31.10.10

La nueche los muertos


Nos díes primeros de payares cellebraben los celtes el “samain”, consideráu entóncenes como l’entamu l’añu, entamu que los romanos, de cultura netamente solar, treslladaran a la fiesta’l solsticiu d’iviernu. Y, posteriormente, el cristianismu aproveció eses cellebraciones pa implantar el nadal.

Lo mesmo diba asoceder col solsticiu branu, güei cristianizáu en San Xuan y cellebráu pol 24 xunu. Pa los celtes, esi otru ciclu, l’estival, abríase col “belthaine”, cellebráu, aprosimadamente, na rodolada’l nuesu primeru mayu. Como vemos, hai una concordancia prácticamente perfecha.

Volviendo al nuesu actual payares, nesos primeros díes cellébrase a los muertos. Nun ye precisamente una cellebración festiva, anque pudo selo n’otros momentos históricos, pero sí de renunbranza pa colos antepasaos pola parte d’un pueblu que, como l’asturianu, conservó hasta hai mui poco un evidente cultu a la castra familiar. Pesie a la esistencia de lliendes truculentes sobro apaecíos o llugares abruxaos, qu’esisten ya en bon númberu, los antepasaos muertos son espíritos protectores del clan, de la familia. Nos conceyos occidentales y particularmente pente los vaqueiros a payares llámenlu “mes muortu”.

El ritu más habitual ye’l d’ensamar al cementeriu pa rezar poles ánimes de los familiares desapaicíos. Equí queda apuntada una mui temprana y trunfadora cristianización porque, nel aniciu, la visita a los enterramientos realizábase polo contrario: pretendíase que los qu’abandonaren la vida acubiciaren a los qu’entá vivíen. Agora rézase poles ánimes d’ellos, enantes pidíase-yos aída pa nós.

Hasta hai namái qu’un sieclu yera vezu comer durante los funerales d’un familiar o d’un vecín, resclavu de los banquetes que los antepasaos indoeuropeos ufríen a los sos muertos y que l’obiespu Guevara proibiera dafechamente. Yá nel sieclu VI la ilesia, en concreto Martín, obiespu de Braga, condergare eses práctiques paganes y Adefonso X de Castiella, nel XIII, decretó “no cubrir las huesas con manteles y poner pan y vino y otras viandas”.

Too ello ye la güelga del “samain” celta, el nuesu actual primeru payares, cuando entraba l’añu nueu de la manu’l dios de los muertos. Los antepasaos de los asturianos creyíen –y los asturianos d’anguaño siguen fieles a esa tradición anque yá nun saben d’aú vien- qu’esa nueche los muertos salíen de los sos túmbanos, les “sidhes”, y compartíen la folixa colos vivos, esto ye, “comulgaben” con ellos.

La creyencia na participación de los muertos nel ágape perviviera pesie a los intentos d’erradicala y, entóncenes, la ilesia camudola en “pan de les ánimes”, un pan que se repartía pente los asistentes al funeral y, más sero, pente los probes de la fastera. Anguaño lo que queda d’esos ritos ye la costume de llimpiar a fondo les tumbes, retirar la broza que les toviere arrodiando y poner enriba d’elles flores y veles. Por embargo, hasta hai pocu tiempu, malapenes vente años, entá había llugares nos que se comía y se bebía enriba les tumbes, siendo les castañes l’elementu central del ritu. Ensin dir más lloñe, yo mesmu viviéralo en Cuideiru nos primeros años noventa del recién fináu sieclu XX.

Tamién yera normal esvaciar calabaces dándo-ys el xeitu d’una calavera con una vela dientro, lo que sí yera daqué folixero pa espavoriar a la xente y, especialmente, a los neños. Y vuelvo a les mios esperiencies. Esti xuegu practiquelu yo en Quintueles, una parroquia maliaya a namás de diez miyes de Xixón. Toi falando de los últimos sesenta y primeros setenta, esto ye, hai poco más de trenta años. Sosprendentemente, esti vezu asturianu, compartíu colos escoceses ya irlandeses que lu llevaran al nueu mundiu col nome de “halloween”, recuperárase últimamente al abellu de series pubescentes inacostaciables que desurdien de los Estaos Uníos.

Ya una custión particularmente grave del procesu d’aculturación que carecemos n’Asturies ye que nun ye pequeñu’l númberu d’escueles onde se cellebra esi día como si se tratare d’una costume foriata, d’un vezu anglosaxón. La razón ye que los organizadores d’eses pretendíes “fiestes infantiles” nun son los mayestros de primaria o los profesores de cultura o conocimientu’l mediu, sinon los profesores d’inglés. D’esta manera tan produciéndose dos aberraciones a una mesma vegada: escaecer –en delles ocasiones intencionadamente- la tradición cultural asturiana y, d’otra banda, facer creyer –equí ye posible que siempres seya por ignorancia- que se trata d’una cellebración d’aniciu inglés, cuando ye neto escocesa ya irlandesa.

