2.6.10

Israel: fina’l tiempu y la comprensión


L’ataque la marina israelina a la flota humanitaria nel meudí’l llunes fora dafechamente illegal ya illexítima. Nun voi entrar na “desproporción” que tamién sopelexa semeyante acción, que ye desproporcionada ensin dulda. Discutir lo desproporcionao o non d’un actu bélicu como esti llévamos al alderique sobro’l númberu muertos. Si les víctimes foren dos, la xabazada diba ser la mesma; si les víctimes foren cien, lo mesmo de lo mesmo. L’estáu hebréu fixo’l llunes pasáu un actu que, conforme a los vezos y les lleis de la mar, ye un actu piratería, pónganse como se pongan los sos gobernantes y los sos más estremistes defensores.
Nun momento nel que l’islamismu ta convirtiéndose nuna de les principales menancies pa la civilización y cuando, por aciu d’ello –y de xuru que d’un mou enforma inxusto-, la resistencia palestina pierde sofitos en más d’un llugar del mundiu, l’intransixente Netanyahu tal paez que, como nes piores visiones bíbliques, quier torgar cualisquier opción razonada y razonable.
Ye difícile alcontrar dos mentires en namái que tres pallabres pero, cuando los portavoces del gobiernu de Tel Aviv dicen que los sos marinos actuaron “en llexítima defensa” consiguen esi record. Namás que la preposición “en” s’avera a lo que ye una verdá. Nun hebo llexitimidá porque dengún estáu tien drechu denguno a asaltar un barcu n’augües internacionales. Ye más, entá podemos recordamos de los escuplos que los gobiernos europeos tovieran pa facer daqué asemeyao per frente les costes de Somalia hai unos menses, cuando inclusive podía tener xustificación una intervención “desproporcionada” porque tábamos escontra pirates con barcos secuestraos y rehenes a bordo.
Pal gobiernu d’Israel tóo ye “llexítima defensa” porque piensa que la llexitimidá nun-y vien de la partición que la ONX votara hai yá más de sesenta años sinón d’una orde divina dada a un patriarca hai miles d’años, destín más lluéu refrendáu nel holocaustu carecío una Europa nazi nos cuarenta’l sieclu XX. Por eso vulnera la llegalidá internacional ca dos por tres, porque-y abasta con esa profética llexitimidá d’orixe. Pero esta posición xúncese cola mesma idega de “llexitimidá” de los musulmanes –non del pueblu palestín, que ye otra cosa-, una llexitimidá que permitiría a los árabes y a los iraníes (persas, non árabes, pa conocimiento de torpes) “tirar a los hebreos a la mar”. Nun hai d’escaecer que, sacantes unes oportunistes Xordania y Líbanu, en tolos programes de los gobiernos de la rexón ta l’esterminiu los israelinos.
Los gobiernos musulmanes del Cercanu Oriente y, mui especialmente, les organizaciones terroristes qu’operen nasta rexón, nunca falaran de subdesendolcu, nin de fame, nin de drechos humanos. Pero muncho falen de relixón. La relixón, la relixón… el dios únicu egoísta y sanguinariu. Nada importara’l restu’l mundiu d’eses tierres que nun fore intolerancia, guerra santa, matancíos y dolor ensin cuentu. Enxamás los panteístes o los politeístes provocaron muerte y terror por motivos relixosos. Pué que lo fixeren pa comer, pa ocupar pastos pal so ganao o inclusive pa gozar de la clica d’una tal Helena, pero nunca pa imponer les sos creyencies. Eso, por embargo, fora lo que fixeran xudíos, cristianos y musulmanes, tóos salíos d’esos desiertos del Mediterrániu asiáticu.
Pero, tornando a la llínia argumental del aniciu, tampoco l’acción israelina’l llunes fora una acción de “defensa”. ¿De qué o de quién se defendíen varios barcos de guerra, unos cuantos helicópteros ya unos soldaos perbién equipaos y que tan consideraos como los más prepaos del mundiu?. ¿Defendíense d’unos cuantos ferries con una media de trenta años d’antigüedá, una nobel de la paz, un escritor de novela negra ya una docena de parlamentarios europeos?.
