10.12.10

Santa Olaya


Cuando a finales de los años setenta saquearon la cámara santa de la catedral d’Uviéu y marcharan con una espiazada cruz de la victoria, símbolu históricu d’Asturies, un diputáu socialista afamáu pola so elevada cultura, Gómez Llorente, dixo la siguiente fras: “nosotros nun entramos en coses de cruces y de cures”. Faigamos una paradina ya entruguémosmos qué ye lo que diría’l más llaicista republicanu francés si dalguién echara a un fornu fundición la cruz de Lorena.



Esti “intelectual” y socialista español, dempués de facer aseveración tala, sedría espulsáu de cualisquier círculu cultu de cualisquier país civilizáu, por muncho que quixere arrequexalo nuna disciplente agnosticidá al respective de “les coses de la ilesia”. Porque cualisquier círculu cultu de cualisquier país civilizáu pescanciaría dafechamente que taba escontra un ignorante de la historia, de la d’Asturies nesti casu. Eso yera Gómez Llorente, un perfechu ignorante, pero a una mesma vegada un home que facía risión de los sentimientos de la ciudadanía asturiano y, con ello, un enemigu d’un pueblu más que milenariu.


Los símbolos, históricos o llexendarios, son obxetos nos que se materializa la comunión identitaria d’una colectividá, dende lo más familiar o llocal a lo nacional ya inclusive mundial. Na escuaxaringada cruz de la victoria materializárase tamién la esñizada vida común de los asturianos, mientres que n’opiniones como les de Gómez Llorente quedaba sopelexáu l’abandonu qu’Asturies diba carecer nos años desiguientes, como asina fora. Y fora abandonada, particularmente, por esos socialistes que nun sabíen nada “de cruces y de cures”.


Otru de los grandes referentes de la cultura y la historia asturianes ye la figura de santa Olaya, a la que festexamos el diez d’avientu. D’Olaya sabemos polos escritos del poeta hispanorromanu Aurelio Clemente Prudencio, que naciera n’actual Calahorra (La Rioxa) nel añu 348. Elli ye’l que mos fala del martiriu d’Olaya, qu’asocederíe nel 304. Como cuando falamos d’otros santos y santes d’aquelles dómines, tamién la muerte d’Olaya ye de duldiosa historicidá. El so martiriu ye cuasi calcáu a los de santa Llucía o santa Águeda, tando tóos fechos a imitación del de santa Catalina, lo mesmo nes acusaciones que nes tortures que sofrieran. Amái, nesti casu, dase la circunstancia de que’l mesmu nome, “olaya”, tien un significáu enforma apegáu a coses que la santa fixera cuando, como ye evidente, taba viva y, polo tanto, tinía yá nome, como vamos ver dempués. Al rodiu d’esto ye chocante que nada mos fala de santa Olaya Santiago de Varazze –más conocíu como Santiago de la Voragine- nel so canónicu “Legendi di sancti vulgari storiado”, llibru escritu a mediaos del sieclu XIII y perconocíu pola so traducción popular de “La lleenda dorada”, que, con mayor precisión, sedría “La lleenda áurea”.


Cuntia la tradición cristiana qu’Olaya yera fía del senador Liberio, perteneciente polo tanto a una bona familia romana que residía en Mérida, entóncenes Emerita Augusta, na dómina del emperador Diocleciano, el que desendolcara la cabera persecución contra’l cristianismu, la décima, la más cruel y descomanada. Más d’un setenta por ciento de los que la ilesia considera “mártires” foren víctimes de Diocleciano, por más que –otra vuelta la importancia los símbolos- seyan les de Nerón les más novelaes ya escenificaes.


