¿Una posible alternativa?

Nun sé cómo van les negociaciones, si ye que les hai, pente les organizaciones nacionalistes asturianes. Namás conozo les opiniones de les persones más cercanes personalmente y que –descartada yá la concurrencia en sestaferia del PAS y la URAS- llimítense a Andecha Astur y a Unidá Nacionalista Asturiana porque, por circunstancies históriques que tol mundiu sabe o comprende, nun teo muncha rellación colos miembros del Bloque por Asturies. De toles formes eses opiniones y les mios propies esperiencies faenme suponer dellos estremos, suposiciones que, asigún me llevante d’un humor o d’otru, llévenme lo mesmo a ser optimista que pesimista.

El discutiniu al rodiu d’una alcordada debe centrase nun programa común nel que queden claro tres o cuatro coses, tan cencielles como la oficialidá de la llingua asturiana, la reforma l’estatutu con plenes competencies, la categorización d’Asturies como nacionalidá, la posibilidá de reintegración d’aquellos conceyos y tarrentorios que democráticamente lo decidan ya’l bientar social y la equidá como programa basal de política económica. Dempués, embaxo esta declaración de principios, vendría’l programa concretu pa facer política nel día a día.

Pero tamién ye necesario entamar falar de lo que, paeciendo más simplayo, acaba por ser el gran pilancu d’esta triba negociación: la forma que se-y da a la opción ellectoral y los candidatos que la pueden encabezar. Cuando dende les organizaciones, les columnes de prensa, los blogues na rede o los alderiques na radio y na televisión dicen o dicimos qu’esto ye secundario, tamos mintiendo a otros o engañándomos a nós mesmos. Ta entamando payares y les ellecciones queden a tiru piedra, a poco má de cinco menses. Sé por esperiencia –viví en primera persona les negociaciones del 1999, del 2003 y del 2007- qu’eso ye mui poco tiempu y que, si nun se trabaya con regularidá dende agora mesmo, llegarán les prieses y, con elles, garrarán ventaxa los que nagüen por torgar cualisquier unidá –seya por un honráu masimalismu, seya por profesión de caballu troyán- y los que –seya por un honráu pragmatismu, seya porque siempres arrenegaron del nacionalismu- buscarán caminos fáciles y perandaos na gueta l’abellugu d’Izquierda Unida o d’una opción asemeyada que pué tar fraguando nesti momentu.

Nun se pué dir más alló de primeros de xineru ensin saber que va pasar. Les persones qu’encabecen una llista única –si ye que se da la posibilidá- nun puen esperar a abril pa dase a conocer. Tampoco se pué preparar un presupuestu financieru a vente díes d’unes ellecciones. Ye mester tener nomes y plan económicu pa primeros d’añu, ultimalo pa febreru ya entamar campaña en marzu. El “marzu nialarzu” sedría un bon momentu pa entamar a facer el ñeru.

Dende’l mio puntu d’agüeye, que, magar que discutible, atalanto que basáu nun fonderu conocimientu la realidá, les coses nun son fáciles. Y nun lo son, non namás –como cuasi siempres se diz- por custiones personales o, a lo menos non namás que personales. Hai tamién problemes de difícile solución. Por exemplu, si la xuntanza se produz pente AA, UNA y BPA, la cosa más lóxica una vegada que les otres organizaciones (PAS ya URAS) dixeron que nones, ¿cómo salvar el pilancu de los pleitos internos d’Andecha, la llamada “custión de les dos andeches”?. Porque equí nun tamos escontra la voluntá de los dirixentes de les dos llínies, a los que veo abiertos a la negociación. El problema ye que puede abastar un recursu d’una persona pa que los xueces intervengan y too acabe pior de lo que yá ta.

Tamién esiste otru problema, que namás tien solución si hai voluntá naquellos que tienen la ventaxa: el financieru. Nuna hipotética coalición de la esquierda nacionalista, una de les organizaciones, el Bloque, va cuntar con financiación pública pol fechu de ser partíu parlamentariu. Andecha Astur ya UNA tendrán, polo contrario, que tirar namás que d’unos recursos propios que son, como toos sabemos, escosos. Esto pon al BPA nuna posición de poder escontra cualisquier negociación. Y, por mui estupendos que mos pongamos no ideolóxico y se mos llene la boca de “patriotismu”, esta ye una realidá incuestionable. Y quien tien ventaxa va ponela enriba la mesa. Hai unos años, cuando toos yeran estraparlamentarios, namás que los que nun queríen ver la realidá custionaben la ventaxa qu’Andecha Astur tinía, pol so tamañu físicu y financieru, ya, en consecuencia, la so mayor capacidá pa poner condiciones. Agora ye’l Bloque quien ta nesa posición. D’ehí les mios reticencies, tal y como les sopelexé hai unos menses, porque camiento que’l Bloque nun va querer perder la so posición de supremacía, anque l’argumentación s’empobine más a la so esperiencia na política cuotidiana ya’l perfil del so candidatu más posible. Como a la esquierda siempres-y cafia falar de perres, siempres acaba argumentando otres coses que-y paecen políticamente más “presentables”.

