Resclavos del carlismu


Tengo’l placer de presentar el llibru de Javier Cubero “Del romanticismu al rexonalismu: escritores carlistes na lliteratura asturiana”, premiu Fierro Botas del añu pasáu y, pa mayor satisfacción, acompangáu del mio vieyu amigu Pepe Girón, heterodoxu ya incómudu profesor de la Universidá d’Uviéu. Dende la organización de L’Arribada, nesta vagamar de Xixón, recibimos con ciñu a Cubero ya’l so trabayu.

El carlismu ye un movimientu poco estudiáu y particularmente poco estudiáu n’Asturies. Hai profesores d’historia contemporánia que se detienen durante selmanes y selmanes docentes en episodios relativamente fugaces de la nuesa historia, como la revolución de 1934 o la constitución del INI, pero que nun dediquen unos minutos tan siquier a un movimientu que condicionó fonderamente’l ser de munchos pueblos como ye’l carlismu.

Pa entamar, cabe dicir que’l carlista ye’l partíu políticu más vieyu d’Europa. Con estremaes definiciones, tendencies ya escisiones, caltiénse vivu dende la década’l trenta’l sieclu XIX. Nin tan siquier el partíu conservador británicu tien tanta historia. Pa facenos una idega podemos apuntar que’l PSOE ye de 1879, la CNT de 1910, la UGT de 1888, el PNV de 1895, el PCE de 1921, ERC de 1931 ya’l PP de 1989. En segundu llugar –y asina lo escriben, por exemplu, Marx ya Engels na so “Revolución n’España”- ye un movimientu de basa popular. Y, en tercer llugar, ye un movimientu particularmente importante nes rexones al norte’l Dueru, nes que la espropiación de les tierres comunales, la llamada “desamortización civil”, pa engordar les faciendes de los terratenientes afines a la raina Cristina y a la so fía, la dempués Sabel II, punxo en pie de guerra a los campesinos.

Esta circunstancia desplica que, cuando les “carlistaes” tan finando, dempués d’una tercera guerra que yá nun diera más alló d’unes cuantes escaramuces, munchos de los asturianos que fueran vieyos partidarios del primer pretendiente al tronu, Carlos María, pasáronse en pleno a los partíos republicanos federales, mui especialmente a la Izquierda Federal de Pí i Margall. Del vieyu tueru foralista, y de xuru que con munchu penoriu por parte de los montones de cures y beatos que tamién yeran de gran pesu nel carlismu primitivu, surdiera una vivificante tradición democrática que tuviera como emblema paradigmáticu al primer alcalde republicanu de Xixón, Isidro del Río. Parte de la mio mesma familia fixera esi viax ideolóxicu.

Mirar pal carlismu ye mirar con otru lente la historia d’Asturies. La nuesa historia, la mesma formación de la sociedá asturiana, ye daqué más qu’una revolución fracasada y la gafienta dictadura franquista y, magar que nun lo veamos con una güeyada rápida, hai vida popular fuera de les organizaciones de la Segunda Internacional. Haila –y muncho- na Primera Internacional, la bakuniniana, y tamién nel antilliberalismu carlista.

Hai unos cuantos años, golismiando per una llibrería de vieyo madrilana, nel barriu Salamanca, atopeme con un llibru de Vázquez de Mella. Yera’l volume quintu d’una serie de 1923 cola que les Cortes Españoles, les d’Adefonso XIII, homeaxeaben al carlista cangués. Tratábase d’una collección d’artículos y llevaba como título xenéricu el de “Rexonalismu”. Merquelu –paezme que me costara quinientes pesetes- y senteme pa miralu un pocoñín nun café. Esbillara al debalu y, de sópetu, alcontré una fras que me llegó a l’alma. Esto ye lo que dicía’l conservador Vázquez de Mella: “la primer obligación d’Asturies ye “asturianizase”. Pueblu que pierde la so orixinalidá ye pueblu dexeneráu que reniega d’él mesmu al divorciase de los sos antepasaos”. Pos bien, cuála nun sedríe la mio sospresa cuando m’alcuentro con esta cita nel empiezu d’un de los capítulos del llibru de Javier Cubero.

