’Álvarez-Cascos, tenemos gobiernu ya unos cuantos viceconseyeros y conocemos les reacciones de los principales grupos políticos y sociales d’Asturies.

Pa entamar voi dicir qu’esta ye la primer vegada que tuvi interés pol debate d’investidura. De fechu, siguiéralu per televisión y per radio, alternando, cosa qu’enxamás fixera dende la investidura de Pedro de Silva, que yá lloviera d’aquello. Y sé d’amigos y collacios que fixeran lo mesmo. Eso yá mos amuesa que l’alderique parllamentariu d’esti añu nun yera igual que los d’años anteriores. Per primer vegada –sacantes aquel discursu programáticu de Silva pa los que yá somos un tanto mayulones- el plenu la Xunta Xeneral tinía “morbo”.

Prestaríame dar cuatro pincelaes sobro lo que me paeció’l discutiniu y sobro dos o tres coses concretes que na Xunta falaran. Paezme, pa entamar, que la talla política d’Álvarez-Cascos obligaba a los demás a xubir el tonu les sos intervenciones, planes y retóriques dende siempres, pero namás que la esquierda fora a ello. La intervención d’Isabel Pérez Espinosa fora llamentable nel fondu y na forma, llegando a echar en cara’l candidatu’l fechu de que copiara dellos puntos del programa’l Partido Popular. Pérez Espinosa convirtió lo que podía ser una delda d’Álvarez-Cascos pa col PP nuna criminalización del programa’l mesmu PP. Hebo momentos nes que paecía –nun quiero que se tome esto como “tic” machista- una novia abandonada. Pela so banda, Álvarez Sostres, abondo atropielláu, fixo de “poli malu” –igual tienen repartíos los roles pente elli y Cascos- y paez que va ser “el Guerra” d’Asturies. La so intervención yera más propia de la nueche’l sábadu nel chigre la mio collación que d’un parllamentu.

Javier Fernández, al que poco tinía sentío, paeciérame home capaz, de bona dialéctica y al qu’hai qu’agradecé-y que fale ensin papelos. Nun ye que seya un gran orador pero sí que tien un efectivu tonu convincente. Y, reconozo que pa la mio sospresa, fora Jesús Iglesias el verdaderu contrincante d’Álvarez-Cascos. Nun cayó n’armadía que Cascos-y preparó cola so retórica, típica de la drecha tradicional, d’echar flores al grupu más a la esquierda na cámara. Entró a les dos o tres custiones nes que’l candidatu asomó’l so focicu más conservador y acertó nello. Iglesias fora, ensin duldia, el portavoz que meyor pescanció que yera la hora de midise con un políticu de raza y que la dómina del “dolce far niente” taba finada. Na mio opinión, n’Izquierda Unida puen tar contentos del papel que fixeran.

Llámame muncho l’atención –deformación profesional- cuálos foran los economistes nos que se sofitaron los intervinientes. Álvarez-Cascos sacó a la bolera a Madison y, mui especialmente, a Buchanan. Al primeru recurrió no xenérico, pa illustrar la so visión de la evolución de los sistemes económicos y defender la so repetida idega de “I+D+i”. Pero fora muncho más interesante la referencia al neolliberal Buchanan cuando faló del conceptu de “votar colos pies”. Esta ye una fras cola que Buchanan desplicaba que cuando un gobiernu aperta muncho fiscalmente los capitales tienden a marchar. Con eso quería Álvarez-Cascos dicir que con una Asturies más dura fiscalmente que Castiella y Llión, Galicia y Cantabria les empreses pueden treslladase. La teoría de Buchanan nun queda mui confirmada empíricamente pero’l casu ye que nin el PSOE nin IU entraran a ello. Otra vuelta’l PP quedó mirando pal techu. ¿Qué diba dicir si Cristóbal Montoro dixo lo mesmo que Cascos una selmana enantes?.

Pela so parte, Fernández citó a Friedman nun contestu que yo nun entendí mui bien. Dixo daqué asemeyao a que “prefería a Friedman que a Buchanan”. Igual quixo dicir que, puestos a dir de neolliberales, meyor el mayestru que’l discípulu. Y equí fora onde Izquierda Unida perdió la so gran ocasión. Iglesias citó a Krugman, un economista más críticu pero que tampoco pertenez a otra escuela que nun seya la conservadora. La única diferencia de Krugman colos otros ye que nun niega la empiria y reconoz les disfunciones del sistema, pero nun propón nada que ponga en custión al mesmu sistema. Con Cascos y Fernández enartaos con Buchanan, bien pudiere Iglesias llevantar, a lo menos, la bandera de la socialdemocracia, una bandera que’l PSOE tiró hai tiempu pa garrar la de la famosa “tercera vía” de Blair. Y nun yera mester buscar autores raros o desconocíos: con un par de cites de Keynes taba tóo resuelto.

