¡Por Asturies y Lleón!

Siguiendo les noticies que apaecen dende hai un par de selmanes sobro l’asuntu la “llionpedia” d’Abel Pardo, onde se xustificaba o minimizaba l’holocaustu perpetráu polos nazis, llamáranme l’atención delles crítiques haza la poca atención que se-y diera al asuntu dende les páxines dixitales nacionalistes y dende les mesmes organizaciones d’esta tendencia. El mio mesmu amigu –magar que non compañeru- Humberto Gonzali facíalo con nome y apellíu nun artículu tan realista como cargáu de mala hostia.

Evidentemente nun soi quien pa dicir qué ye lo qu’hai d’espublizar o non y muncho menos pa marcar les llínies editoriales d’eses páxines nin les estratexes o táutiques de les organizaciones. Dirixentes y militantes hai pa decidir eses llínies y xestores de medios de comunicación pa facer lo propio. Pero sí me prestaría facer una reflexón sobro delles custiones que me paecen importantes.

Ye mui normal pente nós –nesti difusu ámbitu nel que s’entemecen nacionalismos variopintos ya esquierdes non menos variopintes- amosar esmolecimientu por problemes de los llugares más alloñaos del mundiu, yá seyan los drechos de los mapuches o la causa zapatista o, especialmente, les llacerioses situaciones del Sahara Occidental y de Palestina. Evidentemente, claro ta, los asuntos de propio, los d’Asturies, son los más analizaos, espublicitaos y debatíos.

Ya esto ye de lo que quiero falar. Los asuntos de Lleón son muncho más nuesos que los qu’afleuten a los árabes o a los mapuches. Como eso nun quier dicir n’absoluto qu’escaezamos estos últimos, voi referime a los primeros. Y nun me val esi cuentiquín de que tamos falando de pueblos en llucha, cosa que nun se da en Lleón porque viven nel primer mundiu, comen tolos díes y disfruten d’una democracia polo menos formal. Y nun me val porque eses definiciones pa un lleonés valen tamién pa un vascu y bien que los problemes del País Vascu enllenen les páxines y los analises de les webs y de los partíos nacionalistes asturianos.

Asturies y Lleón –qu’inclusive cuasi lleguen ser una única comunidá autónoma, cosa que torgó’l falanxista lleonés Martín Villa- formen parte d’un mesmu pueblu, d’un mesmu etnos. Los astures d’Uviéu y los astures d’Estorga –como los astures de Santiyana- son una mesma cosa. Pasara munchu tiempu depacá y güei les alministraciones polítiques son otres y abondo inalterables pel momentu porque la identidá de caún fora forxándose a lo llargo d’una historia difícile. Asturianos y lleoneses sábense iguales, pero tamién sábense estremaos nesa igualdá.

Mui lloñe quedaran les dómines nes que los asturianos, fíos d’un país probe, pasaben el Payares pa dir segar a la tierra los campos góticos, cuando les sos focetes yeran perestimaes naquelles tierres de Lleón. Más cerca tan, pero tamién quedaran na historia, los tiempos nos que los lleoneses pasaran el Payares pa dir a trabayar a la siderometalurxa ya’l naval. De xuru que, lo mesmo qu’ellos yeran los “cazurros” del sieclu XX n’Asturies, los asturianos del XVIII ya’l XIX foren los “cazurros” en Lleón.

Tolos pueblos tienen los sos cazurros y con ellos faen chistes. Esos cazurros son, normalmente, los vecinos, y la crueldá graciosa ye más fuerte cuantisque más s’asemeyen. Ye por eso polo qu’esta crueldá graciosa ye perfuerte pente lleoneses, gallegos y asturianos, por exemplu, pero tamién l’alcontramos pente alemanes y austríacos o pente franceses y belgas. Nel fondo, tamos ríndomos de nós mesmos. De fechu, nos estudios que’l CIS fae cada poco sobro simpatíes y antipatíes y puntuando de cero a diez, n’Asturies namás que los lleoneses aprueben, con cuasi un seis. Pertrás, nada estraño, van los gallegos con un 4’8, nota qu’un profesor como yo daría como aprebao.

Nel presente los movimientos de recuperanza nacional asturianos son pequeños, tan dixebraos y lleven mui mal el trespasu xeneracional. Pola so parte, en Lleón entá tan pior porque ellí nin tansiquier cuntien con un movimientu bayurosu y bien afitáu na música o na lliteratura. Amás, nun namái que carecen d’una castellanización sinon que, pa enriba, tan xuncíos políticamente a la mesma Castiella, un país con mayor puxu demográficu y que dende Valladolid –perteneciente al vieyu reinu de Lleón- castellaniza machaconamente tol tarrentoriu embaxo la so xurisdicción.