Y aquel descubrimientu llevome a pensar na “inmaculada transición”. Nes primeres ellecciones, les de 1977, nun pudieron concurrir tolos partíos. Pudieron presentase tolos d’estrema drecha, drecha, centru, socialdemocracia, socialismu y comunismu carrillista. Pero nun pudo facelo la esquierda dura (MCE, LCR, ORT, PTE). Y tampoco dengún partíu que llevara la “R” de republicanu. Nun foran llegalizaos Izquierda Republicana nin Esquerra Republicana de Catalunya, pero nin tan siquier l’Alianza Republicana Democrática Española (ARDE), que yera un partíu republicanu burgués de centrodrecha. Con eso pretendía la nueva monarquía que tol votu d’esquierda quedara nel PCE y tola memoria republicana nel PSOE.

Pero ye que tampoco pudo llegalizase’l Partíu Carlista. Y con eso pretendía la nueva monarquía heredera de Franco que los carlistes progresistes s’averaran al PSOE, los más cafres votaran AP y los más federalistes engromecieran les macones del PNV, qu’arrenunciara inclusive a la heredá del “lehendakari” Aguirre y aceptara una autonomía delegada ya otorgada por Xuan Carlos I. Y, de pasu, favor por favor, el carlismu quedaba derrotáu definitivamente pol xuanismu ya’l xuancarlismu.

Volviendo a Asturies y al llibru de Cubero –que ye lo que mos aconceya-, nun ye la primera vegada que se fala de los autores carlistes na nuesa lliteratura. Yá lo fixera hai unos años Sánchez Vicente ya un poco más sero Pablo San Martín. Y los dos dicíen, como apunta agora Cubero, que tratábase d’un movimientu políticu y lliterariu de resistencia a la uniformidá, una resistencia que lu facía, por eso precisamente, mui popular.

A la escontra, alfrentaes a tolo que yera diferencialidá, taba la burguesía financiera urbana –foriata toa ella- y les organizaciones obreres ya esquierdistes en xeneral, sacantes de dalgunos grupos republicanos federalistes, de dalgunes loxes masóniques y de dalgunos sindicatos anarquistes. Nun hai d’escaecer que, en 1937, cuando’l Conseyu Soberanu taba deliberando sobro qué faer, milicies del Partido Comunista de España taben asitiaes n’El Parchís p’afusilar a los conseyeros si decidíen proclamar a Asturies soberana y ruempíen cola república española.

El percorríu que Cubero fae pelos autores qu’elli califica como “carlistes” ye discutible. Carlista a carta cabal ye Acebal, el meyor poeta pente los clásicos na mio modesta opinión, pero yá nun diría yo tanto de “Don Manolín”, l’obispu Fernández de Castro. Evidentemente comparte con Acebal un romanticismu cuasi estremu ya una fe católico duro ya ensin resquiebres, pero nun teo yo tan clara la so afinidá carlista. Veólo más probable en García Rendueles y volve pareceme mui forzao en Fernán Coronas. Tóos ellos son tradicionalistes, antilliberales –curiosamente lo menos antilliberal qu’alcontramos nesti cuelmu ye l’obispu- pero nun queda claro –y Cubero nun ye a demostralo- la so filiación político.

Alcuérdome d’una viñeta humorística d’un periódicu asturianu –igual yera del mio amigu Neto pero nun lo sé- que me prestó muncho. Víense dos dirixentes del PP –pámeque Cascos y Rozada- ya unu dicía: “¿qué problema tenemos cola llingua asturiana, si tolos qu’escribieran nella yeren de dreches como nosotros?”.

