Europa de los Pueblos (2)

Total, qu’esa decisión de dir n’Europa de los Pueblos y col mio nome de banderín fora pa mín un pasu perimportante, tanto no personal como no colectivo. Yera perimportante de verdá, ensin esa manía que tenemos de facelo tóo “perimportante”, que tal paez que n’asturiano nun esiste la palabra “importante”. Yera, repito, perimportante porque taba franciéndose con una historia cafiante d’aisllacionismu políticu y, a un tiempu, sopelexábase qu’Andecha sabía llegar a alcordaes y nun yera esa organización repunantuca cola que yera imposible apautar nada que presentaben dalgunos. Ye verdá que los pautos fuera d’Asturies yeran más fáciles que dientro, onde les coses taben encanallaes ya onde’l cainismu yera moneda corriente, pero la coalición significaba un pasu fundamental.

Cuando les coses taben encadarmándose y yá se taba preparando l’aconceyamientu de Sansebastián, onde se diba escenificar la robla d’Europa de los Pueblos, la Chunta Aragonesista plantega al restu los socios la intención d’Izquierda Asturiana de participar na coalición y la inconveniencia de que’l sociu asturianu fuere Andecha. Paez ser que militantes de les mocedaes d’IAS calteníen rellaciones coles de la Chunta dende la so participación nunes xornaes de llingüística. Esquerra Republicana ya Eusko Alkartasauna nun taben dimpuestes a enguedeyase n’asuntos que nun-yos afleutaben ya decidieran que, enantes de metese en fregaos y tener encontronazos cola Chunta –sociu dende l’entamu y con un potencial de votos que nin de casualidá díbamos sumar n’Asturies-, meyor tirar ensin la impresentable tribu de los astures.

Entóncenes plantegáronmos una única posibilidá: qu’Andecha ya IAS llegaran a una alcordada pa dir na coalición, na que, en principiu, tiníamos un puestu cuasi testimonial. Aquello yera caminar a una triba rara d’unidá, forciada dende l’esterior, una converxencia qu’entós yera imposible de tou puntu. En viéndolo, aceleramos la recoyida firmes pa poder presentamos en solitario. Otra vuelta fixéramos el peregrinax pel sureste de Madrid y pel País Vascu. Ya otra vuelta arrecibimos los sofitos d’ HB y del PP, pero agora también dellos del PSOE, los de los vieyos militantes del PDNI madrilanu que pasaran a les files socialistes cuando la disolución del so partíu. Mientres se desendolcaben conversaciones con Barcelona, especialmente por parte de Pin Bermeyu pero tamién míes, fuimos axuntando avales y, a dos díes del pieslle de candidatures, tiníamos los cincuenta. Andecha Astur, en solitario o n’Europa de los Pueblos, diba tar nes ellecciones.

El caberu día, a eso de les siete la tarde –la Junta Electoral Central pesllaba a les doce la nueche-, tomando cafés y dalgún qu’otru gintonic embaxo la maraviosa cúpula del hotel Palace, por frente al Congreso de los Diputados, arrecibí una llamada de Fernández Marqués, secretariu d’organización. La coalición diba ensin nosotros ya ensin IAS. Había de presentar la candidatura, encabezada, dempués de la muerte d’Álvarez Fernández, pol segundu de 1999, Antón Fuertes. Taba cruzando la cai cuando me llama Arturu Bermeyu, secretariu xeneral. Nuevu parón porque taba faciéndose un últimu intentu directamente con Carod-Rovira. Vuelvo al Palace. Una hora más sero llámame otra vuelta Fernández Marqués: la intervención de Carod-Rovira nun camudara la decisión de la coalición. Yá taba nel Congreso cuando m’allega una nueva llamada del mesmu Fernández Marqués: hai d’esperar porque tovía ye posible l’alcordada. Otra caminatina pal Palace , que yá paicía yo Aramburu Topete na nueche’l 23 de febreru, y a esperar noticies.

A eso les nueve la nueche otra vuelta col teléfonu. Esta vegada ye Pin Bermeyu cola noticia pola que naguábamos: vamos na coalición. Pesie a la seguridá que Bermeyu me da, confirmada dempués por un muncho más escépticu anicialmente Fernández Marqués, decido cenar nel cercanu Ateneo de Madrid y dir al Congreso a les doce menos cuarto cola candidatura d’Andecha en solitario. Pido información d’Europa de los Pueblos y veo que’l mió nome ta na llista. Finaba’l procesu. Andecha Astur diba a les europées con Esquerra Republicana de Catalunya, Eusko Alkartasuna, Chunta Aragonesista y Partido Socialista de Andalucía.