Si daquién lo espresaba bien yea un columnista’l diariu israelín “Haaretz”, escribiendo ayeri que “yá nun defendemos a Israel, tamos defendiendo’l bloquéu a Gaza, que ta convirtiéndose nel Vietnam d’Israel”. Pero esta fras sopelexa que namái que n’Israel se pueden espublizar delles coses. Ye imposible alcontrar un columnista nel restu los países de la rexón que siga vivu con una crítica asemeyada, diciendo por exemplu que “yá nun defendemos a los palestinos, defendemos esi Vietnam d’Israel que ye Gaza pa caltener los nuesos rexímenes oligárquicos y teocráticos”.
Queda una cosa qu’igual ta escaeciéndose pente los debates del día a día. Turquía, un miembro la OTAN, ta a puntu francer relaciones con Israel, siendo como ye l’únicu estáu musulmán que caltién bones amistaes colos hebreos. Nun creyo que lo faiga porque los Estaos Xuníos intervendrán pa qu’eso nun asoceda. Pero, per otru lláu, por una simplaya custión de credibilidá, Turquía tendrá desplicar la so política nel Kurdistán y arrepostiar a la so responsabilidá nel xenocidiu armeniu –ún de los mayores de la historia- pa poder falar de la opresión a otros pueblos por parte d’otros estaos.
Güei peryé necesario, igual más que nunca, la racionalidá na opinión mundial. Hai pocos conflictos nel planeta nos que los prexuicios funcionen tan automáticamente como nel d’Israel y Palestina, munchos heredaos d’aquel xuegu diabólicu nel que los bonos yeran los yanquis o yeran los soviéticos, naquellos años de la guerra frío. ¿Cómo ye posible que, cuasi setenta años dempués, les posiciones seyan les que son?. ¿Cómo ye posible que pente nós siga pensándose que cualisquier crítica a Israel ye propio de nazis o d’antisemites?. ¿Cómo ye posible que, n’Asturies, los palestinos nun tengan avalistes razonables propios pero qu’esista un grupu “pola causa árabe”?. ¿Qué ye eso de la “causa árabe”?.
Conozo bien la rexón y tuve convidáu en delles ocasiones, tanto por israelinos, como por xordanos, como por palestinos. Y viera que ye un problema mui difícile de pescanciar y de resolver, pero si sé qu’hai una cosa clariquina: con frases feches ya eslóganes, poco estudiu y muncho prexuiciu nun vamos contribuyir a nada bono.
Ye un llugar común nel mundín “asturianista” eso de que yo soi ún de los pocos proisraelinos de la esquierda, si ye que nun me ven como l’únicu. Nun ye verdá. Nin soi “pro” nin soi “anti”. Pero sí ye verdá qu’almiro munches cose d’Israel, como sedría lo normal en cualisquier nacionalista d’un país pequeñu y amachucáu. Un nacionalista que, por más contradicciones qu’alcuentre, nun s’emocione escontra un país que se construe en diez años, debería revisar la so definición ideolóxica. Pero d’eso a xustificar lo que de mala miente se xustifica va munchu camín.
Esta última intervención militar d’Israel, esti crime con toles lletres, dexa mui mal a los que siempres fuimos favorables a la esistencia del mesmu estáu sionista. Y al empar, munchos de los que defendemos esto, desiximos que se vuelva a les fronteres de 1969 y que se ponga puntu final a una llaceriosa política d’asentamientos nes tierres de Gaza y Cisxordania.
Joseph Fouché, un diplomáticu cueliebriegu, la fuina más llista de la política francesa’l sieclu XVIII, cuando supo que l’Asambleya tomare la decisión de decapitar a Lluis XVI, a María Antonieta –¡probina!, la neña incomprendida- y a tola so familia, púnxose atristayáu. Entrugáron-y si taba esmolecíu pol crime. Nun lo taba. Taba esmolecíu pol erru. Eso fixo Israel el llunes: cometer un erru de proporciones descomanaes.

