Entamó’l mundial de fúbol


Hai unos díes, coincidiendo col entamu’l mundial de fúbol, dende L’Arribada organizamos un alderique sobro fúbol y lliteratura, alderique al que, por desgracia, nun pude asistir y bien que me prestare facelo. Siguí les intervenciones al traviés de los medios de comunicación xenerales y, particularmente, de la páxina web de la mesma asociación y de los intelixentes comentarios de Vicente García Oliva na de so. Y resulta que, como yera d’esperar, son noticies ya opiniones coincidentes nel tiempu coles critiques más dures a esti eventu esportivu y, riba tóo, al patrioterismu españolista que mos menancia pa cinco selmanes y que puede ser insufrible si “la roja” gana’l mundial.
A mín gústame’l fúbol y, anque me presta más una lliga d’equipos qu’un campeonatu pente naciones o pente estaos, soi a disfrutar d’un bon partíu d’un mundial. Pero tarrezo esa turria patriotera que venimos careciendo dende qu’España ganara la copa d’Europa hai d’eso dos años. Pero, como aficionáu a esti deporte, tampoco teo simpatía denguna polos que camienten que tolos que disfrutamos col mesmu somos una reciella descerebrao que se ximielga viendo a vente paisanos cuerriendo en gayumbos pertrás d’una pelota ya otros dos embaxo una rede intentando garrala coles manes.
Entiendo perfechamente a los que nagüen porque a España la eliminen cuanto antes meyor. Hailos qu’allampen por ello porque tan fartucos d’un “españoléu” insoportable. Ye más, yo cúntiome pente ellos. Si por mín fore, España debería ser eliminada por Olanda, p’arrepostiar a esi anunciu tan babayu de Cepsa que podemos ver nos periódicos dende van selmanes. Ye un montax del cuadru les llances de Velázquez, “La rendición de Breda”, nel que unos flamencos entreguen la ciudá, non a los tercios de Spinola, sinon a “la roja”, mui tiesa ella con banderes roxigualdes al vientu. Y l’eslogan ye daqué tan fato como esto: “volvemos ser los amos del mundiu”. Tanta prepotencia, petulancia y tochez nun se pue axuntar nun anunciu namái. Si la xusticia divina esistiere, la selección naranxa debería derrotar a “la roja” y, de pasu, remembrar que la guerra de Flandes ganáronla y que los españoles volvieron, famientos como siempres, a los sos secarrales mesetarios y, como escribiera Machado, “al sangre los toros y al fumu los altares”.
Hai unos años, cuando l’anterior mundial, Marcos Fernández Marqués, nes páxines d’“El Fielatu” –órganu d’aquella oficiosu d’Andecha Astur- escribiera, con motivu de la eliminación d’España, que víalo como una película l’oés. Cuando’l malu muerre d’un tiru allégreste anque munches vegaes persabes que’l que lu mata ye tan cabrón como elli. Paezme qu’entós España perdió escontra Francia, un estáu non precisamente poco patrioteru y non precisamente mui sensible a los drechos de les nacionalidaes que tién sometíes. Por eso lo traigo, porque sopelexa mui bien la situación d’ánimu d’un nacionalista. Nun mos peta que gane España pero, ¿qué pruyimos?. Si España gana, bona mos espera a los asturianos o a los vascos. Pero si lo fae Francia, ¿qué dicir de corsos o bretones?. ¿Y si gana una selección africana que representa a una etnia dominante o a una dictadura militar?. Y si lo fae, pongamos por exemplu, Méxicu, ¿qué pasaría colos mayes?. Con esos criterios vamos tener qu’apostar por Uruguai o Portugal o, entá más problemático, por Serbia o Estaos Xuníos.
