29.10.10

Na muerte d’un sindicalista


Marcelino Camacho
Marcelino Camacho, l’históricu líder de Comisiones Obreras, morriera esta madrugada pasada. Escontra esti sucesu ún alcuéntrase por frente a sentimientos estremaos. D’un lláu nun puedes dexar de sopelexar una cierta almiración por un lluchador de tola vida, por un home que tanto sacrificó por una causa que, nel fondu, ye la de munchos de nosotros y, si lo analizamos bien, la de cuasi tolos ciudadanos porque, magar que’l conceptu de “clas” seya güei mui discutible, nun lo ye la identificación de la “clas” moniritaria que gobierna’l mundiu, esplota a les persones y machuca la naturaleza. Pero d’otru lláu, a lo menos nel mio casu, nunca tuve una gran sintonía con Comisiones Obreras y, nuna bona parte de los sos postulaos, discrepé dende siempres y sigo discrepando.

Nesta distancia pesa un orixe ideolóxicu non comunista ya una tradición familiar fuertemente anarcosindicalista, en primer llugar. Y, al empar, l’asturfobia que la esquierda española clásica manifestó siempres que pudo. Pero nin la una nin la otra cosa ye culpa de Marcelino Camacho, nin de los sindicalistes en xeneral, nin del movimientu obreru miráu en conxunto. La nuesa historia ye la que ye y tenemos que triar con ello.

De toles formes, la muerte de Camacho, ún de los pocos homes de la nuesa historia reciente al que cuasi tola xente conoz pol nome, Marcelino, el Marcelino por escelencia, nun dexa d’ameter solombra nel alma. Con esti sindicalista muerre una xeneración d’homes y muyeres, d’obreros, que resistieron a Franco ya’l so réxime criminal, una xeneración a la que los más mozos tanto-y deben. La delda que nosotros y, riba tóo, los que yá nacieron ensin conocer la bota del xeneral traidor y rastiegu, ye mui grande, impagable. Pero dalgunos bien que la tan cobrando, y con intereses. Pero’l vieyu sindicalista güei desapaicíu nun la reclamó pa elli.

De Marcelino Camacho yo teo un recuerdu mui marcáu. Elli participó nel pieslle de la campaña contra l’ingresu na OTAN nel Pueblu d’Asturies, n’antigua panerona. Nel estráu tábamos Gerardo Iglesias, Maldonado –dirixente’l CDS d’Adolfo Suárez- ya yo. Nin que dicir tien que’l más aplaudíu, vitoreáu y queríu por tolos presentes fora Camacho. Yera un mitineru estraordinariu, con aquellos glayíos que metía y aquella pallabra tan desordenada pero tan efectiva. Cuando Camacho falaba tal paicía que falaba la mesma “clas obrera”. Y prefirió zarrar la campaña con nos en Xixón, envede Madrid o Barcelona, porque pa elli Asturies yera una tierra mítica, porque en La Camocha taba una parte la so alma. Almiraba tanto al proletariáu asturianu que falaba con arguyu de los grandes de la nuesa esquierda, inclusive de Quintanilla o José María Martínez, cosa mui rara nun comunista tan ortodoxu como siempres fora elli.

Delantre’l féretru de Camacho nun podemos evitar faer comparanza col sindicalismu d’anguaño y colos sindicalistes d’anguaño, xente burocratizao polo xeneral y de la que nun tenemos mui claro a qué porgüeyos sirven. Porque la xeneración anterior del movimientu obreru, coles sos lluces y les sos solombres, cuando menos, creyía saber a quién servía.

Dende la discrepancia que cuasi siempres tuve contigo y cola mayor parte los tos camares, compañeru Marcelino, “sit tibi terra levis”.

15 comentarios:

  1. Comparto la idea contigo pues hai qu'honrar a la xente decente venga d'onde venga, como pasó recientemente col fináu Carlos Hugo al que-y reconozo'l so valir y la so idea de democracia muncho mas direuta que la que güei sufrimos y que, como con Camacho, nun compartia la so visión del mundu nin munchu menos la so visión del mio país.
    Nesti país paez que sufrimos d'una amnesia coleutiva que mos lleva a homenaxear solo a los de la nuesa secta, o pa dalgunos, meyor nun honrar a naide, que ya son ellos los qu'inventaron esti país.
    Bien fecho David, bien fecho. Agora dalgún troll a llamate españolista o traidor o que rediós sabe

