¡Hola!, soi David Rivas ya esto ye La
Viquina.
Convídeneme a charar güei de fúbol, lo
cual allégrame muncho porque siempres que me llamen a la radio ye pa falar
d’economía o de política, una cosa abondo aburrío ya otra abondo absurdo. Y
quieren que fale de les mios esperiencies de cuando yo yera rapaz, del gran
Sporting de Quini y de Ferrero.
Yo tinía quince o dieciseyes años cuando
aquel gran Sporting ya entá me recuerdo perfeutamente de munches coses, como la
volea de Quini al Rayo Vallecano, de xuro que la semeya más repetía, non namás
que del fúbol asturianu, sinón tamién del español y parte del européu.
Recuérdome tamién del robu del Madrid. Fui pa casa ensín zapatos porque tiramos
tolo que podíamos, entamando poles almuadielles y acabamos tirando de tóo ya
yo, personalmente, los zapatos.
Yo naquel tiempu yera mui de Churruca.
Siempres tuviera muncha simpatía polos estremos esquierdos. Y nun ye de custión
política de lo que quiero falar. Churruca yera un gran xugador. Cantaba Silvino
Argüelles (sinón yera Silvino Argüelles sedría otru pero yo creyo que yera
Silvino) una tonada que dicía: “Churruca foi despreciáu pol Indauchu y pol
Bilbao/esos nun tienen nin idea/ye un xugador de cuidao”. Ya yera verdá que yera
un xugador de cuidao. Tuvo la mala suerte de coincidir nel tiempu con Gárate,
l’estremu esquierdu del Atlético de Madrid. Yera esti Gárate un gran xugador ya
entóncenes Churruca, a lo menos que yo sepa, nun fora nunca a la Selleición y,
si fue sedría un par de vegaes ya yo nun me recuerdo. Tuvo esa mala suerte:
coincidir con un gran xugador d’un gran equipu como yeran Gárate y l’Atlético.
Y lluéu, caro, ta Quini. Quini ye...
Quini. Quini ye nel Sporting tóo, fuéralo tóo y va siguir siéndolo tóo durante
munchos años. Pero había munchos otros xugadores. Yera un equipu tan ellegante
qu’envede llamalu Sporting de Xixón llamábenlu Real Smoking, pola ellegancia
cola que xugaba. Taba atrás Castro, na puerta, y lluéu taba Morán, taba
Ciriaco, Cundi, Tati Valdés, José Manuel, Joaquín, Redondo… Más lluéu vinieron
Doria y Landucci, al que llamábamos Patones, vino un pocoñín más tarde Maceda.
Y, caro, Ferrero. Ferrero, con aquel sangre que tinía cuerriendo pela drecha.
Pero tamién me recuerdo muncho de Megido,
Alfredo Megido. Yera un xugador estupendu pero… ¡yera un vagu! Yera más vagu
que la chaqueta d’un guardia. Cuando diba pela banda drecha y pegaba’l sol
pasaba pa la esquierda porque siempres quería xugar na solombra. Ya eso que
yera andaluz. Eso cuando nun se sentaba en medio’l campu... Yera tremendu.
Agora, cuando xugaba… cuando xugaba aquello yera un vendaval. Ye otru d’esa
triba xugadores malograos polos sos malos vezos. Asina tuviéramos otros dempués
nel Sporting que tol mundiu remembrará, que son más mozos. Dalgún entá da que
falar ya ye de pequí, de pa la parte Roces. Aquel Sporting fuera un equipu
tremendu.
Recuérdome de la seguramente última gran
cosa fecha pol Sporting, precisamente un vienres d’antroxu. Taba yo en Madrid y
representaben nun teatru una obra n’asturiano, que la representaba Lluís Antón
González. Yera La confesión, na sala
San Pol. Fuimos ver la obra unos cuantos. Díbamos tolos de Conceyu d’Asturies
que tábamos pellí entonces. Taba tamien xente de l’Academia García Arias ente
otros. El casu fue que cuando salimos entrugamos nun bar que cómo quedara el
Barcelona. El Sporting xugara nel Camp Nou. Y dixéranmos naquel chigre: “ganó
el Sporting 0-4”. Pensamos: “éstos sintiéranmos el soniquete, diéronse cuenta
del acentu asturianu y tan coñándose de nosotros”. Aparamos nel siguiente bar,
pel paseú La Florida, ya entrugamos: “oi, ¡cómo quedó’l Barça?”. “Perdió 0-4”.
Aquello fora más grande que Dios nel Sinái. Recalamos n’El Molinón, que con esi
nome…, d’ehi pa L’Escarpín y d’ehi a los pubes de Lavapiés. Garramos una moña
mui grande a la salú del Sporting. Yera un gran Sporting.
Recuérdome de coses tamién de más patrás.
Recuérdome mui bien de la primera vegada que fui al campu fúbol. Tovía nun taba
fecha la tribuna l’oés y xugábamos col Racing, seguramente qu’en Segunda.
Ganamos 1-0 y marcó Eraña, Eraña padre, Eraña’l vieyu. Fue la primera vuelta
que yo fuera a El Molinón. Debía tener cincu o seyes años y fui col mio padre.
A partir d’entós siguí diendo. Los últimos años voi menos porque con esta manía
que tienen de qu’hai que xugar partíos los llunes, los xueves, los vienres, los
sábados…, hai unes cuantes xornaes que tan nin siquier toi n’Asturies. Bono,
agora que baxamos a Segunda yá vamos xugar namái que los sábados y los domengos
ya entós podré dir más vegaes de les que toi diendo últimamente.
Por cierto, quiero facer un recuerdu nesta
selmana na que faen cincu años de la muerte de Manolo Preciado, el gran
Preciado, de xuru qu’ún de los paisanos más emblemáticos del Sporting xunta
aquella camada de xugadores que tiníamos nos finales de los setenta. Camiento
que Preciado ta nos altares del esportinguismu como pué tar Quini. Fora un home
que mos devolviera la ilusión, devolviéramos la fuerza, devolviéramos el
trabayu bien fechu, l’arguyu. Morriera’l probe entá mui xoven y dempués de
salir del Sporting, na mio opinión, non de mui bona manera por parte de la
directiva, pero sí quedando de perbona manera nel corazón de los
esportinguistes, de los aficionaos de Xixón y de toa Asturies. ¡Aquel 0-1 a
Mourinho! Eso valía un premiu Nobel d’economía o un poco más.
Munches gracies por escúchame con estes
cosines cuásique de vieyu. Soi David Rivas ya esto ye La Viquina.
Comentarios
Publicar un comentario