Yera una adolescente cuando la so belleza llamó-y l’atención al gobernador Daciano, quien con afalagos y conquiñaes trató de gociar la so virxinidá. Olaya negose ya’l gobernador recurrió entós a les menacies. Como tampoco consiguió los sos propósitos y sabeor de que yera cristiana, desixó-y que quemare inciensu al pie la estatua l’emperador. Como se negara, fora xulgada por un tribunal –drechu que tinía por ser ciudadana romana- y defendiérase de forma tala y con tanta elocuencia que los xueces nun tuvieron otru remediu masqu’absolvela. El gobernador, entóncenes, escaeciendo les mesmes lleis de Roma, mandó que l’azotaren y torturaren. Arrimáranla al fuéu pero namás que-y amburó la callezna. Como la rapaza siguía nes mesmes, ordenó que-y cortaren les mamielles y que-y les llevaren nuna bandexa. Dempués fora eviscerada y decapitada.


Pola so actuación escontra’l tribunal que la xulgara, santa Olaya fora por munchu tiempo patrona de los predicadores. De fechu, “olaya” significa “la que fala elocuentemente”, lo que apaez como un tanto sospechoso polo que a la historicidá’l rellatu cinca, como yá dixe. Pero, na nuesa tradición popular, santa Olaya ye abogada de los que carecen persecución inxusta y, mui especialmente, defensora de los drechos de los asturianos y protectora d’ Asturies. Porque si cola so decapitación acaba la haxografía martirial cristiana, cuatro sieclos más sero entamará un nuevu rellatu tradicional, dafechamente vinculáu al desendolcu de la historia asturiana.


Darréu esos rellatos tradicionales, dementres la defensa d’Europa escontra l’islam, nuna de les primeres incursiones en tierres al sur del Dueru, les tropes asturianes alcontraron n’actual Estremaúra, daquella embaxo dominiu califal, los farrapios de santa Olaya. El rei Silo I llevolos a Pravia, depositándolos na ilesia de Santianes. Unos años dempués Adefonso II ordenó’l treslláu a la nueva capital, Uviéu, asitiándolos nun llugar d’honor de la catedral y poniendo’l reinu embaxo la so advocación, titularidá que pasaba a compartir namenos que col mesmu salvador, Cristo, y con Santiago.


En 1639, ochocientos años dempués, el papa Urbano VIII declaró a santa Olaya patrona de la diócesis, la “sancta ovetensis”, qu’entóncenes espardíase –como siguiera siendo hasta finales de los sesenta’l sieclu XX, col conciliu Vaticán II- per Asturies, metada es de Llugo, metada norte de Llión y too Santander. El mapa de la arquidiócesis siguía siendo’l mesmu que’l de la monarquía asturiana adefonsina, enantes de los delirios goticistes y del hispanismu de los reis de Llión, que se dieran a sigomesmos el títulu d’”imperator”. Ya otra cosa pal analís: fora la ilesia la única institución que caltuvo la heredá de la monarquía asturiana hasta 1969. Ya una más pa esi analís: yera xustamente’l momentu nel que los socialistes y los comunistes, los que nada sabíen “de cruces y cures”, andaben peles sacristíes coles guitarres ya’l so “social-catholic-folk”.


Vamos volver a 1639. El casu ye que, escontra la decisión del papa, la rempuesta de los obispos estremeños nun se fixo esperar y reclamaron que les reliquies de la santa se devolvieran a Mérida. El episcopáu asturianu nun taba dimpuestu a ello y Roma, tan prudente, decidió que les coses quedaran como taben.


Pero ye que les reliquies diben siguir abellugaes na catedral asturiana, non namás pola presión eclesiástica, sinon porque la Xunta Xeneral, órganu supremu de gobiernu, declaró a santa Olaya patrona d’Asturies. Aquello yera un posicionamientu de los poderes políticos y civiles, sofitaos por un pueblu que saliera a la cai pa torgar que “la so olayina” marchare d’Uviéu. Santa Olaya, símbolu insepartable d’Asturies y de los sos anicios como nación, unificó a pueblu, cleru y aristocracia, los tres estamentos sociales anteriores a la revolución burguesa.