30 comentarios:

  1. Joder, David, ye que sabes de tóo. Yes mundial.

    ResponderEliminar
  2. Ye normal que sintiéndose ún nacionaliegu almire munches coses d'Israel como dices. Ye normal porque por munches osties que recibieren na historia siguen lleales al so pueblu. Préstame que nel mundín asturianista haya xente como tú que defienda la "causa israelí" y la argumente.

    ResponderEliminar
  3. מְדִינַת יִשְרָאֵל3 de junio de 2010, 12:02

    Si te dices nacionalista y tas contra Israel ye que nun yes nacionalista de verdá.

    ResponderEliminar
  4. Palestina es nuestra tierra y los judíos nuestros perros..." Slogan empleado por los palestinos en 1929 durante el progrom antijudío de La Matanza de Hebrón.
    Ni olvidamos ni permitiremos que vuelva a suceder.

    ResponderEliminar
  5. Confieso que tengo munchos prexuicios sobro lo que pasa nesa rexón y cada vez m'atrevo menos a opinar con fundamentu. Pero sí ye verdá que lleer opiniones como les tuyes, Rivas, ayuda un poco. Alcuerdome d'un debate onde defendiste los drechos de los palestinos pero dexaste perclaro el to sofitu a Israel. Nun debe ser fácil esa postura tuya dientro de la izquierda. Munches gracies pola valentía y la llibertá de criteriu.

    ResponderEliminar
  6. David copie tu articulo en el blog de Jesus Zamora Bonilla "A bordo del Otto Neurath" espero que no te den mucho la brasa los sionistas de extremo centro

    JM

    ResponderEliminar
  7. Tienes razón Sandra. Ser llibre pa pensar ye difícile y pa decir lo que pienses entá más. Tal paez que a David Rivas nun importa nada quedar mal coles persones más cercanes. Yo nun lu seguía muncho, aunque votelu dalguna vez, pero agora sí. Nun toi d'alcuerdo siempres pero costaríame recordar grandes discrepancies.

    ResponderEliminar
  8. Nun entiendo por que ser nacionalista tien de suponer l'apoyu y la admiración a Israel....

    L'estáu sionista nun ye una nación nin un país..ye un deliriu mesiánicu,racista, y criminal.

    Ye como si a los xitanos yos diera agora por inventar un país nel Rajastán indiu porque salieren dèllí va milenta años.....

    ResponderEliminar
  9. Palos na romería3 de junio de 2010, 18:51

    Como mos conocemos bien, namás pido que nun se entemezan les opiniones de David Rivas con otros debates. Lo que diz Rivas ye lo que diz Rivas, nada más. Y yo toi d'alcuerdu colo que diz.

    ResponderEliminar
  10. "Un nacionalista que, por más contradicciones qu’alcuentre, nun s’emocione escontra un país que se construe en diez años, debería revisar la so definición ideolóxica"...

    Perdone que insista Sr.Rivas, pero esi argumentu ye endeble y facilón...

    Prceisamente por nacionalista, creo nos pueblos y nos paises...y non nos inventos construíos en diez años....

    Admiro al pueblu irlandés, vascu, kurdu, etc,etc,etc,...

    pero eso son pueblos

    non se que pueblu ye el de un ashkenazí de Polonia y el de un sefardí de salónica, más allá de comapartir unes creencies o unes pretensiones....

    pretensiones "nacionales" teníen los nazis, y non por eso ,como nacionalista , me emociono con los sos delirios imperialistes.

    pretensiones tienen los afrikaners radicales , de crear una "nación boer", piquiñina, ente un mar de millones de "negros"....y non por eso me emociono.

    ResponderEliminar
  11. Cuanto más lleo a los anti-Israel más me veo pro-Israel. Comparar lo de los xudíos nos años cuarenta colos afrikaners diz bastante del que lo plantega. Un poco de racionalidá, por favor. Y si a los argumentos de Rivas salten con coses como les que firma "asturzale" (sic) ta muncho dicho.