Si adicamos pa eses series televisives o pa eses películes, edulcoraes y desnudaes de cualisquier signu máxicu tradicional, veremos que ye costume que los neños, antroxaos como bisarmes, van pidimiendo llambiotaes al glayíu de “trick or treat” (“trucu o tratu”). Lo mesmo, pero sabiendo que se trataba d’un ritual mortuoriu, facíase n’Asturies hasta hai menos de cincuenta años. Por cierto, que tamién fixera esto yo colos mios amigos hasta bien entraos los años setenta.
Imprimir

10 comentarios:

  1. Guapu artículu. Un saludu.

    ResponderEliminar
  2. Copio darréu remembrances mios que punxi nel muru de facebook:
    "De les calabaces de Tolosantos en que me tocó participar, recuerdo tres: una, la del relatu últimu del mio blog; otra, la que quedé como "depositariu" y que podreció en casa y casi voi fuera yo con ella; la tercera, punxímosla enriba un balagar nun prau a unos trenta metros d'una carretera y por suerte'l balagar nun prendió, que si llega a facelo tovía tábamos dalgunos arrascando la culera poles ñalgaes que nos cayeren."
    ¡Qué tiempos aquellos, David!.

    ResponderEliminar
  3. David, Xanu: por si acasu, estos tiempos d'agora siguen siendo los vuestros. David: güei más que nunca necesitamos xente que, mirando pal futuru, sepa lo que ye y fora esti país.

    ResponderEliminar
  4. H.oder, Rivas, equí aprovechen dalgunos cualisquiera tema pa reclamate políticamente. Por dalgo será, por dalgo será. Un articulín bien guapu. Un saludu.

    ResponderEliminar
  5. Ye que Rivas ye l'únicu nacionalista d'esquierdes que sabe onde tien la manu drecha. Nun ye raro que lu reclamemos.

    ResponderEliminar
  6. David, una pequeña correición. Tal como lo redactes da la sensación de que contrapones un calendariu celta llunar a otru calendariu romanu solar, y eso nun ye asina. Calendariu estrictamente llunar solo hai un, el musulmán. Tanto'l celta como'l romanu yeren llunisolares, o lo que ye lo mesmo, qu'intentaben conxugar los dos métodos de medición del tiempu.

    Afitar un periodu d'un día ye mui fácil, o cuentes dende l'amanecerín dica'l siguiente, o como facíen los celtes, dende l'anochecer hasta'l siguiente. Como ye la lluz del día en rellación coles nueches lo qu'establez un día, ye una consecuencia lóxica oservar los ciclos llunares (de lluna nueva a lluna nueva, o de llena a llena). Apaez asina la midía del mes (llunar).

    Pero'l problema apaez cuando nun hai correspondencia ente los ciclos llunares y el de les estaciones. Pa un pueblu de cazadores recolectores abasta con midir el tiempu en llunes. Cincante a les estaciones abasta con constatar cuándo ye'l tiempu'l calor, el del fríu, etc. La única trescendencia ye la de saber cuándo paren determinaos mamíferos, cuándo se mueven d'unos sitios pa otros, etc.

    El problema seriu apaez nel Neolíticu, cuando esa xente se tresforma en ganaderos y agricultores, y pa esti móu de vida yá sí importa, y muncho, calcular bien cuándo hai qu'echar la semiente y cuándo facer la collecha. Anque pudo haber ciertu desfase cronolóxicu na adopción del nuevu modu de vida según la zona xeográfica d'Europa, pa les dómines nes que tenemos noticia histórica de pueblos como celtes, romanos y otros, toos ellos vivíen en xeneral d'esti xeitu, polo tanto víense obligaos a facer una aprosimación asemeyada al cálculu del tiempu añal. Por exemplu, repara que les feches qu'anguaño se consideren les más señalaes del calendariu celta (que tampoco ye asina esactamente, pola influyencia del calendariu romanu y del cristianu gregorianu) dividen un añu de 12 meses en periodos de 3: 1 de febreru, 1 de mayu, 1 d'agostu y 1 de payares. Si el calendariu celta fuere esactamente llunar, los meses sedríen una migaya más curtios y nun coincidiríen colos solsticios y equinoccios. Preba d'ello ye cómo determinaos monumentos megalíticos de la Europa atlántica son verdaeros oservatorios astronómicos, siendo'l más conocíu Stonehenge (onde por cierto van tolos hippies y frikis del neodruidismu a cellebrar el solsticiu de veranu, cuando lo qu'en verdá marca ye'l d'inviernu).