Del discursu d’Álvarez-Cascos, un tanto soporíferu na presentación y muncho más rellumante nes repliques a los voceros, quédeme con tres coses que, tamién por deformación, téoles un pocoñín cercanes. Plantega FAC la racionalización de la sanidá pero, al empar, asegura que va caltener el calter públicu de la mesma. Esta ye, como dicíen los vieyos positivistes, una “proposición tramposa”. Nos servicios públicos ye necesario estremar pente “titularidá”, “xestión” y “prestación”. D’esta miente, la sanidá pue ser de titularidá público, esto ye, que la propietaria ye l’alministración, pero, paralelamente, la xestión pue tar cedía a una empresa privada. Del mesmu mou, siendo otra vuelta la titularidá público, nun hai torga denguna pa que la prestación seya privao. Toi seguru que nun miente Álvarez-Cascos cuando diz que la sanidá va siguir siendo público, pero ye mui probable que tea falando cenciellamente de la so titularidá. Pero la xestión y la prestación podrían pasar a ser privaes. Na Comunidá de Madrid yá se lleva faciendo esta política unos cuantos años. Yo mesmu, cuando, tando en Madrid, tuvi l’accidente d’hai poco más d’un mes, fora lleváu nuna ambulancia privada a un hospital de titularidá público con prestación privao. Ya esa sospecha de privatización de la prestación y la xestión queda resforciada cuando dicen dende’l nueu gobiernu que van aplicar criterios de “coste-beneficiu”, cuando lo que se tien d’emplegar nos servicios públicos son criterios de “coste-eficiencia”. Y nun podemos apelar a que los conceptos nun queden mui perfilaos porque, precisamente, esti gobiernu presume de ser un gobiernu de “profesionales”, esto ye, que saben mui bien qué ye lo que dicen.

La segunda nota llamativa ye la práctica supresión del impuestu sucesiones. Equí la esquierda emburria d’una forma demagóxica. La supresión d’esti impuestu ye mui razonable y non namái que polos criterios del yá mentáu Buchanan sinon por otros muncho más cenciellos. Les grandes fortunes hai años que nun s’hereden personalmente. Los ricos constituin sociedaes mercantiles. ¿Dalguién piensa que Bill Gates va pasá-y al so fíu la heredá con nome y apellíos?, ¿o Cosmen, Masaveu, etcétera, etcétera?. L’impuestu sucesiones amachuca, a lo contrario, a los campesinos y a les families que tienen un par de pisos.

Quédame la última custión de les que me llamaron l’atención nel debate: la Universidá Politécnica nel campus de Viesques. Ye una vieya idega d’Álvarez-Cascos que retomó con afoguín Carmen Moriyón, agora alcaldesa de Xixón. Nel principiu yo toi d’alcuerdo con esa idega. Ye más: yá nel 1999, encabezando entóncenes la llista d’Andecha Astur, espublicé un artículu nel que proponía una universidá d’eses calterístiques. Pero lo que me sosprendió l’otru día ye’l modelu referencial que Cascos sopelexó nel parllamentu. Pal actual presidente d’Asturies el modelu ye’l Massachusetts Institute of Technology (MIT). Eso desplica que plantegue una nuea universidá prácticamente ensin presupuestos financieros y que la propuesta la presentara amestada a la potenciación de los “cluster”. El modelu’l MIT, que conozo bien porque trabayé ellí, afítase n’aportación de capital privao. Por eso nun tien rempuesta la entruga que’l PP d’Uviéu fixo hai unos díes, custionando si esa universidá en Xixón nun diba significar una perda recursos pa la Universidá d’Uviéu. Non, seguramente non, porque’l gobiernu d’Álvarez-Cascos ta pensando nun modelu mui estremáu.

Voi terminar con una reflexón de calter políticu. Amás d’estes custiones ya otres que nun trato, Álvarez-Cascos faló d’Asturies como “país”, citó la llingua como rasgu diferencial, sofitose en Salvador de Madariaga (“Asturies quier parecese a sigo mesma”), cargó la escopeta d’asturianismu y de illustración, yaesu. Ya estes considerances foran les qu’enllenaron les páxines de los periódicos. La esquierda asturiana poco opinó sobro la universidá, l’impuestu sucesiones, la sanidá o los puertos de Xixón y d’Avilés. El problema yera otru: un presidente poco menos que “separatista”.

