13.12.09

Somos lo que comemos

Ta a piques de presentase l’informe añal sobro alimentación del Ministerio de Agricultura. Supongo que tará a disposición del públicu pa finales de xineru o entamos de febreru. Los datos que nel informe apaecen, desagregaos por comunidaes autónomes, son la principal fonte información pa saber d’estes custiones. Y lo curioso ye facer una comparanza pente les conclusiones sobro alimentación y hábitos alimentarios y les apreciaciones subxetives que se caltienen polo xeneral.
Ye una opinión recurrente y machacono el falar de la calidá alimentaria del País Vascu y de Cataluña. Esta opinión xeneralizao descansa nuna realidá incuestionable: la calidá de los establecimientos públicos de restauración ye altísima en prácticamente tol tarrentoriu vascu y lo mesmo cabe dicir de Cataluña, anque equí ta mas concetrada la cosa en unos cuantos restaurantes de vanguardia.
Pero los resultaos del estudiu ministerial nun mos falen de restaurantes sinon del consumu nes cases particulares, de los vezos alimentarios cuotidiáneos de la población. Ya equí la discrepancia cola restauración surde mui clariquino.
Les comunidaes con meyor alimentación son, por esti orde: Asturies, Castiella y Llión, Cantabria, Galicia y País Vascu. Cataluña, pel so lláu, queda a distancia enforma d’estes cinco y, riba tóo, de les tres primeres. Haui munches razones que despliquen esto pero hai dos que tienen munchu pesu. D’un lláu la tradición gastronómica atlántica ta mui viva y, d’tru lláu, al nun haber ciudades mui grandes y caltener (sobre too Asturies, Castiella y Llión y Galicia) tovía abondo población en villes pequeñes y zones rurales, la xente come mayoritariamente en casa.
Esta razón apréciase claramente nos estudios comparaos n’Europa, onde Francia ya Italia tan a la cabeza de los bonos hábitos, porque la costume de comer en casa sigue siendo xeneral, dao que namás cuntien con dos o tres ciudaes con un tamañu talu que torgue conservar la tradición. Asina, nel casu l’estudiu que tratamos, Madrid, con una hostelería de calidá contrastable, presenta unos indicadores alimentarios mui perbaxo de les cinco primeres comunidaes.
Vamos ver dellos indicadores d’Asturies que mos amosa que non namái los asturianos comen bien ya en casa, sinon cómo caltienen vieyos hábitos culturales que determinen en bona mídía los resultaos. Por exemplu, siendo una tierra onde nun hai olivos, el consumu per cápita d’aceite d’oliva ye n’Asturies d’ocho llitros más que la media española. El consumu de productos llácteos tamién ta encabezáu nel ranking por Asturies, lo mesmo llechi que derivaos, particularmente los quesos. Tamién encabeza Asturies el consumu de pescao en fresco, con un pesu perbaxo la media d’especies de cultivu y superando con muncho la media consumu d’especies xabaces. Destaca, por exemplu, un consumu pixín de siete quilos por persona y añu. Y, pa finar, un consumu de tres quilos y mediu de mariscu tamién por persona y añu.
Evidentemente, nada vamos falar del consumu sidre porque entrar en comparances nun tendría xacíu. Pero lo llamativo ye qu’Asturies ye la segunda comunidá en consumu per cápita de vinos con denominación d’orixe, namás que pertrás de Baleares, onde’l turismu desplica la situación. N’Asturies son los asturianos los consumidores de vinu calidá. Y lo mesmo pasa coles cerveces de calidá, onde Asturies tien un tercer puestu, dempués de Cataluña y Madrid.
Si, como diz dalgún qu’otru antropólogu, cocinar fixo al home, Asturies sigue siendo un país mui humanu, igual, siguiendo con amargor a Nietzsche, demasiao humanu.

10 comentarios:

  1. Toi viendo esto mentres almuerzo lo qu'almorzaba mio güelu: un tazón de xocolate con pan y un vasín d'oruxu. Norabona a Rivas pol so blogue.

    ResponderEliminar
  2. El problema d'Asturies ye que pasín a pasu la tendencia va cambiando, faza una dieta más paecía a la de les zones más urbanes.

    Hai una cosa: la defensa y promoción del Gobiernu d'Asturies de les grandes superficies (claro, paguen un impuestu especial a l'autonomía) fai que la dieta empeore; y de pasu que'l paisanín del pueblu nun tenga (o cada vuelta menos) sitiu ú encaxar la so producción. Amás apaez efectu desincentivu nel campu asturianu.

    Grandes Superficies Comerciales= Ruina p'Asturies

    ResponderEliminar
  3. un amigu de fartures14 de diciembre de 2009, 11:44

    Equí casi tol mundu come bien y come muncho. Cuasi porque hai xente que-y presta la comida pero nun come nada, que ye como una pitina. Por exemplu... ¡David Rivas!

    ResponderEliminar
  4. Agora'l gobiernu PSOE-IU fae anuncios aconseyando comprar nes tiendes de siempres. Después d'años de sofitar les grandes superficies, multinacionales cómplices d'UGT y CCOO.

    ResponderEliminar
  5. David faltóte poner que somos los primeros , nel consumu d'oricios (por docenes y docenes , crudos y cocíos) .
    Ya lo diz el dichu "Xixón capital mundial del oriciu nel iviernu y nel branu"

    Un abrazu

    ResponderEliminar
  6. Sí n'Asturies la unidá de oricios ye la docena o la pala , en la sidra la unidá ye la botella o la caxa y como todo el mundo sabe lan unidá de güevos son dos. Un saludu.

    ResponderEliminar
  7. Me cuesta, me cuesta. Tenéis una lengua a veces enrevesada. Te prometí seguir el blog. La verdad es que es muy bueno. Eres capaz a ser crítico con casi todo pero, a la vez, tienes un tono muy sereno.

    A ver si nos vemos de una puta vez.

    Un saludo desde Lavapiés.

    ResponderEliminar
  8. David Rivas ye lo unico que tenemos. La xuntanza, sí, pero con Rivas al frente. Ye capaz de facer un discursu hasta cola comida. Pero, Marcos, Llope, Zapico, ¿nun vois days cuenta que ye lo que meyor tenemos?. Hai que comenzelu. Una candidatura pal 2011 con Rivas de unu. El Roxu ya tuvo munches oportunidaes.

    ResponderEliminar
  9. Veo que'l blogue ta animáu, cosa que me presta, como nun podría ser d'otra manera. Tamién veo qu'entren amigos, porque eso de que como tal qu'una pitina ye ocurrencia de dalgún collaciu. Por cierto, supongo que los oricios tan incluyíos nel mariscu, pero la verdá ye que nun lo sé.

    ResponderEliminar
  10. Oñes, Arcin, si toos hubieren comío oricios, nun habría bociu.
    Agora cola sal yodada, aquello de "una peseta por habitante y año", ya nun ye lo mesmo. Pero los oricios que nun nos los quiten, que tan perbuenos... si nun tan contaminaos, claro.

    ResponderEliminar

Nota: solo los miembros de este blog pueden publicar comentarios.