Al mio paicer, la estratexa de los cabezaleros d’Izquierda Asturiana yera mui clara. Nun tiníen denguna intención de presentase a les ellecciones –que se presentaren sedría francer cola so perafitada tradición- y dába-yos lo mesmo lo que fixere Andecha Astur nunes ellecciones poco significatives. Pero la presencia d’Andecha na coalición Europa de los Pueblos dexábalos en mal llugar por dellos motivos. D’un lláu desvirtuábase la historia de qu’Andecha yera un grupu “asturchale” incapaz de llegar a alcuerdos con naide. D’otru lláu Andecha revistíase del oropel de nacionalismu modernu y progresista qu’IAS siempres consideró padremoñu suyu n’esclusiva. Y, pa finar, esa coalición podía significar l’emburrión definitivu pa qu’Andecha saliere del furacu y quedare como únicu referente nacionalista n’Asturies.

Los más encamentaos partidarios del pautu calteníamos paralelismos col tercer puntu l’analís de los dirixentes d’IAS. Camentábamos –y toviéramos a puntu de conseguilo- que la participación n’Europa de los Pueblos ya’l contactu con grupos que nun yeran menos “puros” que nosotros pero que sabíen facer política, diba tener un efectu terapéuticu nes empodrellaes formes de facer de la organización. Pensábamos que de dalgo diba servir el trabayar con xente que tinía responsabilidaes de verdá y que nun resolvía los problemes del repetidor de televisión del pueblu al traviés del autodetermín, o que nun resolvía los problemes presupuestarios n’un parlamentu cola lliberación de la clas trabayadora, pero que, al empar, defendíen la idega d’autodetermín ya esbrexaben polos trabayadores. Si Andecha Astur s’aprofitaba bien d’estes custiones, l’horizonte abriríase.

Tornando a la estratexa de la direición d’IAS, l’asuntu taba en qu’Andecha nun se presentare cola coalición. Nun-yos importaba un res qu’ellos quedaran fuera, eso yera secundario. La idega yera que, sabedores como yeran de la necesidá d’Andecha de presentase a les ellecciones, en solitario si nun había otra posibilidá, ellos reservábense l’as d’oros na manga. Torgando la entrada d’Andecha na coalición, ésta diba dir coles sos sigles ya, entós, ensín participar nes ellecciones, IAS pidiría’l votu pa Europa de los Pueblos, como yera lo propio d’un partíu nacionalista modernu y progresista.

La xugada tuviera a puntu salir bien, pente otres coses porque la trayectoria d’Andecha yera abondo problemática, sinon pa la Esquerra, sí pa Eusko Alkartasuna, daes les rellaciones históriques del nacionalismu asturianu cola esquierda vasca dende la dómina del CNA y del Ensame Nacionalista Astur, de los qu’Andecha yera heriede directu. Pero hebo un fallu que munchos nun vieran porque vivíen nuna burbuxa política. La decisión final d’ERC y d’EA p’aceptar a Andecha Astur definitivamente vieno d’unes declaraciones del entornu d’IAS –nun me recuerdo quién lo fixera- nes que se dicía que si Andecha nun diba n’Europa de los Pueblos, el Bloque por Asturies taba dimpuestu a abandonar el gobiernu PSOE-IU y dir con IAS na coalición. Nun sé si semeyante “boutade” llegaran creyela los dirixentes d’IAS ya espero que namás la emplegaran como munición dialéctica porque, de creyelo, ye pa duldiar de les sos capacidaes intelectuales. Si idega tala fora un inventu d’IAS, ello fálamos mui bien de la so forma de facer política. Si la cosa saliera de verdá del Bloque, entós el vieyu amigu y coaligáu Palacios xugó con IAS, amosando la escasa consideranza que-y tinía como organización y, riba tóo, la baxa consideranza política que-ys tinía a los sos cabezaleros, a los que trató de neños que traguen con cualisquier cuentu. Pero, de toles formes, lo que sí sirviera esta estrataxema fo pa qu’Esquerra ya Eusko Alkartasuna atalantara la escasa seriedá de dalgunos ya’l bon facer d’otros.

Andecha Astur, al travién del so secretariu xeneral, Arturu Bermeyu, robló la constitución d’Europa de los Pueblos en Sansebastián unos díes dempués...