Pero entá quedaba una última aportación de la santa a la cultura asturiana. Pola mor del pleitu pente Mérida ya Uviéu poles reliquies de la mártir, convocose un certame poéticu al que podíen concurrir poetes que escribieren en cualisquiera de les cuatro llingües tiníes por “cultes”: llatín, griego, castellán y asturiano. La composición ganadora fora la presentada por Antón de Marirreguera, na que defendía el drechu d’ Uviéu a poseyer les reliquies de santa Olaya. Esa composición ye güei considerada la primer poesía n’asturiano moderno.


Dicía hai unos díes l’historiador Henry Kamer qu’España nun yera un país y desplicaba lo siguiente: “si aceutaren los mesmos ideales, la mesma bandera, el mesmu himnu, los españoles aceutaríen les sos divisiones como pasa nes families, pero España nun ye una familia”. Pero Kamer acaba afirmando qu’España nun ye un país porque los países nun se basen namás que no material, no productivo, o en tar dirixíos por una dinastía o por otra. Pa Kamer ye necesario cuntiar con “rellatos” y nun ve n’España esos rellatos. Elli ve clariquino qu’España “nun tién dengún héroe común nin dengún mitu relixosu común”.


¿Qué diría’l profesor Kamer si estudiare la historia’l reinu asturianu y analizare la importancia de santa Olaya?. Porque, como escribiera Gilbert Ryle, un mitu “nun ye un cuentu fades”, sinon “la representación de fechos pertenecientes a una categoría nos términos cuerrespondientes a otra”. Pero Ryle va más alló y na so perspectiva m’abellugo escontra los que digan que ye tontada too esto de los santos medievales nos tiempos que cuerren. Ryle terminaba diciendo qu’atarmar un mitu “nun ye negar los fechos sinon reacuriosalos.
Imprimir

35 comentarios:

  1. Siguiendo les brillantes idees de Gómez Llorente, una parte descomanada y fundamental, nun sólo del arte asturianu, sinón del mundial (arquitectura, pintura, escultura, orfebrería...) podríen tirase a la basura polos sos raigaños nel cristianismu.
    Pero esti pensamientu nun ye sólo d'unos pocos, sinón d'una gran lexón d'incultos dafechu y ehí ta'l peligru. Hai munchos perende con esa manera de ver la historia, l'arte y la cultura, y nun sólo lo relixoso. Recuerdo hai años a un padre poniendo pingando al fíu por llevalu a ver el castru cilúrnigu de la Campa Torres. Encamentába-y el proxenitor que les perres ellí emplegaes taben meyor en viviendes pa la xente. Y yá sabemos a ónde lleva esi pensamientu: al tristemente famosu escándalu de les milenta pieces abandonaes nun mechinal del llugar. Otramiente,la xuntanza ente'l poema premiáu de Marirreguera ya'l personaxe históricu de Santa Olaya tien una prestancia especial: xune llingüa ya historia llariegues. A lo meyor, el treslláu de la sede de l'Academia al conventu tamién históricu de les pelayes ye un badagüeyu de meyores tiempos... Siempre fui mui de dar el turre col tema de la importancia de la historia pal afitamientu de la conciencia nacional d'un país. Cuando la historia asturiana seya conocida a fondo pola xente'l país, va ser difícil que sigamos empozaos nel desdexamientu actual y que la xermandía de los gomezllorentes de turnu seyan los que lleven de contino los destinos de nuestro.
    Norabono pol artículu y un saludu.

    ResponderEliminar
  2. Lleendo coses como estes lo primero que llama l'atención ye la ignorancia na que tamos. Yo, que me tengo por una personma culta, entereme agora de dalgunes coses sobre la lleenda de santa Olaya (o historia, que tanto da). Lo de Gómez Llorente nun lo sabía y l'exemplu que pon el Xanu de lo del paisanu de la Campa Torres mete miéu. Y llueu hai "nacionalistes" qu'a lo que tienen miéu ye a la identidá. ¡Tamos como burros! ¡Probe país!

