3.10.10

L’añu la cris que naide nun quixo ver (L.luis Fernández)

Confiéso-ys que nun toi mui avezáu a “estos telares” de presentaciones de l.libros. Tengo dicí-ys qu’enxamás presentéi l.libru dalgún. Asina que cuando David M. Rivas me pidió que-y presentara esti l.libru quedéi d’una pieza ya penséi: ¡en menudu compromisu m’acaba meter a min esti home!.

Presentar un l.libru ía siempres una xeira abondo difícil. Quedar bien ou mal pue ser cuestión de pequenos detalles. David plantegóume la cuestión como cousa feita, asina que nun me deixó nin la más pequena posibilidá de dicí-y que non. Cuando David me mandou’l l.libru volvienon las duldas. ¡Miánicas!, penséi, ¿nun-y podía haber dao por escribir un poemariu o, a lo más, una novela?.

¡Nomenón, qué va!. Tenía que ser un l.libru d’artículos ya entrevistas nada menos. Digo “nada menos” porque, conociendo un poucunín a David, ún dase cuenta ceu de que ía “culu inquietu”, como se suel dicir, amás de persona esmolecía, non solamente polo que ía la sua profesión, sinon por tolo que pasa en xeneral nel mundu mundial.

¡Hostia!, penséi, agora mesmo lu l.lamo ya que-y presente’l l.libru mariasantísima. Pero nesto sonó’l teléfonu ya –¿casualidá?- yera David preguntándome si me l.legara “eso”. Díxi-y que sí ya, ensin deixame casi acabar, despidióuse ya you quedéi con cara bobu mirando pal teléfonu. Asina las cousas, nun me quedó outra que poneme a la xeira.

Bueno, bromas aparte, queda claro qu’ía pa min un honor presentá-ys güei esti últimu l.libru de David Rivas, “L’añu la cris que naide nun quixo ver”.

David tien un curriculum académicu y profesional de primer nivel, pero nun ía d’eso de lo que you quería falá-ys en primer l.lugar nesta presentación. You quería falá-ys güei, en primer l.lugar, del David persona, esi qu’enxamás escaecéu nin los sous raigaños nin los valores qu’aprendió de los sous mayores.

¿Pero de qué David falar?. Hai muitos “davices” nun solo. Ta’l David que defende los sos raigaños campesinos, fidalgos ya carlistes; ta’l David ácrata de los años d’estudiante universitariu en Madrid; ta’l David ecoloxista ya economista; ta’l David nacionalista asturianu. Pero, pur riba tou, ta’l David ilustráu, heterodoxu, l.liberal y patriota. Sí, d’esos que yá nun queden na clas política ya dirixente d’esti país de nueso, onde tal paez que yá nun esiste’l términu mediu (el de la xente normal), onde o sos pelegrín a Rudiezmu o sos pelegrín a Cuadonga.

David ía representante d’esa Asturias de fonda tradición l.liberal ya ilustrada que miete los sous raigones na madre tierra, esa Asturias que siente arguyu por tolo de so ensin despreciar lo de los demás, qu’andecha col vecín pal bien común ya que sabe que la pal.labra dada, o’l tratu, valen más qu’una firma nun papel.

Tien el profesor Rivas una apariencia daqué distante, seique pola manera de vistise. Esas tarabicas ya esos sombreiros faen que la xente lu vea como pouco cercanu ya hasta un poucunín enchipáu. Nada más l.lonxe de la realidá. Pudi comprobalo na sou propia col.lación, nel tratu colos sous vecinos. David ía cercanu a la xente, desplicándo-ys con xeitu términos económicos difíciles d’atalantar pal común de la xente. Nótase nesto la deformación profesional de David pero toi xuro que los sous vecinos agradecen-ylo enforma.

David ía valiente ya independiente, de pensamientu ya de criteriu. Por fortuna pa él nun pasou la transición n’Asturias ya nun garrou malas zunas. Nun se contaminou d’esi cáncanu que percorrió ya percuerre inda güei Asturias y que nun ía sinon esi sectarismu/cainismu que tantu dañu-y feixo ya tovía sigue fadiendo al asturianismu en xeneral ya al nacionalismu en particular.

