Sócrates o la dignidá



Non, nun voi falar del filósofu helénicu d’hai tiempu. Voi ser más proasicu y voi falar de Josè Sócrates, el primer ministru de la república portuguesa. Ye’l primer políticu d’esa Europa partidaria del estáu de bientar y agora acosada pol neocapitalismu más xabaz qu’arrenuncia a siguir al frente d’una antroxada totalitaria con cara democrática.

Dempués de la insumisión del gobiernu islandés, ñegándose a salvar a los bancos y prefiriendo sofitar a les families y a les empreses –y de pasu metiendo na cárcele a unos cuantos banqueros-, el primer ministru portugués decidiera dicir “cola mio complacencia non”. El xeitu’l socialista Sócrates fae d’esti políticu una “rara avis” nel mundiu falsariu nel que vivimos porque amosó ser un políticu honestu ya un socialista qu’entá sabe que significa la palabra “socialismu”.

A Portugal –la mio quería Portugal, onde viví de rapazucu la revolución de los claveles naquella plaza’l Rossiu- yá la tiníen condergada les axencies anglonorteamericanes d’evaluación, mientres que’l gobiernu alemán y los especuladores alemanes yá-yos cayía la babaya pensando nel filetón lusu que diben merendar. Pero los portugueses, col so primer ministru al frente, dixeron “non”. Nun tan dimpuestos los sindicatos, nin los pequeños empresarios, nin la clas media, a arrecostinar cola cris que provocaron otros, unos otros que nun tan careciendo denguna midía d’axuste y que, ¿paradóxicamente?, tan ganando güei más que cuando entamara esta depresión.

Tovía antiayeri podíamos sentir al inane Rodríguez Zapatero nel Congreso de los Diputados, ñegándose a modificar la llei hipotecaria. Cuando Ridao, d’Esquerra Republicana de Catalunya, entrugába-y una cosa clariquina, el primer ministru español desplicaba perbien la so posición. Dicía Ridao: “¿con quién ta vusté, colos bancos o cola xente?”. Y arrepostiaba’l socialista Rodríguez Zapatero: “ye que la xente tien los sos aforros y les sos perres metíos nos bancos”. Ya un pocoñín más sero la ministra Salgado dicía que lo más importante yera caltener el sistema financieru.

Pero ye que’l sistema financieru nun ta en pelligru. Con tola cris que carecemos la morosidá nos creitos hipotecarios nun llega al 2,5 por ciento. Ye’l mesmu sistema financieru el que se pon al bentestate colos sos beneficios obscenos. Porque –igual munchos nun lo saben- un beneficiu descomanáu ye un indicador de mala salú d’un sistema económicu. Y nun lo digo yo, sinon que lo dicen los más rellumantes teóricos de la economía neoclásica.

El casu ye que Sócrates dimitiera y agora quieren presentalu como un irresponsable. Pero nun lo ye, sinon tolo contrario. Ye l’últimu xeitu de dignidá de la esquierda europea, igual el caberu. Nun consintió con ser el xestor de les polítiques antisociales que van vivise en Portugal. Nun quixo ser el Rodríguez Zapatero’l socialismu portugués. Pensó, mui acertadamente, que si la política a siguir yera la neocapitalista de les grandes corporaciones, meyor que lo faiga la drecha de Cavaco. Si al socialismu y a la socialdemocracia europea-yos queda un puntín de coherencia ya un mínimu de dignidá, esi puntín ye’l del Sócrates.

Ayeri pola nueche, cuando marchaba del palaciu presidencial, bien podría’l primer ministru portugués recordar les pallabres de Pessoa: “namái na ilusión de la llibertá ye posible qu’esista la llibertá”. Pero, diendo a los más clásicos, yo diría-y a Sócrates, col potente sofitu de Camoes, “que nesse augusto gestu vos contemplo”.
Imprimir

Comentarios

  1. Lo que ufrimos dende España no ye de recibo, conxelen o baxen los sueldos a los trabayadores, quiten el sofitu a la clas trabayadora y nun paren d'enllenar el calcetu de los bancos, "nacionalizando" les deldes ya privatizando los beneficios.