    ResponderEliminar
  3. ente Mieres y Morcín10 de diciembre de 2010, 17:38

    Mui buen artículu David.
    Una entruguina...¿Qué %, non ya d'asturianos, sinon de nacionalistes asturianos y amantes del País sabíen lo que cuenta David nesti artículu?¿un 10%? Igual soi optimista.

    ResponderEliminar
  4. Nun me tiro de los pelos pa nun quedame calvu. Que David Rivas nun contestualice la burrada del diputáu socialista nos años nos que se dixo dexa muncho de desear na argumentación que se fai. Pero bueno, ye a lo que tamos, d'una parte de la rialidá se fai una verdá y d'ehí vamos too p'allantre pese a quien pese.

    Llueu tan los palmeros del "centru" políticu, que pa que vamos falar, nun vaya ser que llevar la contraria nos convierta en parte d'esa llexón d'incultos. En fin ¿qué nos ponen na COPE güei?

    ResponderEliminar
  5. ¿Y los que son palmeros de los qu'hasta va poco fueron palmeros d'Areces y del so gobiernu del PSOE y d'IU? ¿Esos qué son? Palmeros de los palmeros del réxime...palmeros al cuadrao

    ResponderEliminar
  6. Creo que nun necesita demasiada contestualización. Robaron y esfarraparon la cruz y otres coses d'enorme valir históricu y simbólicu. Y a un diputáu por Asturies (del sector más "intelectual" daquella) entrugáro´-y la so opinión y contestó :nosotros nun entramos en coses de cruces y de cures". ¿Qué hai más que contestualizar?

    Lo que sí ye de traca ye dicir que yo (por exemplu) soi de centro o de dereches o que siento la COPE. Siguís (unos pocos sí) colo mesmo: cualisquier crítica a cualisquier posición pretendidamente de "izquierda" (pretendida casi siempre) tien que ser cosa de faches. Ya eso ye un síndrome d'un tipu d'izquierda que solo se da n'Asturies. Ya solo falta que digais que DMR y parte de los qu'entramos nesti espaciu somos del OPUS y por eso andamos de novena de Santa Olaya.

    ResponderEliminar
  7. Nun entré enantes porque nun tenía nada que decir pero ye qu'esto ya ye pesadísimo. David Rivas pon artículos básicamente de temes sociales y económicos siempre dende un puntu vista d'izquierda. La fuelga xeneral, les pensiones, el desarrollu rural, el mediu ambiente y les discuisiones suelen ser bones ensin dalgunos de vosotros. Pero como se meta cola izquierda oficial ya entrais dalgunos y quereis convertir la discusión en que Rivas ye casi d'ultradrecha y los qu'opinamos apaecío somos xentaca que sigue a la COPE. Ye una estratexa, querer identificar identidá nacional con derechismu y hasta con fascismu. Lo de dalgunos nun tien nome eso sí ye pa tirase de los pelos.

    ResponderEliminar
  8. Acérquense les dómines de les mazcaraes d'iviernu y hai comedies que van echando per delantre los sos guirrios pa ver en qué sitios van ser recibíos los actores d'una manera acrítica ya incondicional y ónde non...

    ResponderEliminar
  9. Nada nuevo, l'asturianismu y el nacionalismu nun camudaron nada nestos 30 años. Los mesmos de siempre gastando'l mesmu discursu de los Villa y Areces nos años 80 pero n'asturiano, y a veces ni eso.

    ResponderEliminar
  10. "[C]ualisquier crítica a cualisquier posición pretendidamente de "izquierda" (pretendida casi siempre) tien que ser cosa de faches. Ya eso ye un síndrome d'un tipu d'izquierda que solo se da n'Asturies". Non, fíu del alma, non. Nun solo se da n'Asturies. Dase en toes partes. Pa delles persones ser d'izquierda ye como tener na tiesta una máquina pa interpretar la realidá y, con ponela a furrular, yá ta too fecho. Ye facilísimo.