    ResponderEliminar
  12. Por cierto Sandra, si yes tan pro-israel,indaga un pocu pela rede sobre les inciatives de apoyu a esi ente sionista-criminal que ta desendolcando esa figura de la política mundial llamada Jose Mari Aznar....

    el despreciu mundial al estáu terrorista de israel precisa de ser contrarrestáu con tolos apoyos, y el tuyu seguro que ye perimportante, xunto con el de otres figures prestixioses como Pilar Rahola y Jiménez-Losantos.

    Igual hasta puedes sacar unes perruques del Mossad...que pa los xudíos, por perres nun será!!

    ResponderEliminar
  13. "Soi antisionista" ye la fras cola que s'amazcaren anguañu los antisemites como esi asturtzale, pero enseguida se-yos ve'l plumberu.
    Éstos non son amigos de los palestinos, son amigos de Hamás y del integrismu islámicu y cada vegada los disimulen pior.
    ¿Sofitu a Gaza? ¿Pero quién gobierna con manu fierru, conviertiendo a les muyeres n'animales, executando homosexuales, prohibiéndolo too y tiranizando a tol mundu? Israel non.
    Tán colos bárbaros islamistes ¡Y dícense asturianos!¡Qué vergoña!

    ResponderEliminar
  14. Visto lo visto, de ciertos apoyos a un estáu criminal, xenocida, facista, racista, y bastante más peligrosu que la Sudáfrica del apartheid, quédame claro que quiciabes sí que existan esos seutores "sectarios e iluminaos" dientro`l nacionalismu asturianu, con los que nun hai Xuntanza que valga...

    por encima de Asturies, de les naciones, y de la familia, tan los principios, y a mi, la xente como la que dexa comentarios de apoyu al nazisionismu, produzme la misma repulsión y ascu que una camisa azul de la Falanxe española de las JONS, asina que Xuntances sí, pero baxo un teyáu claru de principios de cálter democráticu, ente los que tan la solidaridá colos pueblos que lluchen pola so llibertá...como Palestina o el Sahara.

    Nuna aldeaa global como la que vivimos, nacionalismu e internacionalismu, son cares de la misma moneda...la de la llibertá de los pueblos.

    yo xuntanzes con nazisionistes, iluminaos, y "sectes" rares.... nun les quiero nin en pintura.

    Cada vegada entiendo meyor postures como les de Zapico, Rafa Palacios, y demás....

    ResponderEliminar
  15. Anda, asturzale (nome definitoriu y estranxeru), vete a contar eso a los euskaldunes (dígolo pol to "asturtzale"). ¿Nun te val un "patriota asturianu? Non, nun te val. Tu yes un gallu nacionalista d'esquierdes. Paezme que nun saliste entá de les sayes de la to madre. Vese a les clares que yes un neñucu. Y si yes de más de vente años yes un poco tontu. Cuando vivas la vida y lleas unos cuantos llibos falamos. Y yo tengo 26 años, nun soi una maruxa.

    ResponderEliminar
  16. Vampirella...munches gracies guapa!
    dígolo por lo de "gallu nacionalista d'esquierdes"..eso ye un calificativu pa tar argullosu.

    Lo que nun ye motivu pa tar argullosu sería ser un "nacionalista amigu de reximenes xenocides".

    Soy algo mayorín que tú, pero con les ideges má clares....al menos con la diferencia ente nacionalista y nazionalista.