Luis M. Alonso, un home atrabiliariu a lo que paez, escribe esto en “La Nueva España”: “un país, una lengua, componen la inquietante ecuación que ya conocemos. No hay que referirse a ningún ejemplo en concreto porque lo tenemos al alcance de nuestro entendimiento, todas las horas y toos los días”. ¡Acoyonante!: Álvarez-Cascos camín de la “kale borroka”. Yá lo dicíen los “sensatos y pensantes” hai trenta años: “entamen coles gramátiques y acaben coles metralletes”.

Les declaraciones de los dirixentes del PSOE y d’IU marcharon al empar: “Cascos engodóllase na bandera asturiana”. Ye posible que seya verdá, ye posible que’l presidente seya un oportunista. Too eso ye posible. Pero’l so discursu –oportunista o non- amuesa qu’hai un conflictu. La victoria de FAC amuesa la fondera esmolición de los asturianos, fartos por desobra del PP y del PSOE, esti últimu colos sos perendengues “ad hoc” asigún vengan los vientos. Y Álvarez-Cascos ta obligándolos a lo que nunca quixeron: dicir que nun tienen interés por Asturies ya, inclusive, que siempres arrenegaron d’Asturies.

Pela so banda, dempués d’esti cambéu tan xabaz, nada paez dicir el nuesu nacionalismu. Hasta Sánchez Vicente, finu elli, mexó fuera la candelexa col so “país de les cebolles y les pataques”. Namái qu’Andecha Astur fixo una valoración, enforma probe pal mio atalantar pero la única. De Conceyu Abiertu nada lleí y de BA-UNA menos entá. D’esti grupu sé que’l so principal dirixente andaba pa Gaza en misión humanitaria. Y que quede clariquino que nun lo censuro, namás que lo describo, pero yo soi de la opinión de que, dempués de lo que pasó, los que pretenden refundar el nacionalismu asturianu deben tar n’Asturies. Ya ye qu’un vuelcu políticu como esti y que tien una clave asturiana –preste o nun preste Álvarez-Cascos- debería atendese con procuru. Eso pienso, quitando que teamos na idega de qu’estes ellecciones certificaron la defunción del nacionalismu asturianu. Pero, en fin, como yá lo escribiera Xuan: “spiritus ubi vult spirat”.
Imprimir

Comentarios

  1. Nun me presta esi calter del asturianismu qu'esapaez sacantes les elecciones, como si entremedies nun tuviéremos más que cuntar.

    Y más nestos tiempos nos que ye tan fácil llegar al mundiu coneutao al travies de la rede. Nun digo que namái esi seya'l camín (ya vimos los resultaos eleutorales del PAS demientres que la presencia de Xuan Xosé ye abonda na rede), pero nun tenemos el vezu de cuidar a la base. Y llueu, pasa lo que pasa.

    Si la xente nun apercibe daqué de seriedá, de bona organización, de xente clara ya profesional que llucha polo nueso, va siguir votando opciones asitiaes o nueves con cabezaleros asitiaos. Nadie sabe (pamique nin siquiera ellos) qué va facer FAC, pero tienen a Cascos, que ye perconocíu y "ye'l que fizo toles carreteres d'Asturies (fasta la del mio pueblu).

    El problema ye que naidie conoz a Rafa Palacios o Yolanda Huergo y pa encima al primeru véndenlo na prensa poco menos qu'un perroflauta antisistema (como si eso fora malo) y la segunda direutamente nin apaez.

    Hai que facer l'esfuerzu de llegar a la xente, y nun somos a pescanciar el potencial que tien la rede pa ellos, quiciabes seya porque vivo d'ello, pero pamique, agora mesmu, ye'l camín pa entamar.

    Sobre'l to artículu, lo de la sanidá yera d'esperar, lo de la universidá ya me paez pasase de vueltes. Hayla, con cada vegada menos alumnos y más cara y pa encima queremos montar otra privada pa los ricos.

    Sorpréndeme lo de Jesus Iglesias, porque paezme de lo más negao de la política asturiana, nun me presta na de tolo que lleo o escucho d'él. Pamique deben tar dándose cabezazos pola fuxida de Valledor.