Cuando yo yera estudiante taba mui mal visto ser aficionáu al fúbol y podíen echate del círculu intelectual progresista. D’aquella taba tóo perideoloxizao. Pero cuando’l Sporting visitaba Madrid –yeren los años gloriosos- pal campu que díbamos banderes azules y roxiblanques al vientu. Tóo yera una heredá franquista. El franquismu utilizó’l fúbol como analxésicu ya eso entá queda nun subconsciente zuniegu de dalgunes esquierdes. Por embargo, el fúbol ye una actividá enforma democrática. Yá lo dixe otres vegaes: un neñu d’una “favela” de Sao Paulo pue vese como Pelé o un rapacín na playa San Llorienzu vese como Quini. Pero dengún neñu que nun sía de clas pudiente pue vese como Schumacher o como Alonso, pilotando un ferrari. Ye más, siempres pue surdir un Maradona d’un barriu proletariu, pero difíle ye que salga un tenista d’élite. El fúbol ye la épica de los probes y de la clas media, esto ye, de la mayoría. Nun ver esto ye un “tic” d’una pretendía ya impostada aristocracia intelectual.
Y yá que tamos nel mundial de Sudáfrica, nun ta demás remenbrar lo que’l fúbol significó nel fin del “apartheid”. Los negros siempres foren aficionaos al fúbol porque los amos blancos monopolizaben el deporte tradicional, el rugby. Pos bien, na cárcele de Roblen Island, na que taba enzarráu Nelson Mandela, los presos políticos –col sofitu de la diputada blanca Helen Suzman, que siempres lluchare contra aquella indignidá- organizaron un campionatu de Sudáfrica. Embaxu l’abellugu la FIFA y coles sos régules fora’l primer ya únicu campionatu cellebráu en recintos carcelarios. Aquello sirvió pa una basa organizativa de los presos políticos. A finales de los setenta, dempués de los matancíos de Soweto, fundárase l’equipu Kaizer Chiefs, con xugadores negros mui influyíos pol pensamientu de Malcom X. El fúbol, escontra’l rugby, convirtiérase en banderín d’enganche de los xóvenes que, unos años más sero, diben valtar el réxime racista.
Cuando Mandela algamó la presidencia de Sudáfrica tuvo otru xeitu del mesmu sen: sofitar el mundial de rugby por equipos. L’equipu que representaba al país yera íntegramente blancu, el Springboks, odiáu por tolos negros. Pero’l presidente, col sofitu’l capitán del equipu, salió al campu vistiendo la odiada combinación verde y mariella. La selección de fúbol, con namás qu’un blancu, y l’equipu rugby, ensín dengún negru, sirvieron pa construyir un país desangráu y nel carel de la guerra civil.
Ye verdá –otra de les zunes antifuboleres- que tamos delantre de neñucos perbien pagaos y que, nel casu de “la roja” van arrecibir una prima descomanada si ganen el mundial. Pero esa crítica nun se tien de pies a poco que lo analicemos. Si esa realidá –igual inmoral, nun voi entrar nello- mos torga siguir el fúbol, ¿qué facemos n’otros ámbitos de la vida?. ¿Qué películes vemos?, ¿cuánto cobra Oliver Stone, Woody Allen, Brad Pitt o Susan Sarandon, por falar de xente de la esquierda norteamericana?. ¿Qué llibros lleemos?, ¿namás que a Xabiero Cayarga o a Miguel Rojo –pongo estos exemplos porque son dos autores que me gusten muncho- porque nun viven de la lliteratura?. ¿Qué música sentimos?, ¿o ye que Bruce Springtein o Sting tienen el caché de La Col.lá Propinde, por poner otru exemplu de les mios preferencies?.
Pa terminar: ayeri la Fundación Cruyff nauguró un campu fúbol pa neños y rapazos nun de los barrios más probes de Johannesburgu, el barriu de Hillbrow. Los xugadores olandeses aportaron del so bolsu más de cien mil euros. Y, más conocío, el Barcelona nun lleva publicidá na camiseta, lleva les sigles de la UNICEF. Ca vegada que salta al campu nun cobra sinon que paga a la organización de la ONX encargada d’esconsonar polos drechos de la infanza.
Ya una notina que paez poco importante, pero que lo ye pa miles de neños asturianos: David Villa dio la cara pola oficialidá. El mió sobrín, xugador na lliga xuvenil y ficháu hai poco pol Avilés, impresionárase más viendo a Villa col cartelucu que conociendo la historia’l so tíu, que lleva nesto más de trenta años. ¿Cosa triste?. Non. Ye la grandeza d’un deporte.
Imprimir