    Esi tonu despeutivu col que me mandes pa con los "euskaldunes" y la querencia supongo tengas por los "sionistes",( que deduzco de les babayaes y el tonu faltosu que emplegues conmigo ensin dar argumentos del tema tratáu ), expón a les clares que tú atopeste meyor na segunda definición.

    e

    ResponderEliminar
  17. nacionalista asturianu7 de junio de 2010, 23:08

    Ta claro que l'asaltu al barcu "humanitariu" per parte Israel del que salieron 8 muertos, la mayoría turcos, foi un actu bastante poco acertáu y mui torpe. Paez mentira pal Estáu d'Israel que caiga nestes coses, sabiendo como persabe que tien munchos güeyos puestos enriba d'él esperando que falle, esperando coses como l'asaltu a "la flotilla de la libertad".
    Agora bien, una cosa ye criticar la torpeza del Estáu Israelí o la falta de tactu que puea tener delles veces y otra ye ignorar qu'Israel ye la única democracia n'Oriente Prósimu y tien el llexítimu drechu de defender el so País y a los sos ciudadanos, emplegando la fuercia si ye necesario.
    Y toi dafechamente d'alcuerdu con esta frase de David:

    "Un nacionalista que, por más contradicciones qu’alcuentre, nun s’emocione escontra un país que se construe en diez años, debería revisar la so definición ideolóxica"

    Nun hai más qu'amestar a esa frase, ye una verdá como una casa. Lo que pasa que nesti País va tiempu que venimos asistiendo a una perversión del términu nacionalismu. Hai xente que se mete so'l paragües del "nacionalismu" y diz coses como qu'hai munchu empalmáu cola identidá, col autogobiernu, cola llingua...o que la llingua y la identidá nun dan pa comer...Entós vamos ver, una de dos, o nun tienen nin idega de lo que ye'l nacionalismu o son xente de la izquierda española infiltrao. Y col tema internacional, Israel, Palestina, "la causa árabe", Venezuela... lo mesmo, pa ellos el "nacionalista" ye'l que ta con HAMÁS, con Hugo Chávez, con Irán y colos talibanes. Dexái de refuxavos nel nome del nacionalismu asturianu y entamái a definivos como sois, internacionalistes, izquierdistes penribe cualesquier otra cosa, los herederos de la idioloxía de los Villa y Areces nos 80, esa que lleva fundiendo la nación más vieya del Estáu y una de les más vieyes d'Europa dende yá fai demasiao tiempu.
    Xuntanza del nacionalismu sí, pero del nacionalismu, non del internacionalismu qu'aprendió asturianu esta década.

    ResponderEliminar
  18. Así que el asaltu al barcu foi un actu "torpe"??..y además con "turcos"...
    en fin, con eses expresiones ya quedes retratáu..

    entrando nel debate so`l nacionalismu, paezme que la infiltración existe pero pa crear un cacao mental en xente como el nacionalista asturianu...

    Muncha xente de la que escribe estes postures a favor del nazisionismu criminal israelí, supongo que te o tuviere na órbita d'Andecha Astur, partíu que recueye nos sos entamos el internacionalismu y la solidaridá con les naciones ensin estáu...

    Infiltraciones ta claro que existen...sinon los cuatro chiflaos que apoyais a Israel nun tendríeis esi desquicie mental.

    Pa acabar de enlloquecer podeis siguir el procesu escuchando a jimenez losantos o leyendo libertad digital, grandes sustentos del sionismu criminal..

    ResponderEliminar
  19. Que sí "asturtzale", que sí, que tolos nacionalistes/patriotes que nun tragamos col cuentu l'internacionalismu proletariu, el comunismu y la "causa árabe" somos unos desquiciaos mentales. Venga, yá cumpliste col deber revolucionariu de quitanos la mázcara, agora yá pues dir de "txikitos" pel cascu vieyu Bilbao.

    ResponderEliminar
  20. Vixil...claro que diré de txikitos pel cascu vieyu Bilbao.

    y a tomar sidres a la cai Gascona cuando me pete, que gracies a Dios per equí entovía nun tenemos apartheid, nin muries que me lo impidan, nin checkpoints con terroristes sionistes disfrazaos de militar y veníos de Arxentina o Rusia, y que nun me dexen circular na mio propia tierra..

    y sí, "desquicie" mental ye el que tenéis dalgunos de esa secta, gracies a nun se que intervención (divina??)....

    el antisionismu nun ye cuestión de comunismu, nin internacionalismu...na más que humanidá ante un xenocidiu a cámara llenta...

    eso sí, naide me respondió como se conxuga esta postura prosionista col posible votu a partíos como AA que defenden la solidaridá coles naciones ensin estáu..

    esi ye el síntoma de que el desquicie mental que traéis,probinos, ye de llibru!!

    agur eta urte berri on!!