    ResponderEliminar
  2. Tienes muncha razón, Dixebra. ¿Qué me vas cuntar, dempués d'ocho años de cabeza llista y nun algamar más de tres o cuatro mil votos en les meyores?. Nun conseguimos dexar de lláu unes práctiques que se vieron tantes vegaes que nun yeran válides. Tamién ye verdá lo de los medios de comunicación, que mos traten mui mal. Por eso ye seguro qu'hai de recurrir a medios alternativos, pero tampoco ye fácile. Pero en cuanto al comentariu sobre Rafa Palacios, yo matizaríalu. Nun conozo muncho a Palacios y tampoco trabayé en nada con elli o a la contra pero la imax que proyecta ye la que recueyen los medios. Ye complicao tener un perfile públicu nacionalista mientres toles noticies son d'otru calter. En Les Noticies últimu tien una entrevista d'una páxina y un artículu escritu por elli mesmu. Tando d'alcuerdo básicamente colo que diz, estráñame que nun faiga nin una referencia a Asturies y a la so situación. Y trátase de la opinión del cabezaleru de la llista asturianista más votada y a tres días dempués de la formación del gobiernu de Cascos. A mi paezme bien que trabaye no que-y pete, elli y cualisquier, y paez evidente que ta más identificáu coles causes internacionales. Y lo de Jesús Iglesias tamién me sosprendió muncho a min.

    ResponderEliminar
  3. Lo d'aquellos años qu'asocedió al asturianismu da pa muncho (ainda espero'l to llibru sobre ello que tamién tendrás de firmar), pero hai muncho d'inorancia ya desinterés d'una sociedá onde les coses, polo menos, nun diben tan mal.

    Porque, si nun ye por eso, y pol menospreciu de los medios, claro ta, nun atopo cómo un cabezaleru tan valoratible, con presencia serio y afayaiza y con un curriculu tan enllenu, nun algamara más votos si nun fora pola inyección de perres de los fondos mineros y les prexubilaciones.

    Quiciabes el problema ye'l mesmu d'entoncenes: publicidá. Y nun saber tresmitir meyor el mensaxe. Asina, xugando al alderique, podríemos tomar les caberes acciones de Rafa Palacios como un camín pa dar a conocer "otra Asturies", pero non, toi d'alcuerdu contigo, lo que podría ser un actu d'asturianismu comprometio, con guiñu al 15-M inclusive convirtiose no que tú fales. Al final va ser ciertu qu'el "partíu alternativu ye UPyD" hehe.

    Como nun quiero centralo too en Rafa Palacios (tamién ye valoratible nun saber nada de Yolanda Huergo), nin en Jesús Iglesias, a mí Cascos tienem mui desconcertao. Fríamente, ún piensa que de los 3 partíos posibles, meyor será que gobierne ún que nun depende de Madrid, por otru llau, tamos falando d'un ultraderechista neolliberal convenciu pero'l so discursu, ya inclusive'l so discurso dempués de ganar les elleiciones (onde ya nun tien que "vendese") ye de, polo menos, facer daqué distintu. Y eso ye dalgo que nun pasaba n'Asturies dende ... ¿Sergio Marques?

    ResponderEliminar
  4. Yo tamién me paez que l'ecu d'esti cambiu de gobiernu en seutores asturianistes/nacionalistes (formaciones polítiques a parte) foi escasu. Mesmamente na rede en poques bitácores y muros de redes sociales se trató'l tema. Tal paez qu'esa acusación que dende cuantayá peñera sobre l'asturianismu/nacionalismu acusándolu de vivir ayenu a l'auténtica realidá social y política del país tuviere la so bona parte de razón. Claro que pudiere ser una simple coincidencia col aniciu de les vacaciones veraniegues y la consiguiente desbandada. Pero nun me quiero autoengañar y paezme qu'esi nun ye'l verdaderu motivu. En fin...
    Un saludu candial.

    ResponderEliminar
  5. el casu ye que tamos, como tuvimos siempres, emperraos en enseñar a la xente lo que mas un tipu de politica (radical a fartar en delles coses) que ta visto que la xente nun quier.
    Con tol respetu, esi perfil "internacionalista" de Palacios tien todo de malo; nin presta a la xente por muy muy minoritariu, nin a los nacionalistes por poco asturiano. Ye bien dificile asitiase tan mal politicamente.
    Xuan tampoco entendio cuando-y llegó`l momentu de garrar otru papel.

    amas, pa decir verda, somos refuxu d`unes cuantes opciones politique que nun s´atreven a furrular ensin mazcara.

    y pa mas bemoles cada añu tamos mas separtaos ente nos.