Comentarios

  1. Bueno, el tonu de los articulos parez entamar a calecese enforma, cosa que ye buena, si se sabe repartiles a toos.

    A mi, que nunca tuvi n'IAS, hai una cosa que nin me cuadra nin me presta de lo que cuentes David. Y ye que pareces ser conocedor de primer mano de los braeros enfotos d'IAS de cara a aquelles eleiciones europees, y eso ye dalgo que pongo mui en dubia. Prestaríame la versión de Llope, por exemplu, de lo que pasó naquellos tiempos. Acusalos de que la so estratexa yera qu'Andecha nun se presentara ye daqué gordu, importante, o como bien sorrayes: perimportante ¿non?

    Dame la impresión, en cierta manera a la hora na que despliques esi fechu esautu, qu'asumes esi discursu victimista de "toos tan contra d'Andecha y toos quieren el so mal". Pero bueno, taré sollerte a les prósimes actualizaciones pa ver si ye solo un reflexu.

    Ánimu y gracies por estos articulos.

    ResponderEliminar
  2. Coño... qu'Inaciu Llope saque entós outru blogue o un llibru.

    El falar y l'argumentar nunca ta de más, y pa min Rivas ye bien correutu nes formes, nun ye faltón...

    ResponderEliminar
  3. Toos sabíemos qu'había daqué nos migayos del nacionalismu asturianu que ésta ye la primer vegada que dalguién esplícalo enforma.

    Gracies fonderes David

    ResponderEliminar
  4. Un que taba daquella n'IAS26 de febrero de 2010, 10:29

    Más fechos porque tal como lo cuentes escápense delles coses.

    Hai un fechu capital que nun cuentes y que tien dos puntos:
    - IAS aceptaba qu'Europa de los Pueblos n'Asturies fora AA-IAS, con Rivas de candidatu.

    - Pero Andecha nun aceptaba AA-IAS, solo aceptaba dir como AA. Quería qu'IAS nun tuviere anque fora un papel secundariu. Y taba dispuesta a quedar fuera de la coalición con tal que nun tuviere tamién IAS. Y eso anque diba primero na sigla y el so candidatu, David Rivas, yera'l representante asturianu.

    El Bloque faló directamente con Europa de los Pueblos pa sondear pero NUNCA faló con IAS pa proponer nada. Eso suena a bulu de la factoría MAF. Paez que te colaron unes cuantes d'eses, David.

    Tien gracia eso de qu'IAS tenía rellación a través de les sos mocedaes que tuvieron nunes xornaes de llingüística... El casu ye qu'IAS tenía rellaciones cola Chunta, trabayó la so rellación y la Chunta propunxo qu'IAS fuera'l sociu asturianu.
    La Chunta comentó-y daquella a IAS que los d'Andecha dicíen a Esquerra y EA qu'IAS yeren medio d'IU, que nun teníen nin locales, etc.

    Y otra cosa, nun comentes qu'Esquerra y EA "castigaron" a Andecha por nun aceptar dir con IAS. Asturies foi l'únicu país del estáu nel que la papeleta nun apaecía'l sociu. N'Asturies votábase a Europa de los Pueblos, non a Andecha-Europa de los Pueblos. Y eso foi lo que fixeron n'extremis: "nun vais con IAS pero tampoco apaecíes na papeleta", la sigla sí pero el nome enteru non).

    Salú

    ResponderEliminar
  5. Pal que taba n'IAS d'aquella. Puede que tengas razón, a lo mesnos en parte. Como yá fxe n'otres ocasiones, repasaré les coses y, si hai que rectificar dalgo, rectificaré. Por cierto, falarelo con Inaciu Llope, ensin obligalu a facer un blogue. La mayoría sabeis que tengo n'alta estima la so opinión, además de ser amigos dende hai munchu tiempu.

    ResponderEliminar
  6. Pal que taba n'IAS , paezme a min que cada unu cuenta lo que-y paez de la romería . Tengo entendío y corríxeme si toi equivocáu , qu'IAS VETO A DAVID RIVAS COMO CANDIDATU, porque nun lu consideraben representativu del nacionalismu asturianu y porque yera'l candidatu d'Andecha. ¿Ye asina o non?. ¿Hubo vetu a David o fue un bilordiu interesáu? .
    Paez ser qu'IAS tenia en mente otros candidatos que consideraba meyores (Llope , Zapico , Guardado etc).
    Me prestaría que se punxeren toles cartes boca arriba , ya qu'estes coses fixeron dañu nel so momentu y non solo a les organizaciones polítiques , sinón a un sector que votaba y vota nacionalismu.
    Espero la to rempuesta o la de cualquier dirixente d’IAS , pa desfacer esti y otros entuertos.