    ResponderEliminar
  21. ¿Qué sabes tu lo que voto yo? Voto nacionalista asturiano, pero non precisamente Andecha.
    ¿Tu qué votes? Nun me lo digas, aquel cuentu d'iniciativa internacionalista.

    ResponderEliminar
  22. Home, Asturtzale, tamién hai nacionalistes que sofiten a naciones con estáu, como Cuba, con munchu estau igual demasiao estau. Yo sí voto Andecha y nun me preocupa coincidir con xente qu'apoya a Israel. Too depende. Depende de los porqués y del tipu xente.

    ResponderEliminar
  23. Nada nuevo baxo'l sol nesta triste Asturies del sieglu XXI. L'"asturtzale" esti de xuru que te pue dicir cualesquier cosa nun correutu vascu normativu y depués suelta lo de "tomar unes sidres"...Como si los asturianos nun tuviéremos identidá nin historia (tanto o yo diría que más, con ellos tener un gobiernu nacionalista y too, sacante la estafa d'agora de López) pa tener que miranos en otres naciones o en otros pueblos.

    ResponderEliminar
  24. ya diba acabr con esti cuentu, pero dos coses:

    voltaire, yo "emociónome",(como diría Rivas )con munches naciones con estáu...brasil, méxico, el reinu xuníu si me apures..que sé yo.

    pero un estáu basáu nuna llimpieza étnica, que permite que cualquier paisano nacíu en cualisquier rincon del mundo, pol fechu de tener una determinada relixón pueda ser ciudadanu de esi país, negando en cambiu el drechu a un paisano nacíu va 70 años en Haifa retornar a la casa que lu vio nacer, nun ye respetable nin asumible dende una perspeutiva humana y democrática..más allá de izquierdes, dereches, ncionalismos, o feminismos...

    y al "xulio muñiz esti"...usando la so manera faltona de expresase, deci-y que "excusatio non petita accusatio manifesta".

    chaval, aquí naide faló de la hestoria e identidá de los asturianos en comparación colos vascos....yes tú el acomplexáu por sacar a colación un tema que naide punxo enriba la mesa.

    lo del nivel gramatical del asturianu que emplego...que quies que te diga...ningún babayu como tú va faceme acomplexar poles mios llimitaciones gramaticales, cosa normal creo yo pa una educación dafechamente en castellán..situación que espero los mios fiyos nun sofran, a no ser que la defensa la llingua quede en mentes tan probes y paletes como la tuya, lo que afortunadamente nun ye el casu

    ResponderEliminar
  25. Asturzale: yo nun quise meteme contigo. Soi un currante que nun pudo estudiar muncho. Pero se lo suficiente pa opinar. Igual ye verdá lo que dices, nun lo se, pero nun me paez que seya xusto nesti blog. Yo nun vi a David Rivas partidariu de dengún xenocidiu y sigo pensando que ye de lo meyor que tenemos. Que asturianos preocupaos por esti país mos engarremos por paises muncho más consolidaos que'l nuestru diz muncho de nosotros. Y pa David que p'alantre, que les pelees de los demás valen pero lo que valen.

    ResponderEliminar
  26. "agur eta urte berri on!!!"
    torna'l asturianu: "adiós y feliz año nuevo"?

    quedome ablucáu col nivelón qu'hai pela rede del nacionalismu asturianu. vaya imaxe damos ente toos. asina ¿quién va votanos?.

    ResponderEliminar
  27. Nun tengo tiempu pa extendeme lo que quisiere, pero ye una allegría ver que somos dellos los que nel nacionalismu Asturianu sofitamos (en mayor o menor midía) al estáu d'Israel ya'l pueblu xudío, siempres pensé que yera l'únicu ente toa esta llocura de proárabes ya "supuestos ateos" proislamistes...