    BERTO

    ResponderEliminar
  6. Amás dello digo, con tristura de ventimunchos años de nacionalismu non precisamete de dreches (anque pa los de siempre si lo pareca), que toi mas ilusionáu que nos caberos 15 años. Y con cascos quien me lo diba decir...
    berto

    ResponderEliminar
  7. Da gusto leer estas reflexiones, creía que no leería ninguna interpretación inteligente de el terremoto que asoló la política asturiana el 22M.
    Lamento decir que escuché el discurso de investidura y que me encantó la melodía; sólo dos o tres notas algo disonantes pero una sorpresa en la ejecución. Me doy cuenta de que me gustó y cautivó la obra, pues desde que escuché la actuación no volví a escuchar la música nacional que tanto nos bombardea en todos los medios a todas horas.
    Sólo una pregunta: ¿Cuánto creeis que durará el concierto?

    ResponderEliminar
  8. El conciertu durará hasta que privaticen la sanidá a la madrilana, o faigan una universidá privada (ta baxando l'alumnao de la pública porque cada vegada ye más cara y tien poca salida profesional, y vamos ponenos agora a facer una privada direutamente pa qu'estudien los ricos, vamos, tornar a lo d'enantes), o privaticen tolo privatizable ...

    Entós, los que dicen que son d'izquierdes esbabayarán col "ya vos lo cunté", la drecha'l PP tará, como siempres, descolocada ya espectante, y nós, empalmaos porque Cascos dixo un par de vegaes país y que diba "fomentar" l'asturianu demientres, una vegada más, nos la calquen per detrás.

    Pd: pa los del "y tú más": sí, sí, tamos d'alcuerdu, el PSOE vien faciendo más de lo mesmu. Nun voi ser yo el que los defenda equí. Pero lo de la sanidá, paezme abondo grave y un puntín al favor del PSOE.

    ResponderEliminar
  9. Hai otra calterística nel nuesu nacionalismu que yo vengo detectando dende van años: el miéu escénicu. Voi intentar desplicalo porque esta custión pué que namás la reconozan previamente les persones más comprometíes políticamente.

    Ye mui normal que nun alderique de chigre (o tomando'l sol na playa, que siempre recurrimos al chigre) nel que participen tres o cuatro compañeros (d'Andecha, por exemplu, que ye pa min el casu que meyor conozo) lleguen a puntos de vista que más lluéu nun s'atreven a plantegar nos órganos del partíu nin, muncho menos, sacalos a la lluz pública.

    Hai un miéu irracional a que te xulguen mal, te coloquen nuna posición política que nun te presta... ¡Vaya!, que digan de ti que yes de dreches, pa entendemos.

    Llama l'atención que'l primer partíu que s'atreviera a dalgo asina fora'l PAS (enquivocáu munches vegaes pal mio tastu) y cayéra-y enriba la gafienta acusación, colocándolu nuna drecha que a mi nunca me paeció tala.

    Pero tamién llama l'atención que fora Andecha la única organización que valoró les ellecciones en clave asturiana, entendiendo nesa clave (de conflictu nacional, inconsciente munches vegaes) la victoria de Cascos. Por muuncho que los redactores forzaron la terminoloxía (la tradicional), nun evitaron una interpretación apaecía a la mía, a la del PAS y a la de Les Noticies na so reciente ya enésima versión ideolóxica.

    Pero ye qu'esti analís sobro la victoria de Cascos ye compartíu pola mayoría de los nacionalistes, pero degún d'ellos paez atrevese a dicilo. Como diz el Xanu, yá nun son solo los partíos. Ye que nes redes sociales o la
    "blogasturfera", tampoco a títulu individual naide o cuasi naide dixo nada.

    Pa finar y arrepostiando a Berto. Nesa desunión creciente que ves, que ye cierto, cuasi siempres y dende la esquierda foran los más "identitaros" y menos "clasistes" los que menos pilancos punxeran. Fueron estos los únicos qu'apostaron por la coalición más amplia posible ya inclusive aceptando cadidatos de compromisu ya oportunidá.

    ResponderEliminar
  10. Un apunte por si nun lo vierais colo que queda matizao un poco lo que diz el Xanu y corroboro yo mesmu. N'Infoasturies hai un analís interesante sobro la nuea situación d'Asturies por parte de Javier Cubero. Esti home ye de los pocos que suelen escribir ensin esmolecese pola etiqueta que-y ponga. Evidentemente, como toul qu'arriesga a opinar llibremente, enquivócase delles vegaes, pero otres munches abre caminos pal alderique previu a l'acción. Ya ye de siñalar la so mocedá, cosa importante.