Comentarios

  1. David nun foi francia...el titular d'aquel fielatu ye inolvidable...GRACIES COREA!!

    ResponderEliminar
  2. You vou col Uruguái, porque pa la mia zona la xente salíu en bloque -con permisu de Cuba- pal pequenu país sudamericanu.

    Reconozo que na Eurocopa paselo bien con España, mentres xugaba, porque xugóu mui bien ya ganóu, pero nun pudi colas cellebraciones, cola afición vestida de "toreros" qu'a min cumo asturianu, nun me representa, inclusive ofiéndeme; pue que sía culpa mía, pero en fin, pue igual representame la bandera d'España, pero non, nunca, un "torero".

    Bandera d'España= Spanish torero = Nun me siento representáu.

    Nel Uruguái tamién se torea, pero nun yía cousa tan representativa de la cultura Uruguaya, nun ta nel tópicu.

    Ya eso, que you animo a la xente qu'apoye a Uruguái nesti mundial, yía una seleición d'un país pequenu, que xuega mui bien, ya esi país touvo hestóricamente una importancia mui grande p'aquella parte d'Asturias, la emigración a ultramar, ya especialmente pa los que somos del occidente.

    Puxa Uruguái!!!

    ResponderEliminar
  3. Un exemplu claru de que un posicionamientu co0mo'l de Villa val pa bastante. Copio lliteralmente.


    JORDI VÀZQUEZ
    David Villa, presentat ahir com a nou jugador del Barça i el darrer fixatge de la directiva de Joan Laporta té una cara oculta. Almenys ocultada pels mitjans de comunicació espanyolistes que manen al nostre país. Villa és conegut com “El Guaḥe” que en asturià significa jove. S’escriu amb el digraph “ḥ” conegut com a hac aspirada que és una peculiaritat de la llengua asturiana. Cal pensar que en asturià no existeix la lletra jota similar al que seria el de la has aspirada.
    La llengua asturiana, reconeguda com a tal arreu del món i només qualificada amb el nom pejoratiu de bable dins de l’estat espanyol, no és oficial. Motius?. Cap, a part de la mentalitat obtusa de qui creu en la supremacia del castellà sobre la resta de llengües. Cal pensar que un terç de la població parla la llengua que s’ensenya des de 1985. En l’actualitat fins a 20.000 escolars l’estudien i n’hi ha més de 230 mestres. Hi ha un setmanari “Les notícies” creat el 1996, ràdios, nombroses webs i una llei de normalització aprovada el 1998. Són arguments de pes pels qui, des dels Països Catalans a voltes menystenen aquesta llengua romànica. Haurien de fer un viatge a Asturies per conèixer aquesta realitat.
    Per tot plegat nombroses entitats fa anys que lluiten per l’oficialitat. Actualment són coordinades en el Conceyu Abiertu pola Oficialidá creat el 2005. Aplega 250 entitats. El passat 7 de maig va congregar 5.000 persones en una nova marxa en defensa de l’oficialitat.Una de les campanyes més el•laborades del Conceyu Abiertu pola Oficialidá ha estat la de “Yo doi la cara pola oficialidá”. Ja ha aconseguit que 10.000 persones es facin una foto amb el cartell de la campanya en favor de l’oficialitat de la llengua. Malgrat que la premsa espanyolista ho ha volgut tapar Villa ha estat una d’aquestes persones donant suport a l’asturià. Curiosament sí que ho va recollir la premsa britànica, en concret “The Guardian”.
    N.de la R.
    Villa entén perfectament el català i el parla una miqueta fruit de la seva estada al País Valencià.

    ResponderEliminar
  4. Si fuéremos llingüística y políticamente intelixentes, aguantaríamos esa parafernalia que tantu noxu nos da d'españolismu ranciu y cavernariu -y de la que ye prefácil esmucise- porque tenemos a un xugador de casa que ye un escaparate magníficu pa facer propaganda de la oficialidá de la nuestra llingua como amuesa'l comentariu anterior. Pero como nun somos intelixentes llingüísticos nin políticos emburriamos contra él pa exemplificar el nuestru refugu a esa parafernalia. Al final empozámonos un pocoñín más nel nuestru guetu, ayenos a la sociedá, ayenos a los nuestros propios intereses y ayenos a los de la propia llingua que queremos defender.

    ResponderEliminar
  5. Mui bien David pola foto de Villa dando la cara pola oficialidá. Hai otres páxines onde usen a Villa pa lo contrario, teniendo como tienen xugadores d'un nacionalismu español tremendu como pue ser Sergio Ramos. Neses páxines cuando un post entrugaba por eso rápido contestaron con un: ya tais cola llingua, ¿hai que querer a Villa por eso?