    ResponderEliminar
  11. Ye que'l fechu de que acabáramos de salir d'una dictadura nos años 70 onde la Ilesia católica foi lo que foi ye daqué que nun merez ser reseñáu pol intelectualoide asturianiegu... eso ye una caxigalina home. Qu'un ampliu sector social (del PSOE y del non-PSOE, dame lo mesmo) adopatara una posición estrema énte tolo que cincara a lo católicu nun tien sitiu pal analís, entender como evolucionó dialécticamente la postura énte la ilesia dende'l fin de la dictadura a güei ¿pa que? N'ochobre'l 34 los revolucionarios españaron la Camara Santa, na guerra pasó lo que pasó tamién n'Asturies col padremeñu eclesásticu, nos 70 el socialista esti dixo la burrada que dixo... güei la postura de cualquier persona d'izquierda con un mínimu de conciencia énte'l padremuñu ye mui diferente a la d'hai años.

    Agora dicime que defiendo el réxime y tolo que vos pete, pero na mio opinión nesti foru hai una espiral na que pasín ente pasu se ruquen de continu los pegoyos intelectuales nos que s'afita la izquierda. David Rivas fai una crítica, que comparto pero que veo deficientemente, y darréu d'ello los del centru aprevechen el requexu pal discursu COPEru: "Pero esti pensamientu nun ye sólo d'unos pocos, sinón d'una gran lexón d'incultos dafechu y ehí ta'l peligru. Hai munchos perende con esa manera de ver la historia, l'arte y la cultura, y nun sólo lo relixoso", "Y llueu hai "nacionalistes" qu'a lo que tienen miéu ye a la identidá. ¡Tamos como burros! ¡Probe país!", "Nada nuevo, l'asturianismu y el nacionalismu nun camudaron nada nestos 30 años. Los mesmos de siempre gastando'l mesmu discursu de los Villa y Areces nos años 80 pero n'asturiano, y a veces ni eso.". Y esto nesti filu, si echamos vista atrás n'otros hai milenta exemplos y más claros.

    Perdónenme por saltar a la mínima, pero unu ya conoz esta película de sobra.

    ResponderEliminar
  12. pero ¿que ye eso del discursu COPEru? y lo de qu`hai que "contestualizar la burrada"?
    Recuerdo-vos qu`entá debe tar perende`l discutiniu d`abril o mayu tocante a la bandera d`asturies, ¿Como contstualizamos eso?
    Esto ye como diciamos de nenos; "El que primero la guel ye que ...."
    Salu
    Berto

    ResponderEliminar
  13. Que sí, Don Anónimo, que sí, que los qu'entramos nesta bitácora escuchamos la Cope, vemos Intereconomía, somos del Opus y simpatizamos col Kukusclan. Hala, vete a pone-y una velina a San ZP, réza-y pola redención de les nuestres almes fascistes, y tranquiliza. Lo de que nesti foru se "ruquen de continu los pegoyos intelectuales nos que s'afita la izquierda" realmente antolóxico. Orgásmico. Total.

    ResponderEliminar
  14. DIZ: «güei la postura de cualquier persona d'izquierda con un mínimu de conciencia énte'l padremuñu ye mui diferente a la d'hai años»

    Yo creo que NUN ye mui diferente (NIN camudó sustancialmente) nel tema de la llingua, la toponimia, la cultura asturiana en xeneral .... pero tamien na parte "material": ver la situacion del arte asturianu (prerromanicu lu llamen), l'arte prehistóricu, horros, La Campa Torres... etc etc...

    Si quies pues comparalu col Niemeyer o la Llaboral o la "Semana Negra"

    ¿hai muncha diferencia cola izquierda de Gomez Llorente?