    ResponderEliminar
  11. Querido David
    Leo el articulo que recomiendas en infoasturies
    para lo poco que sustancialmente dice, FAC-IU como refugio del asturianismo, el autor se envuelve en una verborrea con `pretensiones estructuro-marxistas de muy bajo nivel y que no aporta nada al tema. Para decir que hay un cambio en el referente político nacional no hace falta ser tan pedante y vacuo.
    Ítem más, si miras en los comentarios que le han puesto veras a uno, al que ademas se le insulta, que le recrimina al autor no distinguir entre país y nacion.
    Pero volviendo al tema de tu entrada el discurso de Cascos; te repito lo que te decía en otra entrada de tu blog
    Dios escribe la historia con renglones torcidos
    Quizá sea el momento de arribar a puerto, calafatear la nave y salir a la mar con nuevos vientos. de estos últimos no os (nos) van a faltar.
    Un saludin

    JM

    ResponderEliminar
  12. Tais mui serios últimamente. Yo entrúgome si la semeya que DMR pon de Cascos, en plan romería prau´armáu de bollu preñáu, ye un afalagu o una chirigota.

    ResponderEliminar
  13. Ye herencia del fartón Areces Mayor. Ehi, los dos, manu a manu.

    ResponderEliminar
  14. Yo sigo entre otres coses al BxA en les redes sociales. Y voté BA-UNA. Nes dos últimes semanes lleí una entrevista a Palacios sobre Gaza, un artículu suyu sobre la nueva izquierda internacional, la posición sobre Colombia, la denuncia de lo de Somalia, la solidaridá con Cuba y alguna cosa mas. Pero nada sobre Asturies. polo menos paez estraño.

    ResponderEliminar
  15. La gran torga sigue siendo la dixebra pente'l nacionalismu d'izquierda, daqué que mos torna a dexar nel estancadísimu debate d'au se tien qu'afayar el nacionalismu asturianu. Daqué que mos fae buscar rempuestes-soluciones fuera de casa que a lo meyor tan a la vera de nueso.
    Lo mesmo digo una burrada pero a mi prestaríame militar nun partíu nel que tuvieren dende Rafa Palacios a Mariu Arbesú y dende Faustino Zapico a David M. Rivas.

    ResponderEliminar
  16. Soi l'anónimu anterior (anónima en realidá). Nacho, a mi tamién me prestaría tar nesa organización con esa xente pero, después de munches mentires, empiezo a sospechar el porqué nun fue posible. Y el más culpable nun me paez precisamente el que lleva esti blog.

    ResponderEliminar
  17. Si fales enantes de falta d'análisis ...

    http://faustinozapico.com/blogue/muncha-xera-apuntes-sobrel-nuevu-ciclu-politicu/

    ResponderEliminar
  18. Dixebra: ¡que casualidá!. Ta claro. El llunes esti post anduvo poles cien visites, ayeri más de 250 y güei lleva setenta a estes hores. Nun me estrañaría que agora salieran análisis como setes. Que conste qu'eso ye bono pero nun ta demás decilo.

    ResponderEliminar
  19. Toi d`acuerdu en munches partes d`esti análisis.
    No que mas, en qu`espeya a les clares lo esnortiaos que tamos políticamente; poro, cuento que lo meyor ye dexar d`enfotase na construcción política, o meyor, d`un partíu políticu.

    Quédanos grande por demás, y esi empeñu fainos dar una imaxe ruina, tan ruina que m`abulta hasta dañina.

    Anguañu pa lo que tamos ye pa dir poco a poco en organizaciones y aconceyamientos en cuantes mas estayes meyor, pero faciendo cose bien feches. Mas que de cantidá ye una cosa de que tea "bien fecho". Ye la única forma q`hai de dir cambiando la imaxe que tamos dando que ye, dende`l mio puntu de vista y sin ganes de faltar a naide, tan llamentable que nun ye cosa de perdir a naide que nos tome en serio.


    Berto

    ResponderEliminar
  20. Gustome l'artículu, David. Pero prestaríame que t'estendieres nel tema de la universidá politécnica. Sé que tienes una bon desarrollu d'esa idega dende van años.

    Polo demás, lo de siempre. Lléveslos del ramal. Agora tou dios a facer los analises que lleven ensin facer dos meses. Pero seguimos esperando el de Palacios. Tará analizando'l conflictu palestinu-israelí. Mui importante, por otra parte.

    ResponderEliminar

Publicar un comentario