Voi terminar. L’otru día lleía nel periódicu “El Mundo” un artículu de Joaquín Bardavío pola mor de la muerte de Carlos Hugo de Borbón y Parma. Dicía, testualmente, lo siguiente: “el reciente fallecimientu de Don Carlos Hugo de Borbón Parma supunxera la desapaición del últimu pretendiente carlista qu’enarboló esa bandera absolutista ya insurreccional que provocó tres guerres civiles y participó activamente n’una cuarta, la de 1936-1939”. Igual nada que dicir sinón fora porque Bardavío trabayó pa los servicios secretos de Franco –a les ordes del coronel San Martín- y fora un palanganeru del autoproclamáu Xuan III y, más sero, de Xuan Carlos I.

A la escontra, Carlos Hugo, muertu hai unes selmanes, dexó esta manda a los suyos: “que sigáis p’alantre col nuesu proyectu de llibertaes, espresión moderna de los antigos fueros”.

P’acabar…, una confesión. Javier Cubero fíxome una dedicatoria’l so llibru qu’igual hai unos años nun diba ser a entendela, pero güei sí: “a David M. Rivas, teóricu de la esquierda tradicionalista”. Veome bien nesa categorización. Cuasi me pide’l cuerpu glayar ¡viva’l rei!.

Comentarios

  1. El carlismo fue liquidado por Franco y su gobierno filonazi en 1937 con el decreto de unificación. El líder carlista, Fal Conde, pagó con cárcel y exilio su insumisión al caudillo. Pero algunos "carlistas" de nuevo cuño bien que cobraron por sus traiciones. Algunos carlistas se arrepintieron amargamente de haber luchado en el bando equivocado en la guerra civil. Pero la historia es lo que es y no pasa dos veces.

    ResponderEliminar
  2. La historia asturiana ye l'asignatura pendiente qu'enxamás acabamos d'encetar d'una vez por toes.
    Dientro del desconocimientu xeneralizáu d'ella, el carlismu tal paez que nun esistiere. Y esto ye pergrave porque, arriendes d'otres cuestiones, nél alcuéntrense los antecedentes de les reivindicaciones asturianistes culturales, llingüístiques y polítiques. D'otru llau, el calificativu que comentes de "izquierda tradicionalista" nun ta nada mal teniendo en cuenta que dende la "otra izquierda" el fechu diferencial asturianu atácase y tórgase de contino.
    Norabona a ti por esta presentación y a Cubero pol llibru.

    ResponderEliminar
  3. El desconocimientu del carlismu, como de munches otres coses, ye un robu programau polos uniformadores y centralistes. Y a ello collaboró siempres la esquierda (PSOE y PCE) col so cuentu de que la identidá yera burguesa y reaicionaria. Y güei dalgunos que se llamen "nacionalistes" tan col mesmu discursu. Nun soporten les opiniones identitaries d'un nacionalista d'esquierda históricu como Rivas aunque entá nun lleguen a llamalu facha, pero too s'andará. Nun soporten tampoco qu'haiga xente de dreches como Humberto Gonzali que defienda l'asturianu y la oficialidá. Nun son identitarios pero quieren la llingua pa ellos solos. Tomen a chifla a Javier Cubero porque eso del carlismu ye una tontada decimonónica. Como si lo d'ellos fuera del sieglu XXIII. Llamen burgués y interclasista a Xuan Xosé como si los dirixentes d'UNA, d'Andecha y otros fuesen toos ellos proletarios. Vaiyos más lo de Cuba (escaeciendo que lo de ¡patria o muerte! ye'l gritu castrista por escelencia y non ¡arriba parias de la tierra!) o lo de Evo Morales, que basa tol so programa na etnicidá y la revindicación del territoriu del inca. En fin, xente coherente como vemos.

    ResponderEliminar
  4. Toi d'alcuerdu con In Hoc Signus pero matizando. Andecha Astur sí ye una organización claramente nacionalista. Tendrá comunistes dientro pero comunistes asturianos. Toño Martínez escribió hai unos díes una defensa del ocho de setiembre con argumentos mui paecíos a los de Rivas. Y ye quien lleva Infoasturies y ye home importante na organización agora. Amás Rivas ya tinía esi discursu cuando encabezaba Andecha y nun tuvo ningún problema. Repitió como candidatu y lo mesmo cuando Europa de los Pueblos. Esi problema cola identidá tienlo la UNA y el Bloque, onde los nacionalistes son cuatro y perdiendo fuerza cada día. Nun confundamos. David Rivas y Andecha Astur son nacionalistes. Los demás non.