    ResponderEliminar
  15. Equí paez que pa poder opinar hay que disculpase pa empezar. Voi facelo: soi d'izquierda y hasta voté dalguna vez IU por posibilismu. ¿Tamién hai que contestualizar cuando Carrillo dixo nun mitin de Xixón qu'Asturies nun debía apostar por coses de "burgueses" como la autonomía y menos tovía por coses "arcaiques como el bable". Ye testual, añu 1977. Y eso de qu'esti foru ye lo que Anónimu diz pues vaya: namás s'abre esti debate cuando xente como vusté entra a etiquetar. El post anterior (el de les pensiones), ¿tamién ye propio de la COPE? Porque los opinantes (Xanu, Berto Meana, etc.) son los mesmos. Hai xente que se molesta con delles entraes porque, como Rivas dixo hai unes selmanes, apliquen "la dialéutica l'espeyu": si nun opinen como yo y yo soi de la izquierda guai, ellos son unos faches".

    ResponderEliminar
  16. Por cierto, pa "contestualizar": cuando Carrillo decía eses coses y Pasionaria otres como "queremos una España española", el PCE n'Euskadi defendía'l drechu a l'autodeterminación, la oficialidá l'euskera. Y en Cataluña tres cuartos de lo mesmos. ¿Yera un problema ideolóxicu o una incomprensión (polo menos) d'Asturies, cuando non odiu declarau a lo asturiano. ¿Y nun fue Gustavo Bueno l'ideólogu de la izquierda n'Asturies hasta qu'escribó un llibru ridiculizando a Zapatero (non el llagareru, non, el otru)?

    ResponderEliminar
  17. ente los que renieguen de los sos orixenes porque yos da vergoña que los relacionen col cuchu, les caleyes, les vaques ....

    Y los que consideren prioritariu salvar les ballenes, o les tribus amazóniques, o nacionalizar la banca, o acabar cola ilesia (catolica).... o defender los derechos de Palestina o Sahara

    queda pocu espaciu p'Asturies y los asturianos.

    ResponderEliminar
  18. Tampoco tinía nada que decir pero a veces obliguen. Cuando la transición yo nun taba nel mundu pero yá m'alcuerdo de la reforma l'estatutu. La xente d'IU apostó por un estatutu más ampliu y pola oficialidá pero, dempués de velo imposible, gobernó col PSOE con esi estatutu raquíticu y cola llingua como ta. Y faelo porque pa ellos nu son coses fundamentales. Lo del PSOE como siempre. Les intervenciones en defensa de lo asturiano (selo por DMR, presente nel Congresu) tuvo que faceles la portavoz del PNV. Abstuviéronse porque nunca voten contra la decisión d'un parlamentu autónomu pero lo que tuvo qu'escuchar el portavoz socialista asturianu puede consultase nel diariu de sesiones. ¡Un partíu vascu democrátacristianu defendiendo los drechos d'Asturies! ¿Taba tamién ellí la COPE?

    ResponderEliminar
  19. matizando a Vampirella.

    Del PSOE nun hai nada que dicir: foi, ye y va siguir siendo fondamente antiasturianu.

    IU (o PCE) foi tradicionalmente tan (o más) antiasturianu que'l PSOE (hai hemeroteca de sobra pa confirmalu)... hasta la llegada del PAS a la Xunta Xeneral.

    Col PAS nel parlamentu asturianu dellos analistes interpretaron que taben perdiendo votos en favor del PAS, y IU entamó una re-asturianización siendo'l cume del so asturianismu la campaña d'acosu brutal escontra'l PAS na reforma del estatutu y na aprobación de la Llei d'Usu y Promoción.

    Nun voi mencionar (pero si recordar) a toles instituciones y organizaciones y "demás" que colaboraron gustosamente en fundir al PAS.

    Una vez desapareciu'l peligru del PAS (por ser estraparlamentariu), IU dexó pa práu la tonteria esa del asturianismu y volvió rapidamente al so ser autenticu: pactar col PSOE (defender el so comederu, tratar dalguna propuesta social y escaecer tou tipu d'actuación asturianista).

    ResponderEliminar
  20. pa meter más el deu nel gueyu ... podemos recordar que la involución señalada nel últimu comentariu foi con Valledor de Conseyeru y el Bloque por Asturies na coalición gobernante.

