Por favor, nun me toquen los conceyos

España tién 8.114 municipios. Si dividiéramos la superficie total del reinu ente esos ocho mil y picu ayuntamientos saldríamos una media de 62 kilómetros cuadraos pa caún. Conforme a esa media Asturies tendría 169 conceyos. Resulta que tién 78. Pero hai políticos y politólogos, cuasi tóos ellos de la rodolada’l PSOE, que dicen machacono que ye mester axuntar y concentrar, esto ye, suprimir conceyos. Pero si tolos conceyos asturianos foran iguales na so superficie tendríamos 78 del tamañu de Parres, Castropol, Llaviana, Mieres o Villayón.

Nel conceyu, como pasa nel sexu, el tamañu nun importa. Cangas del Narcea tien 823 kilómetros cuadraos y Noreña 5, lo que nun torga pa que los dos seyan  de los más saneaos económicamente del país. La obsesión pol “minifundiu” lleva a los políticos españoles a tracamundiar la realidá. Asturies, con Galicia y col altu Aragón, nun lleguen a tener términos municipales del tamañu de los d’Estremáura o Andalucía, pero tampoco lleguen a la llaceria de Castiella o Cataluña. Asina, la provincia de Burgos tién 371 municipios, 362 la de Salamanca, 310 de la Barcelona y 291 la de Zaragoza. Y Madrid, rompefoles de les Españes, tién 179. 

Cientos de municipios d’España tienen un tarrentoriu  de menos de 10 kilómetros cuadraos, cosa que n’Asturies namás pasa en Noreña y Muros.  Decenes de municipios tienen menos de 3 kilómetros cuadraos ya en Valencia hai ún, Llocnou, que tién 0,04 kilómetros cuadraos, 100 metros de llargo por 60 metros d’ancho. Tien una plaza, dos cais, 80 cases y l’edificiu consistorial. Había un bar pero peslló l’añu pasáu. Tamién tién una ermita, una farmacia ya un taller de costura, la industria llocal. El cimenteriu ta notru pueblu y l’augua potable ye de Valencia, de la capital. Mui cerquina ta otru municipio, Emperador, que, con 0,10 kilómetros cuadraos, cabría en La Escandalera.

La tendencia en dalgunes comunidaes autónomes nun ye precisamente la d’unificar sinón la de disgregar. Asina, Navarra, con una superficie asemeyada a la d’Asturies, tién una atomización municipal sosprendente. Cuenta con 272 municipios. Na rodolada de Pamplona hai tres pueblos que sumen, ente los tres, 5 kilómetros cuadraos: Villava, Burlada y Ansoaín. En Villava, patria de Miguel Induraín, nun caben nin les bicicletes. Tién menos d’un kilómetru cuadráu. Y Burlada algamó independencia en 1978. En Noreña, el conceyu condal, el más pequeñu d’Asturies, caben tres Burladas, cinco Villavas, sesenta Emperadores y ciento vente Llocnous.

De los 78 conceyos asturianos 57 superen la media d’estenxón de los municipios españoles. Cangas del Narcea ocupa’l puestu 21 por tamañu de to’l reinu y Tinéu el 39. Pela so banda, Carreño, Navia, Cuaña, Tapia y Les Regueres sedríen el municipiu mediu español. Y muncho perriba la media tan tamién, por orde y dempués de Cangas del Narcea y de Tinéu, otros dieciocho: Ayer, Valdés, Ayande, Ibias, L.lena, Casu, Somiedu, Piloña, Villaviciosa, Llanes, Cabrales, Salas, Grao, Cangues d’Onís, Siero, Quirós, Miranda y Ponga.

Ya otru asuntu pa terminar: la salubridá de les cuentes municipales. Vamos poner un exemplu. Los téunicos de la universidá uvieína, tan aficionaos a los mapes y poco avezaos a pisar la tierra, y mui averaos al PSOE, quiero recalcalo, proponen, ente otres coses, unificar conceyos en torno a La Pola. Vamos ver. Siero tién una delda d’unos 1.500 euros por habitante. Sariegu tien una delda d’unos 100 euros por habitante. ¿Vamos comer dende Siero a la xente de Sariegu?

Por favor, pola Santina, por racionalidá, polo que quieran, illustres políticos… Nun toquen los bemoles y dexen les coses como tan. Bona cosa ye que los servicios se faigan con mayor eficiencia, seya cosa d’un conceyu o de cuatro. Pero, por Belenos, nun me cofan más l’escrotu.