Mentanto, la gran mayoría de los nacionalistes adiquen pa la situación pente esperanzaos y perplexos. Pero ye qu’inclusive hai una parte de la ciudadanía, non necesariamente nacionalista anque sí xenéricamente “asturianista” –mui bien reflexada nel artículu “Sí hai base social” de Xanu’l Caborniu- qu’entama mirar les coses d’otra manera. Les ellecciones vinientes van ser dafechamente bipartidistes y los que nun quieran participar nesa ceremonia nun-yos queda otra que l’abstención o, retacando los nefros, votar a Izquierda Unida. Pero hai una enchentona en bona parte de los ciudadanos, escontra un PSOE que pasa a la historia como’l primer gobiernu democráticu que rebaxa los salarios y les pensiones nominales ya un PP que durmi la sosiega mentres espera’l maná de votos y retrolica güei polo blanco y mañana polo negro. Nun ye casualidá que’l diariu “El Comercio” retirare la encuesta sobro’l debate d’orientación política porque, d’una miente amoriante, sofitaba les crítiques de Roberto Colunga. Igual munchos nun taben d’alcuerdo con elli, pero sí se daben cuenta de que yera la única crítica verdadera al simplayu y autocomplaciente discursu d’Álvarez Areces.

Por toes estes coses camiento qu’una posible alternativa ye encadarmar una agrupación d’ellectores. Nun toi diciendo que seya la solución ya sé que tien bien de problemes. Namás quiero plantegar una posibilidá cola qu’atayar dalgunes custiones tan enartaes como les reseñaes. Una agrupación d’ellectores resalva’l pilancu de les siegles ya unifica la financiación, cosa que nun va poder facer –lo más posible- una coalición.

Facer una agrupación d’ellectores requier recoyer firmes de ciudadanos, concretamente les de un unu por ciento de los inscritos nel censu ellectoral. Eso quier dicir que, si se quier presentar una opción política en tol tarrentoriu, hai de tener les firmes de les tres circunscripciones. Eso significa llograr unes 1.300 firmes nel occidente, unes 6.900 nel centru ya unes 700 nel oriente. Ye dalgo difícile pero puede algamase una organización potente pente los partíos qu’apuesten por una unidá y los ciudadanos y redes sociales que lo sofiten.

Una vuelta algamaes les firmes ya estructurada l’agrupación consiste n’alfrentase a los dos problemes de los que falaba: los candidatos y la financiación. El primer puntu pue resolvese con una convención onde se presente pal puestu quien quiera facelo o aú se-y proponga a otra persona la opción, persona que contestará lo que-y pete. Pue paicer mui complicao pero nun lo ye tanto: malapenes hai dos o tres candidatos “motu proprio” ya otros dos o tres posibles y que tan fuera de les organizaciones.

Polo que respecta a la financiación, la solución ye cenciella, si ye que tamos de verdá interesaos nuna alternativa asturiana y p’Asturies. Ye custión de facer un fondu coles aportaciones publiques del BPA, les perres d’Andecha Astur, UNA ya’l mesmu BPA, y les aportaciones de los ciudadanos de l’agrupación. El cálculu ye fácile nesti últimu casu: una amplia forqueta pente cien persones qu’apoquinen mil euros y mil persones qu’apoquinen cien euros. Nun modelu como el nuesu, nel que too cuesta perres, los discursos acaben midiéndose munches vegaes pol sacrificiu monetariu que se fae por elles. Si l’esitu d’una fuelga llarga mídese pola capacidá de perder salariu dementres esi tiempu pola parte los trabayadores, ¿por qué eso nun val pa los nacionalistes o pa los asturianistes?. La rimpuesta ye clara, sacantes que los nacionalistes asturianos –como podríen afirmar dalgunos esquierdistes internacionalistes- tean la llengua nos blogues ya’l corazón nel bolsu.

Por cierto, pa finar. Nun pierdan el tiempu faciendo llectures sobro la mio persona, porque nun ye’l casu. Yo teo mui claro dende hai un tiempu qué ye lo que votaría nuna especie “primaries”, una opción que, pal que me conoza un pocoñín, nun va resultá-y nada estraña. Abasta con pensar que teo unos añinos, soi nacionalista y soi d’esquierda.

Imprimir