    Vamos ponenos un supuestu. ¿Qué pasaría si supiéramos que Villa a cada gol enseñaba una camiseta blanca con "oficialidá llingua asturiana" delantre de mil millones d'espectadores? Nun va pasar pero si pasara: ¿que más daba que besara l'escudu d'España? Como si glaya viva'l rei. Si eso fuera asina, qu'España gane el mundial y Villa marque cien goles.

    ¿O nun vos acordais de la imaxen de los dos negros puñu n'alto mentres sonaba l'himnu de los Estaos Xuníos nes olimpiades? ¿Nun fo un xeitu de la hostia?

    Por desgracia la conciencia de Villa (y de cientos de miles d'asturianos) nun ta tan desarrollada. Pero esi artículu en catalán que lleimos antes debería servir p'abrinos los güeyos.

    Un saludu, David. Sigues amosando una racionalidá que muncho falta nel nacionalismu asturianu.

    ResponderEliminar
  6. A mí el futbol no me interesa muncho pero ye verdá lo que dices. Hai munchu intelectualoide que se cree algo falando mal del futbol y de los fuboleros. Supongo que tendrán todos un palco na ópera de Viena.

    ResponderEliminar
  7. Conózote, David, tu vas con Inglaterra. Ye una pena que nunca tuvo porteru. El gol norteamericanu d'ayeri ye de risa. Y pa la felicidá de Diestru, tamién sé del to cariñu por Uruguai, onde trabayes muncho na universidá ya inclusu tienes hasta un afiyáu.

    ResponderEliminar
  8. H.e, h.e, ya te cazaron, profesor. Britain rules!

    ResponderEliminar
  9. Yá ví esi anunciu de CEPSA. Paezme que lu retiraron, dicen que, precisamente depués d'un toque de la embaxada holandesa. Ye verdá que ye una auténtica babayada. Yo creo que ye fácil qu'España se cruce en cuartos con Holanda (si pasen les dos). Taría guapo que, como dices, esistiera una xusticia sobronatural. Si pasa eso, voi pensar que como políticu un 5, como intelectual un 8 pero como profeta un 33.

    ResponderEliminar
  10. Siento salime del articulu escritu por David pero esto calientame.Vamos ver:
    ¿que fizo David Villa pol asturianu mas que facese una semeya?¿Usa la llingua nel so campamentu de branu?¿Usala nes entrevistes?¿que ye que por poner una semeya suya nun articulu escontra "la roja" ye atacalu a él? Ye que'l paternalismu de dalgunos diciendo a tol nacionalismu lo que ta bién y lo que ta mal dame un poco noxu. Siempre hai daquién que diz "nun vos meter con esti porque defende la llingua..." coime, yo prefiero la defensa del País!!!
    Nel so día, añu 2000, Iván Iglesias, Ricardo Bango, Cesar, Boris, Esteban y mas xugadores roblaron un comunicáu falando del respetu al asturianu y al gallegu-asturianu onun se qué, y nun veo qu'esta parte del nacionalismu moderáu los convirtiese n'heroes.
    A min prestame'l fúbol pola vida pero pa superheroes ya tengo los comics y les pelicules.
    Yo voi con Korea de corazón y con una final Holanda-Arxentina de cabeza.

    ResponderEliminar
  11. Yo nun sé si será intencionao, pero si lo ye, ta fecho mui bien. David Rivas llogra siempres que les engarradielles seyan perifériques a lo qu'el escribe. Pero en fin. Toi d'alcuerdo con David si non puntu por puntu no xeneral. Pero tamién tien razón Nacho: toul mundu escaeció aquel manifiestu fubolistes. Pero, Nacho, ties que reconocer que dengunu d'ellos tien el tirón mediáticu de Villa. Seguro qu'a tí, como a mi, como a Rivas y como a casi tolos qu'escribimos equí, tócamos les ñaples Letizia Ortiz. Pero tamién sabemos que si un día fala n'asturianu nel Campoamor sería un pasu importante. Tamos na sociedá que tamos, gústemos o non.

