Na muerte d’un sindicalista



Marcelino Camacho

Marcelino Camacho, l’históricu líder de Comisiones Obreras, morriera esta madrugada pasada. Escontra esti sucesu ún alcuéntrase por frente a sentimientos estremaos. D’un lláu nun puedes dexar de sopelexar una cierta almiración por un lluchador de tola vida, por un home que tanto sacrificó por una causa que, nel fondu, ye la de munchos de nosotros y, si lo analizamos bien, la de cuasi tolos ciudadanos porque, magar que’l conceptu de “clas” seya güei mui discutible, nun lo ye la identificación de la “clas” moniritaria que gobierna’l mundiu, esplota a les persones y machuca la naturaleza. Pero d’otru lláu, a lo menos nel mio casu, nunca tuve una gran sintonía con Comisiones Obreras y, nuna bona parte de los sos postulaos, discrepé dende siempres y sigo discrepando.

Nesta distancia pesa un orixe ideolóxicu non comunista ya una tradición familiar fuertemente anarcosindicalista, en primer llugar. Y, al empar, l’asturfobia que la esquierda española clásica manifestó siempres que pudo. Pero nin la una nin la otra cosa ye culpa de Marcelino Camacho, nin de los sindicalistes en xeneral, nin del movimientu obreru miráu en conxunto. La nuesa historia ye la que ye y tenemos que triar con ello.

De toles formes, la muerte de Camacho, ún de los pocos homes de la nuesa historia reciente al que cuasi tola xente conoz pol nome, Marcelino, el Marcelino por escelencia, nun dexa d’ameter solombra nel alma. Con esti sindicalista muerre una xeneración d’homes y muyeres, d’obreros, que resistieron a Franco ya’l so réxime criminal, una xeneración a la que los más mozos tanto-y deben. La delda que nosotros y, riba tóo, los que yá nacieron ensin conocer la bota del xeneral traidor y rastiegu, ye mui grande, impagable. Pero dalgunos bien que la tan cobrando, y con intereses. Pero’l vieyu sindicalista güei desapaicíu nun la reclamó pa elli.

De Marcelino Camacho yo teo un recuerdu mui marcáu. Elli participó nel pieslle de la campaña contra l’ingresu na OTAN nel Pueblu d’Asturies, n’antigua panerona. Nel estráu tábamos Gerardo Iglesias, Maldonado –dirixente’l CDS d’Adolfo Suárez- ya yo. Nin que dicir tien que’l más aplaudíu, vitoreáu y queríu por tolos presentes fora Camacho. Yera un mitineru estraordinariu, con aquellos glayíos que metía y aquella pallabra tan desordenada pero tan efectiva. Cuando Camacho falaba tal paicía que falaba la mesma “clas obrera”. Y prefirió zarrar la campaña con nos en Xixón, envede Madrid o Barcelona, porque pa elli Asturies yera una tierra mítica, porque en La Camocha taba una parte la so alma. Almiraba tanto al proletariáu asturianu que falaba con arguyu de los grandes de la nuesa esquierda, inclusive de Quintanilla o José María Martínez, cosa mui rara nun comunista tan ortodoxu como siempres fora elli.

Delantre’l féretru de Camacho nun podemos evitar faer comparanza col sindicalismu d’anguaño y colos sindicalistes d’anguaño, xente burocratizao polo xeneral y de la que nun tenemos mui claro a qué porgüeyos sirven. Porque la xeneración anterior del movimientu obreru, coles sos lluces y les sos solombres, cuando menos, creyía saber a quién servía.

Dende la discrepancia que cuasi siempres tuve contigo y cola mayor parte los tos camares, compañeru Marcelino, “sit tibi terra levis”.

Imprimir