    ResponderEliminar
  5. D'alcuerdu dafechamente. Nunca David tuvo problemes n'Andecha. Tolo contrario. El fue'l primeru en dicir lo de "reinu d'España". El primeru en tol nacionalismu asturianu. Paecía antiguo pero la xente d'Andecha asumiólo y güei dicenlocuasi toos los nacionalistes. La conesión de David con toos nosotros fue siempres perbona. Nunca duldamos d'el nin el de la organización. Diferencies abondes pero yéramos una organización democrática. Yoya toi fuera pero tienes razón: David ye un nacionalista (d'esquierda)y Andecha tamién. Los demás que miren bien que ye lo qu'escriben o declaren.

    ResponderEliminar
  6. Estimáu David:

    Amás d'agradecete la perguapa presentación que ficiste del mio llibru quisiera matizar dellos aspeutos d'esti testu:

    Nun creo que a Vázquez de Mella prestaría-y que definiérenlo como “conservador”, de fechu esiste una constante hestórica en dellos intelectuales carlistes de separtar el tradicionalismu del conservadorismu. Tantu nel estáu español como nel francés esistió una clara separtación ente tradicionalistes y conservadores dende'l sieglu XIX hasta los entamos del XX. Mientres que'l conservador defende'l status quo esistente, el tradicionalista aspira a camudalo inspirándose en determinaes tradiciones d'un pasáu idealizáu. Asina nel ámbitu francés los tradicionalistes van ser los monárquicos lexitimistes, siguidores de la caña primoxénita de la Casa de Borbón y partidarios de la centenaria bandera blanca como símbolu de la monarquía francesa, mientres que los conservadores aceptaben la bandera tricolor y fueron sucesivamente partidarios de los Orleáns, de Napoleón III, y finalmente acabaron aceptando la República.

    Les bases carlistes con mayor conciencia “identitaria” que na década de 1970 integraronse en distintos nacionalismos sub-estatales mayoritariamente nun s'inclinaron pol PNV, anque una parte si terminara ehí. Les migraciones más numberoses dirixiéronse principalmente a CIU nel casu de Catalunya (especialmente nos pueblos de Lleida), y a HB nel casu de Euskalherria (particularmente nel norte de Nafarroa y na fastera rural de Gipuzkoa).

    Centrándonos en los escritores, nel casu del obispu traductor “Don Manolín” Fernández Castro per parte de distintos autores viene asitiándose-y nel ámbitu explícitamente carlista. Por casu Antón García afirma que “simpatizó col carlismu” (“Prólogu”, en Xuan María Acebal, Obra poética, Alvízoras Llibros, Uviéu, 1995, p. 27) y Álvaro Ruiz de la Peña defínelo abiertamente como “carlista” (“Poesía y mentalidaes na Asturies del sieglu XIX: la obra de Xuan María Acebal”, en DD.AA, Xuan María Acebal (1815-1895. Cien años depués, Serviciu de Publicaciones del Principáu d’Asturies, 1995, p. 31). García Rendueles foi capellán de la Xuventú Xaimista de Xixón (el Partíu Carlista tamién foi conocíu ente los años 1909 y 1931 como Partíu Xaimista). Y respecto al padre Galo yo mesmu nel mio llibru explicitó les duldes que tuvi a la d'incluyilo (anímeme namás dempués d'escuchar una conferencia d'Antón García sobre él):