    Salú

    ResponderEliminar
  7. Churchill: Yo nun sé nada d'esa historia, pero tenemos que tener cuidao cola memoria, porque mos fae trampes. Yo creyo -y asin a lo cuntaré n'otra entrada- que la discusión sobro la mio candidatura diérase nel 1999 y, riba tóo, cuando la posible xuntanza de 2007. Nun me paez que los nomes se punxeren na mesa cuando Europa de los Pueblos, pero igual pasó. Yo nun lo recuerdo pero tamién la mio memoria falla. De toles formes, por muncho que falle creyo que lo que cuento ye lo que pasó, evidentemente cola mio propia interpretación. Sí puedo tar enquivocáu no de les mocedaes d'IAS y les relaciones cola Chunta Aagonesista.

    ResponderEliminar
  8. Otru qu'andaba per ellí26 de febrero de 2010, 16:08

    IAS aceptaba a Rivas de candidatu, lo que pidía yera apaecer na papeleta xunto con Andecha. Y aceptaba dir detrás. Ye dicir, aceptaba dir en segundu términu y col candidatu d'Andecha porque taba mui interesada n'entrar nesa coalición.

    Énte la imposición d'Europa de los Pueblos de que teníen que tar Andecha ya IAS, Andecha propunxo que nun saliera nengún nome. Queríen más nun salir ellos con tal que nun saliera IAS.

    Lo del Bloque foi más cenciello. A ellos, y eso selo de primer mano, IU nun aceptaba metelos na papeleta a les Europees y pa presionar amenazaron a IU con dir con Europa de los Pueblos, y pa ello llegaron a falar cola coalición. Al final IU aceptó que n'Asturies na papeleta saliere'l nome del Bloque.

    IAS nun intervino pa nada nesa operación, que desconocía dafechu, enteráronse porque-yos lo cuntó la Chunta. Nun sé como se cocinaría eso nos contubernios de los pasiellos.

    Ye verdá que'l primer contautu d'IAS cola Chunta foi a través d'un miembru de les mocedaes, que yera tamién miembru del Comité Nazional de la Chunta,y sigue siéndolo, pero les rellaciones yeren directamente colos cargos del partíu. De fechu IAS llevó'l casu del so conceyal de Piloña años depués al pautu antitresfuguismu a traves de la Chunta.

    Na decisión final, según la Chunta, lo que pesó ye la importancia de tener un sociu n'Asturies y como tuvieron qu'escoyer, escoyeron a Andecha, anque nun-y permitieron poner el so nome pol vetu qu'ellos fixeron al nome d'IAS.

    ResponderEliminar
  9. Bien David :
    De mano dicite que tengo bona memoria . Nesa domina , yo nun yera militante nin d'Andecha nin d'IAS . Esto del veto a la to persona , se comento (non por tu parte , digo esto pa dexalo bien claro) , nun se si interesadamente o non .
    Yo solo entrugaba si había daqué de cierto nello . ¿U'l problema? . Sinceramente nun lu veo .
    Seique pensándolo mas posao , esto nun tien mayor importancia.
    Téngome por persona prudente , asina que retiro la entruga y pido disculpes a ti en primer llugar y a quien correspuenda por habela fecho .

    Salú

    ResponderEliminar
  10. Soi d'Andecha dende va bien pocu, pero conozo munchu del movimientu, y paezme perprexudicial el que se fale tan allegremente de lo que pasaba dientru d'andecha comu verdà absoluta, incluso por xente que se diz d'ias, lo que se pueda dicir d'ias ye talamente disculpable si ye malo, o incluso llegar dicir que ye qu'engañaron a David. Tolos bilordios que tais llevantando son inñecesarios amàs de radicalmente falsos. Considero a David una presona intelixente que nun creyo que se dexe engañar como a un guah.e.

    ResponderEliminar
  11. El que taba n'IAS daquella27 de febrero de 2010, 10:24

    ¿Cuálos son los llevantos?

    Tolo que se ta diciendo equí ye lo que pasó y hai decenes de persones que pueden corroboralo, entamando por Pin Bermeyu que taba nel centru de la negociación.

    Nin sé nin ye cosa mía si David taba engañáu o non, pero esto que se ta contando ye lo que pasó y ye bien facil de comprobar. Namás ye entrugar a los que taben ellí.

    Lo que ye normal ye que si David comenta coses y otres persones tenemos otres informaciones o visiones lo comentemos. Porque eso ye lo que él pide, si nun entendí mal.

    ResponderEliminar
  12. Tengo tovía presentes los esfuerzos que se ficieron n'Ias pa qu'Ias entrara na coalición aceptando plenamente la presencia d'AA y encabezando David Rivas.

    Entiendo que cierta xente, non toda, d'aquella Andecha xugara coles cartes marcaes esti tipu de partides y que David Rivas fuera una víctima, nel meyor de los casos, de procederes que son ya antolóxicos nel bagaxe del equipu de MAF.