    ResponderEliminar
  12. Si claro que sé na sociedá que tamos y sé que quitando en medios catalanes y poco mas esi sofitu del Villa a la llingua ye obviau polos mass-media del imperiu. Que Letizia fale n'Asturianu sedría un avance pa la llingua, minimu, pero dalu pal país ¿quién va falar asturianu si el país muerre?¿Ye importante que se dean cursos d'asturianu en Madrí pa los emigraos o ye mas importante que los emigraos retornen? Ye una cuestión de prioridaes.
    Por ciertu la Letizia ya lleó una poesía asturiana anque la tornaron al castellanu, lo que tendría que ser causa d'ataque polos coleutivos pro-llingua, cosa que nun ficieron. Pero bono, ya la XPDLL tuvo una desbandada de xente hai unos años cuando, a espaldes de la militancia, tuvieron un alcuentro col principe d'españa...10 años depués siguimos ensín oficialidá.
    Repito y repitiré siempre que'l poder nun oficializará la llingua hasta que nun vea en peligru'l poder. Esto ye con un movimientu politicu que defenda en seriu la llingua, escaeciendo proyeutos oportunistes o posibilistes como IU. ¿Importa dalgo los seutores prollingua del PP, PSOE o IU? Non, la unica opción ye la de los partíos qu'amen al país y la so llingua. Cuando vea a los coleutivos prollingua moyase pidiendo'l votu unica y esclusivamente pa los partíos que defenden la llingua entós, y solo entós, camudaré la mio opinión sobre ellos. Quicias soimui agresivu pero llevando años n'esto ún ya ta cansáu de dexase engañar.

    ResponderEliminar
  13. Non, si yo pienso como tu. Precisamente por eso sigo les opiniones de David (y d'otros), porque tien les coses clares no tocante a la llingua y a la nación. Lluéu podemos discrepar notres custiones. Yo tamién toi cansu d'esto ya eso que nun soi mui mayor, toi na trentena. ¡Cómo nun tarán los qu'entamaron esto cuando yo taba naciendo! Un saludu, Nacho.

    ResponderEliminar
  14. asturiano sin complejines16 de junio de 2010, 13:59

    Esto no es nacinalismo, es "necionalismo". ¿Cómo se pueden decir tantas gilipolleces? Que si con Uruguay porque es más guay, que si con los ingleses, que si con los de más para allá...
    Llegan las votaciones y no sacais ni para cuarto de diputado. ¡Normal! Estando en Babia todo el día no se va a ningua otra parte.

    ResponderEliminar
  15. Con munchos complexinos16 de junio de 2010, 21:01

    Mira, Sincomplejines: si nun estremes l'humor de lo serio val más que nun opines, nin equí nin na to vida cotidiana. Esta nun ye una páxina nacionalista onde se busquen votos, ye la web d'una persona y de la xente que lo sigue. Amás, inclusive cola jota, los asturianos decimos "complexinos" y non "complexines", como los "culinos" y "culines". Vete colos tos "ensincomplejines" a otros sitios, a ser posible onde namás falen n'español. Nun val engañar, yá vos conocemos.

    ResponderEliminar
  16. Complejinos: ¿a que yes un comunista español? Pongo 1 a 4, como poco.

    ResponderEliminar
  17. la oficialidá algamaráse solo con un movimientu políticu nacionaliegu? Non, el techu elleutoral del nacionalismu asturianu ye mui pequeñu. Nel meyor casu 1 diputáu.
    algamaráse solo colos seutores prollingua de los partíos grandes? Non, fae falta una presión social fuerte fuera d'estos.
    La solución pasa pola combinación de les dos coses, un nacionalismu prollingua capaz y un seutor prollingua nun partíu mayoritariu, que será el pp pues en psoe y ix los favoratibles al asturianu tan más amarraos.

    ResponderEliminar
  18. Corina, acabas desplicar la conxunción Rivas-Gonzali

    ResponderEliminar
  19. Mui bien los comentarios últimos, los de Corina y Anónimu. Pero esi binomiu ye mui difícil de treslladar a lo político. Nin los nacionalistes son tan intelixentes como pa pensar que'l PP pue ser parte de la solución porque lo de la esquierda pésa-ys como una piedra, nin el PP entendería a los nacionalistes intelixentes porque pésa-ys muncho un españolismu tremendu.

    ResponderEliminar
  20. Pallos na Romería21 de junio de 2010, 20:02

    Corina, Anónimu, Vampirella: anque salió por casualidá, esti debate ye fundamental. ¡Qué seya pa bien!

    ResponderEliminar

Publicar un comentario