    ResponderEliminar
  7. “De los cuatro autores de los que trata esti ensayu, foi precisamente el padre Galo l’únicu sobre quien tuvi duldes a la hora d’incluyirlo o non. Antón García (que nun escaecemos que ye’l principal especialista na so figura y na so producción lliteraria) anque nel pasáu situare políticamente al padre Galo como monárquicu alfonsín, nel marcu del I Congresu de Cultura Xaponesa d’Uviéu («Asturies y Xapón, Fusión de Cultures») impartió una conferencia na cual definió a Galo como un asturianista simpatizante del carlismu. Lo cierto ye que’l marcu ideolóxicu del padre Galo (monarquía federal pa les Españes, romanticismu tardiu, social-católicismu, patriotismu asturianu, historicismu, etc) entronca dafechu cola cosmovisión carlista tando nes antípodes de los presupuestos ideolóxicos de los monárquicos alfonsinos, los cuales enxamás abandonaron la concepción centrípeta d’España. Amás nos años 1920 y 1930, precisamente la dómina onde’l padre Galo escribe n’asturianu y desendolca la so visión nacional d’Asturies, los monárquicos alfonsinos inclináronse por opciones cada vuelta más autoritaries y chovinistes que descartaben cualesquier opción descentralizadora. Asina la Dictadura de Primo de Rivera disolvió la Macomunitat catalana. Y cuando aporte la II Republica gran parte de los monárquicos alfonsinos entraran nun claru procesu de fascistización. Polo tanto ye inconcebible una afiliación política d’esti tipu nel padre Galo. En cambiu, tuviera o no venceyáu al carlismu , lo que ye innegable ye la so pertenencia al mundu ideolóxicu del tradicionalismu rexonalista como la so condición d’heriede y continuador del proyeutu lliterariu d’autores carlistes como Acebal. Un datu de cierto interés n’esta direición ye que publicó poemes en El Amigo del pobre , publicación d’afiliación carlista según San Martín .”

    Un saludu
    Javier Cubero de Vicente

    ResponderEliminar
  8. Munches gracies, Javier, poles tos precisiones. Como siempres tendreles en cuenta pa otra ocasión.

    ResponderEliminar
  9. Muncha razón tenéis dalgunos. Nun se si lo de la "esquierda tradicionalista" val o non. Igual ye una cachondada de David. Tienmos acostumbraos a estes coses. Pero lo cierto ye que yá ta bien de tantu falsu nacionalista ya inclusu tantu falsu "asturianista". Aquí guste o non namás esiste Andecha y PAS. Eso d'UNA y del Bloque, Valledor, el diputáu Colunga (como fusila la llingua asturiana el probe) ye nada. Y como'l PAS nun quier saber nada de la esquierda pues acabose too. Seremos cuatro y mal aveníos pero somos. Lo demás nun lo ye, asina de claro.

    ResponderEliminar
  10. Nos últimos tiempos tamos centrando les coses. El nacionalismu ye por definición identitariu. Quien lo vea como ferramienta pa una revolución comunista ta alloriau o quier engañar. Hai nacionalismos de drecha y d'esquierda, claro. Pero pa ser de dreches o d'esquierdes primero hai que ser nacionalista, lo que ye ser patriota. Eso David Rivas tienlo más que demostrao. Los demás que lo vayan demostrando.

    ResponderEliminar
  11. Lo que ta pasando caberamente,colos comentarios nesti cuadernu mete mieu.Que falta de respetu y qu'infantilismu . Que pijaes que si esti ye pero l'otru non y aquel otru muncho menos . De dolor y pena .Que pena porque David ye una persona considerada y de valir pa tolos nacionalistes si , si home si pa toos.Pudi comprobalo , falando con xente de la UNA y del Bloque y con nacionalistes de llarga militancia(nun voi dar nomes que si non , entama salsa astur rosa). Pero toos cuenten con David y tan esperando a ver que pasos da . Yo tamién toi esperando y el sabelo . Dexái les pijaes pa prau , ye la hora de facer país a comuña y pa esa xera nun sobra nin dios . Tamos nes diez d'últimes ,los que dais lliciones de patriotismu aquí demostráilo.
    Como diría Nelson : Asturies espera que caún d'ustedes cumpla col so deber
    Churchill

    ResponderEliminar
  12. amén a esta cabera entrá. pa qué dicir más. saludos Daviz

    ResponderEliminar
  13. Amén, amén. Siempre lo dixe: David Rivas ye la clave. Y si nun quier hai qu'obligalu.

    ResponderEliminar

Publicar un comentario