    ResponderEliminar
  21. O les persones d'esquierda mos quitamos d'encima esi esquierdismu casposu que carecemos n'Asturies o vamos a nenyuri. Y nun ye cosa d'estratexa elleutoral. Trátase de saber onde tamos. Asturianizar a los esquierdistes de siempre nun lleva a dengún llau. Lo qu'hai que facer ye sacar a la lluz a los asturianos d'esquierda. Después ya vendrán los arreglos políticos. Pa mi, asturiana d'esquierda, ser asturiana ye dalgo natural, consustancial a la mio persona. Ser d'esquierdes ye dalgo necesario pa cambiar la sociedá pero ye daprendío, estudiao, ye un preseu pa trabayar nel día a día. Por exemplu, un asturianu anarquista puede que nun vote nin a Andecha AStur, porque ye anarquista. Pero nun dexará de compartir incluso col PAS delles coses, como que l'asturianu ye la so llingua. Porque ye asturianu. Que DMR cuente lo que pasó cola Santina cuando la guerra, que lo desplica mui bien nuno de los sos últimos llibros.

    ResponderEliminar
  22. Llevamos más d'un mes col mesmu alderique. Fale David Rivas de lo que fale (santa Olaya, pensiones, Sáhara, Cataluña, Arias) acabamos nesti debate. Eso ye señal de dalgo. Esti debate ta güei más vivu que nunca y nun ye casualidá que sea mui visible nesti blogue. L'autor ye un nacionalista d'izquierda que siempre tuvo claro lo de la identidá. Por eso ye un bon oxetivu pa los d'izquierda qu'arrenieguen de la identidá. ¿Y cómo facelo? mui fácil: presentando tolo identitario como de dereches y confundiendo a intención les coses. Puede qu'entre xente de dereches pero lo que se intenta ye descalificar al blogue en conxuntu y al so autor, l'únicu nacionalista que fala claro. Inclusive l'únicu que fala porque les callaes son les respuestes más normales. La independecncia de criteriu ye rara y ye cara.

    ResponderEliminar
  23. Perdona por nun contestate nel anterior post. Na cena paselo mui bien. Fuimos hasta La Pola, Llaviana. Como suponía naide conocía a esi Podolinski. Dixe que me lo cuntara un amigu que trabayaba con un premiu nobel alemán. Lo que suponía, quedé como Dios. Lligar nun lligué pero pagáronme les copes de después de cenar. Por cierto que la sidra yera d'un llagar de la to parroquia. A ver si sabes d'otru autor raru quey garré gustu a esto de vacilar a los economistes.

    ResponderEliminar
  24. Sedrá casualidá (o non) pero DMR tien dos fíes col nome d'una heroina revolucionaria y de la patrona de la diócesis: Aida y Olaya. ¿Síntesis nacionalista?

    ResponderEliminar
  25. De heroínes revolucionaries que muerren por causes foriates o con ideoloxíes importaes vamos sobraos nesti País. Siempre nos prestó muncho a los asturianos sacrificanos polos demás.

    ResponderEliminar
  26. Avisu pa Pozu Soton: Pidei a Rivas que te fale de Prokotnik y de xuru que te paguen la cena y lo que caiga dempués.

    ResponderEliminar
  27. nun sedrá Kropotkin manín?
    lluis

    ResponderEliminar
  28. Y demientres, nes escueles deprendemos los heroes y los llevantamientos nacionalistes d'otres naciones. Taba engarráu l'otru día con collaciu que dicía que l'asturianu, perdón, el "bable" -pa él-, nun tinía lliteratura, cuando-y cunté l'anécdota qu'apurre David sobre la primer poesía n'asturianu.

    Gracies!

    ResponderEliminar
  29. El Coleutivu Pola Xuntaza aconceya col BpA.