    Almiro al pueblu xudío per munches coses, ente otres:
    - ser unos supervivientes
    - mantener la so identidá tres 2000 años de diáspora
    - ser un de los grupos étnicos que más aportaren al progresu la humanidá (el porcentax de premios Nobel xudíos ye ablucante).
    - costruyir un estáu prosperu ya llibre nuna rexón carauterizada nel caberu sieglu pol fanatismu, la involución ya'l odiu a occidente
    - ya por qué non dicilo, ser los enemigos del mayor enemigu d'Europa, el fundamentalismu islámicu.

    Un aplausu por sacar el tema de Turquía ya Armenia ya'l Kurdistán... ya lluéu los turcos atrevense a dar lleiciones d'humanidá...

    Ah, yo tamién llevo años preguntándome qué ye eso de la "causa árabe" ya entá nun lo sé.

    Por curiosidá, soi simpatizante "activu" (nun milito, pero suelo tar nos actos ya nes manis) d'Andecha Astur.

    ResponderEliminar
  28. Vaya, coño, que sigún van pasando los díes van apaeciendo más partidarios de lo que David Rivas diz. Eso ye bono, mui bono. Que a una persona tan moderada nes formes lu traten de poner a caldu desde posiciones islamistes comunistones ya mos val. Ná, David, a siguir amachucando. Son pocos y con poca cultura.

    ResponderEliminar
  29. Voltaire, yo nun traté de poner a David rivas "a caldu" en ningún momentu...ye más, aunque discrepe de algunes de les sos postures, lu respeto.
    Quixe centrar el debate exclusivamente na so afirmación de que un nacionalista ,como tal, debería sentise identificáu o sentir admiración por Israel.

    Ta claro que nun supe dirixir nin reconducir la cuestión...ente otres razones quizás debío al tonu absolutamente faltón y ensin más argumentación con el que la mayoría de los opinantes d'esti foru quixeron poneme "a caldu" a mi..
    ente otres coses curioses tratándose de "nacionalistes"..ehem...noté cierta poca "simpatía" polo "vasco"....(dígolo pola urticaria que paez produz esa figura lliteraria,metafórica e irónica de "Asturtzale")

    volviendo a la cuestión, y a lo que diz patriota ástur, yo opongo-y que :
    -el pueblu xudíu nun existe, como nun existe el pueblu budista o el pueblu cristianu, o el pueblu comunista

    -construir un estau prósperu y a llibre a costa del robu de tierres, la llimpieza étnica, el incumplimientu de la llegalidá internacional, y el xenocidiu de los palestinos(a cámara llenta, eso sí), pa mi nun ye muy almirable

    -reducir el tema al mieu al islamismu,sería como simplificar el casu irlandés a una llucha de católicos y protestantes, y también ye desconocer tola hestoria laica de la resistencia palestina (Fatah,OLP,FPLP,etc,etc); olvidar a la población palestina cristiana también victima de la expulsión y el exiliu; y cayer na trampa inducida por to'l poder mediáticu del lobby sionista, desviando la causa y les raices del problema.

    -la opresión turca so'l pueblu Kurdu, nun ye causa de xustificación de otra opresión.

    -por último que revise el puntu 10 de los entamos de Andecha Astur, y que si y causa dalgún conflictu éticu, que eche un vistazu pola rede a los foros y páxines de la ultraderecha española, que últimamente, y abandonado aquello de la "conspiración xudeomasónica", paez que tienen bastante querencia al estáu sionista...(al fin y al cabu tan machacando a los putos moros,non?)

    ResponderEliminar
  30. Val, Asturzale, tamos na mesma banda. Y Rivas tamién. Pero nun vas negar qu'esto d'Israel ye una discusión con muuncha tontuna.

    ResponderEliminar

Nota: solo los miembros de este blog pueden publicar comentarios.