    Aconseyaríate enterate una migaya sobre'l calendariu de Coligny, onde por cierto lo qu'equival al actual 1 de payares llámase Samonios (Samhain ye solo'l nome actual en gaélicu, pero non tolos celtes falen esi dialectu). Tamién ye mui útil el llibru "La Magia de los Arboles", d'Ignacio Abellán, que consigue esclariar muncho'l tema del calendariu celta.

    Saludos.

    ResponderEliminar
  7. Munches gracies poles precisiones, que les tendré en cuenta. Consultaré la bibliografía queme dices y dientro d'un tiempu (pa nun convertir esto nun debate permanente) trataré d'escribir dalgo que seya resultao de los nuevos conocimientos. Esti tipu de entraes ye lo que fae poisible que, na mayor parte de los casos, pueda yo caltener un blogue respetuosu pero críticu.

    ResponderEliminar
  8. Mui buenes David :
    Ya se qu'esto nun vien a cuentu d'esti ensiertu, pero esta nota ye pa ponete deberes(nun se si podrás con tanto) pero ye que la to opinión ye valida y necesaria mas que nada porque nun veo nin siento otres opiniones .
    Les entrugues son dos :
    1º/ Crees que l'actual división alministrativo d'Asturies xebrada en 78 Conceyos ye económicamente caltenible.Si nun fuere asina cuál crees tu que sedría la meyor solución (Comarques , xuntura de Conceyos o a lo meyor facer la división por Collaciones nun se) . Como pienses tu que tendría que quedar y cuál tendría que ser la división alministrativa del país.

    2º/Hai estudios económicos que dicen que si s'aprovechara la riqueza de los montes comunales del país(unes 500.000 hectárees el 48 % de la superficie del país, allugaos nos Conceyos más montunos, menos poblaos y más amiseriaos tán casi toos abandonaos a la broza).Bono pues hai estudios que dicen que si se solucionare'l tema de la propiedá d'estos montes y se punxeren a producir , les rentes de los campesinos subiríen nun 35% mas o menos . La entruga ye'l porque el gobiernu asturianu nun lo fai esto cuando sabe d'estos estudios dende fai lo menos venti años . A que ta esperando a que muerra'l campu.
    Prestaríame saber la to opinión nestos temes , el gobiernu actual ta vendiéndonos qu'Asturies va ser nel futuru un gran xeriátricu , una tierra pensionada y amiseriada brindando-y a la mocedá la única ufierta d'emigrar a mundos meyores . Yo como patriota niégome a esto y creo qu'esti país tien igua y munchu futuru per delantre , a fin de cuentes la natura foi bayurosa col nuesu país.
    Churchill

    ResponderEliminar
  9. Churchill: precisamente toi preparando un artículu sobro'l tema de los conceyos. Pero ye una temática mui difícile porque crúciense demasiaes custiones, incluyendo les cenciellamente sentimentales. Pero hai dos coses que sí te puedo adelantrar. Madrid tien 179 municipios, la metada d'ellos con una densidá menor de 25 habitantes por kilómetru cuadráu y dalgunos con un escosu 2. Y ellí nun esiste esti debate. Evidentemente hai diferencies pero una ye la zuna intervencionista de los xeógrafos ya urbanistes n'Asturies. ¿O nun t'alcuerdes: Corredor del Caudal, Ciudad Astur, Corredor del Nalón, etc. etc.? A veces pienso qu'estes ocurrencies (viendo quién ye y a ónde ta afiliau el so promotor) ye pa dar de comer a dalgunos compañeros y compañeres.

    Otra cosa: tan dando la turria cola delda de los ayuntamientos. Pos bien, esa delda representa'l 5 por ciento la delda pública española, namás. Ye más, d'esi 5 por ciento, la metada (2,5 por ciento) ye la delda del Madrid de Ruiz-Gallardón.

    Seguiré estudiando la cosa porque nun convién dicir tochaes. Pero esto yá te lo anticipo.

    ResponderEliminar
  10. Home David porque son temes difíciles pídote opinión a ti . Si non con pidila a Rabanal o a cualesquier otru colonu que nun conoz el país nin sabe pa onde ta vueltu asuntu termináu.
    Nun t'arronches y nun t'escaezas del segundu tema ehh que te conozo .
    Un abrazón y Puxa Yernes i Tameza
    Churchill

    ResponderEliminar

Nota: solo los miembros de este blog pueden publicar comentarios.