Rivas diz las cousas nas que cree, mirándote a los güeyos, ensin engañifas nin tracamundios. Ía persona l.libre, nun necesita combayar con nenguna corte, capiya o cofradía, porque nun cueme de nengún “chiringuito”. Rivas ía un home independiente, poro, ía personaxe incómodu, seique molestu pa muita xente: pa unos porque nun son quien a ver más p’al.ló del so curtiu sectarismu ya pa outros porque diz cousas qu’el.los nun pueden dicir al tar amarraos al “pelsebre”.

Ía una pena que la universidá asturiana nun cuente con un profesor del altor intelectual de David Rivas, col sou saber en temas económicos ya humanistas a la fin. Bueno, pa la universidá seique nun ía una pena, pero pa los sous alumnos de xuru que sí.

Nun puedo entender cómo un profesor como David nun ía asesor del gobiernu asturianu, en temas d’economía ya desarrollu sostenible, por exemplu. Bueno, si unu mira pal paisax del país yá lo véi entendiendo meyor. Con una persona como David Rivas nu gobiernu sedría mui difícil caltener, por exemplu, esa política enerxética colonial ya ensin xacíu que padecemos, basada na producción asgaya d’enerxía eléctrica a costa d’estrozar tolos cordales del occidente’l país colos molinos de vientu. Eso ensin contar, claro ta, que yá teníamos cinco grupos térmicos ya cuatro banzaos pa producción d’electricidá, pa un país nel que malapenes superamos el millón d’habitantes.

En segundu l.lugar quería comentá-ys un pouco pur riba la obra que güei presentamos equí, “L’añu la cris que naide nun quixo ver”. Ye un l.libru d’un economista que, cola sida de la crisis, despáchase con una montonera d’artículos onde toca temas como la economía mundial, la estatal y la nacional asturiana, onde, entre outras cousas diz que “la crisis ía l’estáu natural del capitalismu”. Fala de la necesidá que tenemos de cambiar el modelu económicu mundial, analiza’l capitalismu, del que diz que “ía como una bicicleta, solo se caltién cuando avanza”. Analiza tamién los modelos económicos propuestos históricamente dende’l pensamientu socialista, las recetas económicas del marxismu.

Fai un análisis de la economía asturiana dende’l sieglu XIX, onde, pa desplicar lo que ta pasando ya lo que l.leva pasao nesti país nos dous últimos sieglos, saca a la palestra a xente tan estremada como Smith, Marx, Fernán Coronas, Nietzsche o un vecín del sou pueblu.

Esta manera de cuntar las cousas ía un vezu xeneralizáu en tola obra de David. Véi cuntando historias ya asoleyando personaxes, nun xuegu nel que zarra ya enl.laza círculos como metáfora. El mundo son muitos ya unu solu al mesmu tiempu.

El desarrollu sostenible, o “desendolcu caltenible”, como l’autor prefier nomalu, ya los temas del mediu ambiente son trataos a fondo n’artículos bien interesantes. Las grandes infraestructuras que se tan fadiendo n’Asturias, la sou utilidá ya la sou sostenibilidá, son tratadas n’artículos como “Les cuentes d’El Musel y la calidá de la democracia”. Pero tamién escribe artículos que tratan l’agricultura, la cultura, la l.lingua ya la l.literatura asturianas, tamién los nuevos planes d’estudiu universitarios (el llamáu “Plan Boloña”), onde l’autor dexa claro el sou paecer al respeuto. Nel artículu “Soi Marta pero non namái que Marta” analiza l’autor la reforma’l códigu penal español ya l’endurecimientu del mesmu, un artículu escelente pal mio talantar.

La llista de temas sigue ya sigue: la democracia, el papel a xugar pola monarquía, las autonomías, la Unión Europea, la multiculturalidá, la memoria histórica, el nacionalismu asturianu, el soberanismu catalán, las multinacionales, la situación del Líbano, l’estáu d’Israel y la situación nel cercanu oriente, l’agricultura en Guatemala, la fala d’entrambasauguas, las relaciones histórico-culturales ente Asturias ya L.lión, el cine, asemeyos a personaxes como Rodrigo Rato o Iñaki Anasagasti… De xuru que se m’escaez dalgún tema preí.

Tamién fai de periodista improvisáu nuna entrevista a un l.lagareiru de la sua col.lación, na que David entama diciendo-y al entrevistáu que “como somos amigos trataréite bien”, a lo que’l l.lagareiru, Pepe Tomás, respuende que “una entrevista ía pa una vez pero tu vas siguir tomando sidra tola vida”. Rempuesta esta qu’implica toa una filosofía de vida ya toa una manera de tratase la xente no mundo rural.