    ResponderEliminar
  2. D'alcuerdo dafechamente, Nacho. Les discrepancies, fuertes dalgunes veces, nun pueden torgamos ver con claridá. Amás nun podemos desixir la mesma responsabilidad n'asturfobia que diz Rivas a un obreru nacíu en 1918 nun pueblín de Soria, que lluchó na guerra y anduvo pente la cárcel y l'esiliu con otros "ideólogos" del españolismu más casposu n'Asturies. Yo nun ví nunca a Camacho o a Nicolás Redondo falar de, como canta Skama na Rede, "la pijada del bable". Pero sí lo sé de Carrillo, de Gómez Llorente, de la mesma Pasionaria. Tampoco-y lo sentí a Horacio Fernández Inguanza. ¡Qué casualidá! Los vieyos lluchadores nun tiníen tantos problemnes. Horacio defendió al asturianu como "llingua específica d'Asturies" cuando l'estatutu. Pero, como dices, l'amnesia ye abundante. Igual que pente los asturianistas hailos y hailos, na esquierda tradicional tamién. Creo qu'esti homenax pequeñu de David a Marcelino amosa la so xenerosidá intelectual, pero tamién que ye un paisanu qu'entiende de xusticia.

    ResponderEliminar
  3. Nos tiempos duros vense los Paisanos. Non solo los sindicalistes d'anguaño deberien de facer esamen de concencia, tamien munchos obreros que nun-y facemos xusticia a la llucha de los que quedaren pel camín.

    ResponderEliminar
  4. Ye que David ye dalgo raro nesti movimientu nuestru. ¿Cuántos nacionalistes diben tar nun estrau con Gerardo Iglesias y Marcelino Camacho? Denguno anque tuviéramos falando de dalgo tan "mundial" como lo de la OTAN. Yo nun m'alcuerdo d'aquello, yera pequeñu. Según voi conociendo más de David Rivas más lu entiendo y, de verdá, más lu almiro.

    ResponderEliminar
  5. Hai tan poco conocimientu. Rivas ye de lo poco que tenemos con conocimientu. ¿nun vesis esti blogue? ¿nun ye de lo meyor? Unes veces taremos más d'alcuerdu y otre menos. Por cierto, Les Noticies (Les Puticies) nin se refieren a Rivas nel so artículu sobro la blogosfera asturiana. Y paez ser el mas visitau pente los individuales. Tien hasta setenta ports. Y visites unes 250. Iglesias y Bello: ¿nun ye hora de que vayais a vivir a Benidorm?

    ResponderEliminar
  6. Si quereis saber lo que ta pasando en Les Noticies , entra-y nel blog de Miguel Barrero y llee-y l'articulo Crónica d'un final . Nesi articulo l’autor esplica bien a les clares , el nueu aldu del selmanariu y como el so dueñu'l señor Iglesias quier facer d'elli un selmanariu con orientación político de dereches (como agora paez ser que tan el PP) pues eso un selmanariu a mou cola so ideoloxía ,pa lo cuál hai que camudar a los redactores (que son mas de la llinia FSA-IU-BA) . A lo meyor ye que'l señor Iglesias da por muertu esti gobiernu del que zucaba sovenciones a mamplén y agora ta colocandose pa lo que pueda venir (si ye que vien Cascos) del cuál espera siguir zucando claro ta . Pero pa ello tien que camudar la llinia del selmanariu y claro va dir echando a tolos que trabayen nelli . Menudu focicu tien David el to amigu empresariu , asina somos empresarios cualesquiera . Pagando los sueldos de los emplegaos con sovenciones publiques ….. que finu salio'l cartoneru va facer bonu a Diaz-Ferrán . Contra esti tipu de xentaca ye contra la que lluchaba xente como Marcelino Camacho.

    Vir i ato

    ResponderEliminar
  7. Nun toi mui seguru de que'l PP piense nesti "empresariu" que namás ye un nenu de papá que se creye importante. Tanta mierda contra los asturianistes del PP (Humberto y cia) y tantu casquismu, nun se yo. Y nun se si David ye amigu d'el o non, pero duldo que David escribiera sobre esti cartoneru lo qu'escribió de Marcelino Camacho.

    ResponderEliminar
  8. David Rivas siempre amosó apreciu por Inaciu Iglesias pero ye la persona que más puso a caldo los sos llibros y les sos idees sobro Asturies y l'asturianismu. Y toi d'alcuerdo col anterior: nun creo que diba escribir d'Iglesias lo qu'escribió de Camacho.