    Espero que’l Coleutivu Pola Xuntanza saque dalgo de provechu nesta domina. Sinceramente, la xuntanza ente’l BpA y UNA yera dalgo cantao, y que fuere cantao, nun quier dicir que nun fuere neceserario. Agora, hai de dar un pasu más, esta xuntanza ente’l BpA y UNA ye insuficiente, ye insuficiente tantu palos nacionalistes d’esquierda, comu pa los nacionalistes en xeneral.

    Hai d’algamar una xuntanza más amplia. Si ye posible, una xuntaza de TOLOS nacionalistes. Pero, polo que se ve, el PAS nun ta por elli, y quedará fuera, pola so propia decisión de dir a les elleiciones col URAS. Agora hai de puxar, ya que’l Pas nun-y peta dir per esti camín, hai de puxar pola xuntanza del nacionalismu d’esquierda. Xuntanza ente’l BpA-UNA-AA.

    Ye un pasu, camiento qu’insufientem pero ye un pasu alantre, un pasu alantre qu’hai annos que nun se da nel nacionalismu asturianu. A ver si miramos p’alantre, pal futuru d’Asturies, de la nuesa nnación.

    ResponderEliminar
  30. Gracies Lluis, efectivamente me refería a
    Пётр Алексеевич Кропоткин

    ResponderEliminar
  31. Mui bono lo tuyo Jacopo Comin. Esti blogue mantién polo menos un ciertu sentíu l'humor. Nin Kropotkin nin Protoknit, les coses como son, en rusu.

    Pero lo que quiero comentar ye qu'estes coses, estos debates ye lo qu'anima a la xente. Poder sentise orgullosos de ser asturianos con los nuestros defectos tamién, falemos de la monarquía de los mitos o de les revoluciones. Paezme mal que se disculpe una patochada como la d'esi duptau porque la ilesia yera franquista, pero tamién me paez mal despachar a Aida como una defensora de causes foriates. Yo nun se muncho la verdá, pero lo suficiente como pa tar orgullosu de Pelayo, de Xovellanos, tamién d'Aida. Son la nuestra historia la historia que nos fae ser distintos a otros pueblos. Sin esa xente y otra, anónima tamién, esto sería Segovia, Cochabamba o Polinesia.

    ResponderEliminar
  32. Yo lo que NUN veo ye ¿por qué ye más positivu BpA+UNA+Valledor qu'URAS-PAS? (dicho dende una perspectiva Asturies/España, non dende Izquierda/Derecha)

    Dende un puntu de vista "patrioticu" la comparanza UNA-PAS (quitando los prexuicios izq/dcha) ¿quien lleva'l puntu?

    Y la otra parte ye paeciu, si la URAS "ye lo que ye", los otros gobernando DOS llexislatures col PSOE punxieronse mui cerca ¿esti otru puntu a quien lu damos?

    ResponderEliminar
  33. Nesti momentu, y como siempre se nos llena la boca de "daprender de los errores vieyos" nun ta demás repasar lo que pasó hai unos años. Simplemente, revisando los escritos de DMR sobre la so esperiencia (suxetivos y personales, delles veces equivocáu, pero contaos con honradez) vense coses calcaes a lo qu'agora ta pasando. Volver a revisar otros artículos del blogue, críticos pa como marchen les coses, tamién val. Ya eso ensin salir d'esta bitácora.

    ResponderEliminar
  34. Cada cuatro años pasa lo mesmo. Los de siempre, los que tuvieron en toles dixebres del nacionalismu, cada 4 años a montar un proyectu "ilusionante, d'izquierda, verde, asturianista"...etc etc. Y nun aprendemos.

    El mio votu y de los de mio casa pal PAS o Andecha. Aunque teniendo en cuenta les posibilidaes de cada unu, valdrá más votar a Xuan Xosé.

    ResponderEliminar
  35. Andecha, comu tal, pezme que dubio se pueda presentar, muncho tienen que camudar les coses pa que eso pase. Salvo que dalgunos encerrizaos entamen a negociar colos que, fasta agora llevamos tolos xuicios, o cuasi, ganaos.

    ResponderEliminar

Nota: solo los miembros de este blog pueden publicar comentarios.