Too esto faelo David como bon heterodoxu, dando siempres la sua opinión, sía políticamente correcha o non. Un exemplu ía la sua opinión al respeuto de la multiculturalidá nel sou artículu “La multiculturalidad sólo existe en reportajes infumables”, onde l’autor muestra’l so escepticismu sobre’l tema de la multiculturalidá imperante en determinada izquierda “progre”, “guai” y “chachi”.

L’autor prefier mandase del términu “tolerancia” pa referise a la masulina convivencia ente personas de distintas etnias ya culturas. Desplícalo muito bien David nesta frase: “Lo multicultural se produce cuando hay un intercambio cultural, no cuando cada uno va por su lado. Yo me corto el pelo en una barbería que llevan dos chicos bereberes, compro fruta tropical a unos guatemaltecos, ceno a veces en el Kashmir y compro latas de cerveza a una peruana. Sin embargo, no intercambiamos más que dinero por mercancías, cosa que también hago con el quiosquero, que es de Cuenca, y con una chica que me pone el vermú los domingos y que es madrileña”.

Convídolos a mercar el l.libru de David ya tamién a que visiten, sí-ys peta, el sou blogue o cuadernu bitácora na rede, nomáu “David M. Rivas”, onde l’autor asoleya artículos d’opinión (tanto n’asturianu como en castel.lanu) pal sou alderique. Asegúro-ys que mialma nun se van aburrir. Ía entreteníu, da una visión diferente de las cousas ya ía honestu, lo más importante de too.

Nun me queda más que da-y las gracias otra vuelta a David por fademe’l brinde de presentá-y’l l.libru ya vustedes pola sua atención.

8 comentarios:

  1. Presta ver que'l cainismu nun llegó a tolos asturianistes. Nun conozo a esti L.luis pero ye un paisanu. Eso ye lo que necesitamos: paisanos.

    ResponderEliminar
  2. Una presentación bona daveres. Al final son les coses bien feches, pensaes y argumentaes, les que dexen posu, y la xermandía de descalificadores ya insultadores queda nel más absolutu olvidu. Asina qu'a siguir cola xera seria y comprometida que ye la meyor manera de facer país.

    ResponderEliminar
  3. Una cosa: yo soi de Xixón pero cuanto me presta esta presentación na variante occidental.

    ResponderEliminar
  4. Esta presentación amosa qu'hai vida intelixente nel asturianismu y nel nacionalismu. Amás, anque habrá quien piense que ye cosa d'un amiguete de David, de dalguién que lu aprecia abondo, nada de lo que se diz ye mentira ni tremenda esaxeración. Podrán gustamos más o menos les sos posiciones polítiques o les decisiones que toma o que tomó, pero lo que ye oxetivo ye oxetivo.

    Y un apunte de coña: fató-y a L.luis Fernández dicir que dobla películes y hasta les interpreta, faciendo'l payaso vistíu raro pa reise colos amigotes. Cuando salió lo del Interviú pensé "igual sal en pelota". Ye capaz de cualquier cosa.

    Un saludu y norabona pol llibru y la presentación. Pienso como'l Xanu'l Caborniu.

    ResponderEliminar
  5. Eso ensin escaecer que gana premios de lliteratura erótica y diserta sobre tetes. Tolo fae bien menos la política. Colo llistu y preparau que ye envede metese nel PSOE hai trenta años dió-y pol nacionalismu asturianu. Saludos, David.

    ResponderEliminar
  6. Esti Rivas ye un gallu. Y acabose

    ResponderEliminar
  7. Yo no entiendo a estos escritores que utilizan los dialectos del asturiano, existiendo como existe, desde hace muchos años un estándar lingüístico. Creo que estos escritores, especialmente los que utilizan el bable occidental, son desleales con la normalización y por ende con la Academia. Ninguna variante o dialecto del asturiano sobrevivirá sino sobrevive el asturiano estándar.

    ResponderEliminar
  8. Amiguín, con esi estandar vallisoletanu qu'emplegues tu tas como pa dar lecciones. Y, por si nun lo sabes, lo qu'escribe esti L.luis Fernández ye académico estandarizao. Como Quevedo, como Rodríguez de Bimeda, como Miguel Rojo a veces. Vete a pacer pa saber que cosa ye la yerba.

    ResponderEliminar

Nota: solo los miembros de este blog pueden publicar comentarios.