    ResponderEliminar
  9. La verdá yo nun veo la mesma dureza nes critiques a si un empresariu ye asturinista o si nun lo ye . Exemplos voi poner dos : Iglesias y Felechosa . ¿En que se diferencien de Vigón ? bueno en que son mas ruinos y piores empresarios eso de mano.Pero veo nel asturianismu un poco de condescendencia con esti tipo de xentaca , que llueu van de emprendedores y bones persones.¿Como se va a comparar Iglesias con Camacho? y ademas quien dixo eso... Camacho ta ya n'historia del movimientu obreru español y Iglesias nun creo nin que tenga mas d'una ringlera na hestoria del asturianismu .

    ResponderEliminar
  10. Evidente, amigu, evidente. Esti cartoneru nun va tener una ringlera en degún llau. Ye malu como empresariu (namás sabe comer subvenciones), ye malu como editor (hasta perdió parte de la subvención que siempre tuvo Trabe), ye malu como escritor (ye l'escritor que más recurre al "voi esplicame" o "verán lo que quiero dicir"), ye malu como políticu (siempre pidiendo un puestu cabezaleru a Bloque, PP, Ias, Una, lo que seya), ye malu como teóricu (los sos llibros del nacionalismu son malos hasta na foto de portada). Nun sé si ye amigu o non de David Rivas, pero comparando curriculum nun hai color.

    ResponderEliminar
  11. Home,coño. Ye que comparar a Rivas con Iglesias ye como comparar un güevu con una castaña. Naciu Iglesias: pufff...

    ResponderEliminar
  12. ¿Quien ta comparando a Rivas con Iglesias? A veces dame la impresión de que nun lleemos lo qu'escriben los demas . ¿Onde se dixo eso? ¿Au ta escrito? por favor un poco de xaciu . Como se va comparar a un paisanu como Rivas que siempre supo tar nel so sitiu y que se declara nacionalista y d'izquierda ensin complexos , con otros qu'unes vegaes son nacionalistes otres asturianistes otres rexonalistes otres de centru , izquierda y derecha . Que vas a esperar de paisanos que nun plazu de 15 años tuvieron nel ENA , XNA , PAS la UNA la LLiga , la URAS el PP o el BXA o IU o dos coses a la vez.... ¿que chapeta ye esa? . Iglesias , Felechosa , Yepes ,Miguel Lago ........etc son como l’aire y son el pasáu.De los vieyos salvo a Carmona, Llope , Rivas y poco mas . Respeto a Palacios porque sigue una llinia de trabayu coherente y toi enfotáu nos nuevos como Zapico , Arbesú , Arboleya, Lluismi Orviz y dalgunu mas (los que dan la cara , porque hai otros qu'anque válidos nun dan la cara nunca con David Guardado) si nun dan la cara nun los vamos a poner al frente ta claro. Mieu me da que Valledor salga tan cantamañanes como los que cite al principiu . Yo confío na xente nuevo sofitaos por perros vieyos como Llope , Rivas ,Carmona, Ezequiel , Marco'l Roxu ... que tienen el saber que da la historia .

    Colasón

    ResponderEliminar
  13. ¡Cuánta razón tienes, Colasón! Perí va la cosa: un Arbesú o un Lluismi bien sofitaos por xente como David Rivas. Eso llámase facer país. Lo demás pa la pila cuchu.

    ResponderEliminar
  14. A ver si Iglesias entaína y fai un selmanariu decente, porque agora mesmo mete mieo.

    ResponderEliminar
  15. Gracies polos piropos, amigos, que ún ye un poco vanidosucu. Pero de lo que quería falar ye de lo importante que ye recordar la historia y facer xusticia. Tién razón el que diz qu'Horacio Fernández Inguanzo defendió hasta onde pudo la consideración del asturiano como "llingua específica" d'Asturies, cosa que valtó la UCD ya'l PSOE. ¿Cómo nun diba defender eso?, ¿en qué llingua creyemos que falaba Inguanzo?, ¿en ruso por ser comunista?. Falaba un asturiano bien amañosu. Conocilu yá de vieyu porque vivió en Quintes cuando yo vivía en Quintueles y presentómelu un mineru de Tiuya, Pichi. Falé muncho con elli y llegamos a tenemos apreciu. Quédome cola manda d'escribir al rodiu de cómo se fixo l'estatutu y cómo se reformó unos años más sero, la puxarra d'estatutu qu'entá sufrimos.

    ResponderEliminar

Nota: solo los miembros de este blog pueden publicar comentarios.