    Polo demás parezme bien que David Rivas ande escribiendo lo que a él y parez que ye la realidá.

    Pola mio parte digo qu'hai fechos oxetivos que convierten estes entrades de blog en lliteratura fantástica o, lo que ye pior, en declaraciones d'una persona que tuvo, y debe siguir tando, sometida a la relación con xente que distorsionó totalmente el su entendimientu, hasta llegar a redactar estos libelos lisérgicos.

    Nun ye por nada pero equí David Rivas parez a Don Quixote colos güeyos tapaos y convencíu de que taba volando, pero resulta que'l caballu yera de maera.

    El papel de Sancho nun lu voi mentar, pero tamién lu desenvolvio daquién nesti cuentu. Aunque pueo ser más malu afirmando que yera un papel intercambiable col de Rivas.

    Rivas tamién fue Sancho quixotizáu por otru Frestón.

    Pienso que te la liaron mui gorda, o pergorda, como quieras.

    ResponderEliminar
  13. Bones David, diba dexar esto de participar equí pa prau, paezme mui bien que cuntes les tos vivencies dientru del nacionalismu asturianu, y paezme que ye una manera d'averar esi nacionalismu a dalgunes persones que nun lu conocen, o faenlo, sólo, al traviés de segundes persones, y equí, n'Asturies, eso ye permalo, porque nun se diz una verdá integra salvo enquivocu, o seya que daquién tea borrachu cuando fales con él.
    La verdá ye que nun voi entrar en enguedeyos de quien foi más cabrón o menos, agora que conozo al nacionalismu un poco meyor, por eso toi medio apartau, anque soi miembru de la xunta executiva d'AA por imperativu llegal, y dempues de ver lo que lleves escrito afirmo, creo que con conocimientu de causa, que fuimos munchos los engañaos, non nesti, sinon en tolos procesos elleutorales y de xuntures a nivel nacional que se ficieron nesti país cainista y, por supuestu, tú tamién tabes ente ellos, dientro de AA hubo y camiento que seguira habiendo, munches verdaes a medies, munches mentires interesaes y muncha falsedá. Oxalá nun fora asina pero la evidencía ye tan clara qu'asusta, prestaríame muncho que dalgún día el Sr. Marques y compañia mos desplicaran tanta puñalada, tanta trampa y tanta falsedá... pero eso ye otra hestoría.
    Dalgún día espero falar contigo en persona, apreciote abondo, anque dalgunes coses de les que dices nun les comparta, pero nun me paez esti'l sitiu más afayaizu pa sacar tanta mediocridá personal ya incapacidá como realmente arrodia al nacionalismu d'izquierda n'Asturies. Y esi día collaciu espero que me despliques dalgunes coses y desplicate yo otres poques. Y lo que más me diba prestar yera ver a la xente qu'escribe nestos foros ensin mazcares, que ya toi fartu de mensaxes ocultos y seudonimos.

    ResponderEliminar
  14. Pal d'IAS d'aquella, que yá ye como de casa. Evidentemente que cuando meto estes coses na rede nun ye pa, valga'l xuegu pallabres, pa enredar. Lo que más valoro ye otres opiniones -unes daránme la razón ya otres non-, que, dígotelo en serio, teo en cuenta. Siempres que se caltenga un bon tonu y nun seyamos faltones -cosa que, por suerte, nun pasa nesti blogue- equí podemos falar de tóo.

    ResponderEliminar
  15. Vamos ver. Yo nun me considero engañáu pero tamién ye verdá que naide tien siempres tolos datos na mano. Les decisiones que tomamos non siempres tan avalaes pol total conocimientu. Son coses de la vida. Lo que nun me paez razonable ye fialo tóo a la mala voluntá o a les formes de facer política d'una persona. Pero si eso fora asina, ¡qué persona más intelixente y qué fatos somos tolos demás!. Texemanexar a decenes de persones demientres decenes d'años ye digno del meyor discípulu de Maquiavelo. ¿Tan difícile ye pensar que, en bona parte les ocasiones, n'Andecha había munchu alcuerdu y non tanto maquiavelismu d'una persona o d'un par d'elles.

    ResponderEliminar
  16. Yo nun creo que David fora engañáu. Agora, sí ye posible que, dándose cuenta de delles mentires, siguió xugando la so baza. Más d'una vez comentó que-y molestaben dellos estremismos y fundamentalismos pero que namás se podía tar en uno d'estos partíos, el PAS o Andecha. Y él prefería Andecha.

    ResponderEliminar

Publicar un comentario