Les chavalines d’oru



Acabé la mio llicenciatura n’economía na Universidad Complutense en xunu de 1980. Nel mes de setiembre entamara dar clases d’estructura económica mundial porque me llibré de la mili a base d’echái cara abondo. Paez ser que fora’l profesor más mozu d’economía na historia la universidá o asina me dixeran, pero nun lo sé dafechamente. Ya esto inclusive pué ser un deméritu: cuando yes el más xoven en cualisquier cosa, lo más normal ye que seyas tamién el peor o de los peores. El casu ye que tinía un contratu de “profesor aidante”, que yera cosa como un becariu mal pagáu pero que daba clases. Cinco años dempués marché pa la Universidad Autónoma, na que diba doctorame un tiempu dempués. Yera setiembre de 1985 y siguí cola materia d’estructura económica mundial, una materia que sigo impartiendo. Soi heriede de Sampedro, de Berzosa, de Martínez Cortiña, de Tamames, de Vidal Villa… N’Autónoma yá yera responsable de los dos grupos al mio cargu. Ya entóncenes coñociera a les “tres gracies”, les mios “chavalines d’oru”.

La diferencia d’edá nun yera grande cronolóxicamente falando, pero nesos años un “lapsus” de siete-ocho años son bastantes. Elles taben en segundu cursu. Yo tinía ventisiete años ya elles andaben pelos diecinueve-vente, pero taben como neñes. Diéranme muncha lata, riba tóo Ana, que comía polvorones en clase y xiblaba la canción de David el gnomo cuando yo entraba nel aula. Gemma yera mui seria. Púnxe-y un notable y presentárase nel mio despachu pa protestar y xubir nota. Nuria yera la más discreta. Y yeran les tres guapísimes. Siguin siéndolo. La risa d’Ana, la pose de Nuria, los güeyos de Gemma… Pasara tiempu abondo y adico procuru pa eses semeyes que tienen cuasi trenta años de distancia.
Si dalgo enllena d’arguyu a un profesor ye ver cómo los sos discípulos acaben valiendo más qu’elli. Si un alumnu míu algamare’l premiu Nobel yo pondríame como un pavu rial. Camentaría, igual ensin motivu, qu’esi premiu yera en parte de mió. Cuando esi estudiante xubiere al estráu d’Estocolmo, yo taría xubiendo al delláu. Pos eso, arreblagando penriba les distancies, ye lo que me pasa coles mios “chavalines d’oru”. Nun sé mui bien el porqué, pero siempres apostara por elles. Y nun m’enquivocara.
Volví a teneles nos cursos de doctoráu y, nel casu de Gemma, tuve nel tribunal que xulgara la so tesis, que yera sobro indicadores ambientales, de desendolcu caltenible, una tesis estraordinaria. La vida llevó a Ana y a Nuria per otros caminos y a otres universidaes.
Cuando yeran estudiantes la mió favorita yera Ana, cosa que-y cafiaba soberanamente a Gemma y que-y daba lo mesmo a Nuria, siempres, como yá dixe, discreta. Pero güei nun hai diferencies. Con Gemma comparto la vida. Ye profesora nel mio departamentu. Ye más… ye la mio xefa. Fora secretaria de la facultá, vicedecana y milenta coses más. Yo, que soi enforma inútile pa custiones de xestión, almiro a Gemma. Ye como una formiguina, va pasín a pasu, pero ye enérxica cuando la situación lo desixe. Amái, casara con un home aplombáu, José Antonio, sobrín-ñetu de Negrín, el presidente de la república. Ana ye tamién profesora, na Universidade Federal Fluminense, en Rio de Xaneiro. Y Nuria tamién ye profesora na Universidad Carlos III. Préstenme muncho eses trayeutories. Dalgo de mió va nelles. Y les tres son madres, que ye gran títulu.
Con Ana engárrome ca vuelta que mos vemos. Ye una católica d’esquierdes y lo de la ilesia prevoca discutinios, delles vegaes con dureza, inclusive con cierta violencia. Amás la so familia careciera la represión por parte de los republicanos cuando la guerra civil, talamente lo contrario de lo que pasara na mía, ya eso tamién mos da pa falar y falucar. ¡Qué cerquino ta entá aquella guerra! Gemma ye más “diplomática”, magar que con un aquello de mala hostia y munchu humor. Y, a la postre, cola que más toi identificáu ideolóxicamente ye con Nuria. Nuria ye la radical, la que piensa d’una miente más cercana a la mía. L’únicu “pero” que tien ye que ye madridista, cosa terrible pa un esportinguista de pro.
Les tres son académicamente dures. Gemma, anque bastante “progre” ye un tanto neoclásica. Ana tien un puntín keynesianu. Nuria ye una socialista. Como yo ando nun mecigayu de nacionalista asturianu y d’anarquista de llínia kropotkiniana ye fácile sospechar les trafulques que tenemos cuando mos vemos. Como yá yera d’estudiante, la más peleona ye Ana, pero hai que tener cuidáu coles tres. Dalgunes vegaes paezme que ven en mí un hermanu mayor al qu’hai que dar d’hosties. Pero, cuando les veo escontra la pizarra, desplicando un modelu o plantegando la so visión de la economía, noto l’arguyu del que-ys daprendió les primeres llecciones de la estructura económica.
Yo teo dos fíes, Aida ya Olaya. Son lo más importante de la mio vida. Pero un sentimientu mui asemeyáu téolu por Nuria, por Ana y por Gemma. Un profesor ye’l que “profesa”. Hai dalgo sacrao, sacerdotal, nesta actividá. Y cuando ves cómo los tos estudiantes esguilen pel mástile’l conocimientu, profesen como tu, lleguen más alló que tu…, notes una satisfaición difícile de describir. Eso ye lo qu’anubre, como ñeblina na mio valle, el mio corazón cuando falo coles mios tres “chavalines d’oru”. D’elles taría arguyosu el mesmu Leonardo da Vinci, que dicía que merez compasión el discípulu que nun aventaxa al so mayestru. Elles yá adelantraran al so profesor d’estructura. Ana, Gemma, Nuria: cada pasu que xubís doilu con vosotres…

Comentarios

  1. Ta bien, mui guapes y mui listes toes tres. Pero Negrín nun foi presidente de la República.

    ResponderEliminar
  2. Quinin... Yes un cabrón. Enquivoqueme no de Negrín. Pero ¿que ye lo que te mata? ¿Yo o les tres mueyeres? Yes un miserable... Y dir con anónimu val muncho... Yes, repítolo, un cabrón... Y con mui poca decencia...

    ResponderEliminar
  3. Don David, repórtese, se lo ruego. No vale la pena perder los nervios de esa manera.

    ResponderEliminar
    Respuestas
    1. Pido disculpes. Paseme...

      Eliminar
  4. David, recuerda:

    Don't feed the trolls...

    ResponderEliminar

Publicar un comentario