Por eso apaecen dos coses a cuala más rara. D’un lláu, nos órganos d’espresión nacionalistes asturianos nun apaecen noticies de Lleón enxamás o sólo de xemes en cuando y siempres por motivos llingüísticos más bien de conteníu fatu o afatante. Y d’otru lláu, les rellaciones polítiques pente grupos políticos asturianos y lleoneses –nacionalistes o rexonalistes- son inesistentes.

Por embargo, la relación, a ser posible bona y granible, pente dambos llaos del cordal ye pernecesaria. Ya eso entama por una cosa tan cenciella como por que los medios escritos n’asturiano informen sobro Lleón, non namás que cuando surden tolaes como lo de les “camises pardes” sinón en tou momentu.

Y la cosa continúa col alcuentru d’interllocutores políticos que, dende’l respetu y la llibre autodeterminación, pongan en común los intereses de cismontanos y tresmontanos. Amái la cosa ye fácile. Somos dos pueblos que, na realidá, namás ye uno, pero, por si eso fora poco, ye que nun son dos economíes nin dos sociedaes alfrentaes sinon compatibles. Dende lluéu, Asturies tién una compatibilidá con Lleón que nun tién con otres comunidaes autónomes que tantes allabancies arreciben nes páxines informatives nacionalistes.

Igual un día se produz la xuntanza pente dos pueblos que borbones, afrancesaos y xacobinos separtaron hai sieclos. Pero, entrín y non, faigamos bien lo que tamos obligaos a facer. Nun abasta con qu’unos pongan la cecina ya otros la playa. Consiste en saber lo que ye una nación o, a lo menos, saber cuála ye l’ancestral nación de la que venimos.
Imprimir

Comentarios

  1. D'alcuerdu dafechamente. Nun teo más que dicir.

    ResponderEliminar
  2. D'un llau ta la tendencia al mimetismu coles "naciones fuertes" del Estáu y el nacionalismu de "tribus urbanes enfrentaes".
    D'otru llau ta'l nacionalismu qu'analiza, estudia los problemes reales de la sociedá onde actúa, y trata de ver oxetivos y intereses comunes: el nacionalismu que trata (que lo consiga ye otra cosa) de facer política seria.
    N'Asturies (supongo que en Llión y demás comunidaes vecines tamién) dambes maneres d'entender el nacionalismu anden a la tema. Nun sé si tendrá bona parte de culpa la falta de madurez de los sectores nacionalistes, polo menos nel nuestru casu.

    ResponderEliminar
  3. Nun tenemos igua. Cada vez qu'hai un artículu qu'abre debates importantes entren cuatro gatos nel alderique. Agora, si sal cualquier pih.ada llingüística pa dase d'hosties colos gallegos, o una babayada de si Chema Vega ye facha y coses asina, entós cincuenta entraes. Esti escritu ye mui importante, non polo que diz, sinon porque abre un debate d'importancia. Yo toi d'alcuerdu puntu a puntu pero si veo complicao lo d'Asturies lo de Llión ta tovía pior. Lo que tamién queda claro ye que David Rivas sigue siendo una de les meyores cabeces que tenemos pequí. Pero siempre saldrán los tocapelotes a falar mal d'el, non por nada, sinon porque siempre tuvo la manía de pensar pola so cuenta.

    ResponderEliminar
  4. Ye curiosu esi binomiu David Rivas-Humberto Gonzali. Resulta que práuticamente les dos úniques persones qu'aporten idegues interesantes pal alderique so Asturies son éstes. Ún proveniente del nacionalismu d'esquierdes y l'otru de la drecha españoliega.

    ResponderEliminar
  5. Pues pa mi ta claro. Primero porque son amigos y tan n'Arribada. Supongo que falarán d'estes coses y la xente cuando fala encuentra uniones. Por eso anda tan mal el nacionalismu, porque naide fala con naide. Amás si dalgo une más que la ideoloxía ye la intelixencia. Son dos persones intelixentes.

    ResponderEliminar
  6. Pues vamos a entamar. Yo toi d'alcuerdo col artículu. Pero, primero, les fronteres d'una hipotética xuntanza nun tan clares. Nun lo tan nin siquiera n'actual Asturies. Muncho menos en Llión. ¿Llión, Zamora y Salamanca?. ¿Toa Salamanca?. ¿Y Palencia?. L'actual Asturies tien la ventaya de que, quitando Sayambre y Valdeón, too ta bien definío xeográficamente: Cantábrico-Cordal y Eo-Deva. La provincia de Lleón ta tamién bastante clara. ¿Pero el restu?.

    ResponderEliminar

Publicar un comentario