    Y too col preste de los sindicatos mayoritarios y con una sociedá más acoyonada qu'amuermada.

    Dacuando fales de votar otres fuercies que nun seyan "les de siempre", dícente que pa qué, y l'alternativa agora ye UPyD o ForoASturias, ainda más a la drecha si cabe.

    Nun ye por ser pesimista, pero a vegaes ún piensa que lo meyor que nos pue pasar ye danos una bona hostia a lo griego pa ver si espabilamos y entainamos d'una vegada.

    Gracies fonderes poles tus reflexiones, como siempres, un placer.

    ResponderEliminar
  2. Interesante artículu de Vicenç Navarro

    http://www.vnavarro.org/?p=5480

    ResponderEliminar
  3. Otra reflesión que se me vien a la cabeza ye si Sócrates nun pudiere facer lo mesmo que fixeron n'Islandia, envede colar pola puerte d'atrás dexando al país al debalu.

    ResponderEliminar
  4. Dixebra: pente Islandia y Portugal hai bones diferencies en cuanto al sistema políticu y la organización social. Pero nesti casu la diferencia principal ye qu'Islandia nun ta nel sistema l'euru y nun hai d'escaecer que'l "rescate" de Grecia, d'Irlanda y de Portugal vien obligáu pa caltener la estabilidá de la moneda única.

    ResponderEliminar
  5. David: toi pensando nos tos enemigos, como esi seudónimu (que toos sabemos quien ye) que publicó en Asturbulla (que yo pensaba dalgo serio pero que ye un libelo de dalguien salíu del PCE) que yes un quintacolumnista, amigu del PP y antimarxista. ¿Qué dicen dempués de lleer los tos analises sobro la crisis económica? ¿Ye l'analis d'un home de dreches, como llegaron a dicir? ¿Hai nel nacionalismu d'esquierdes daquién más que tu? Falo d'analizar, namás que d'eso, porque xente, claro que lo hai. Sigue asina, tíu, que los que valoren les coses estímente munchu.

    ResponderEliminar
  6. Sobre l'artículu, camiento que les pallabres "dignidá" y "dimisión" nun entren na xerga política de los vividores de la cosa pública que tenemos per equí. Sobre enemigos, son tán pocos que si escribimos pa los asturianos en xeneral práuticamente dilúyense. Por eso siempre caltengo qu'hai que pensar y dirixise a los asturianos n'abierto y non a la "tribu" si queremos llegar dayures.

    ResponderEliminar
  7. Tienes razón, Xanu. Eso d'escribir "n'abierto" ye lo que, modestamente, trato de facer yo y traten de facelo otros. Camiento que somos munchos los que tamos fartucos del "ghetto". Yo siempres lo intenté anque non siempres lo consiguiera porque'l sectarismu y les idegues simplayes son situaciones cómodes que te reporten l'aplausu los tuyos y alcuéntreste como dios nuna tenada. Pero, en fin... hai de siguir.

    ResponderEliminar
  8. Con tol respetu David, pameque tas mui equivocáu cuando fales de Sócrates y del PSP como la última isquierda europea. El PSP ye'l partíu socialdemócrata européu afitáu más a la derecha (sí, el PSOE ta abondo más a la isquierda que'l PSP).

    Nun taba de más qu'echares una güeyada a les polítiques que lleva desenrollando'l PSP en Portugal dende fai años. Too eso que tamos viendo aportar equí, lleven sufriéndolo ellí fai años: privatización de la sanidá y la educación; recortes nes pensiones; disminución de les prestaciones por desemplegu; tases de paru ente la mocedá elevadísimes; ...

    ¿Ónde pienses que salieron los votos del BE? porque'l PCP mantién los sos resultaos. ¿Porqué Manuel Alegría cuasi da la sorpresa fai 4 años diendo d'independiente y quedó en nada embaxo del paragües del PSP?

    ResponderEliminar
  9. Tienes bastante razón no que dices. Igual punxe demasiao énfasis nel últimu movimientu. Mirarelo. Y agradézote la opinión y, oyi, nun fai falta que lo faigas "con respetu", hehe...

    ResponderEliminar

Publicar un comentario